Tibɔnyaan ti Mak ŋmee ti na 10 - UWONBƆR A GBƆNPƆŊ LIKƆƆNL

Lipiiyiil a bɔr

¹ Le Yisa nan nyan ki chaa Judiya a tingbɔŋin ki tan don Jɔdann a mɔgilin. Le bininfob takpem nan lagin u ban, le u yaan ti nan wɔɔn bi Uwonbɔr a bɔr ke waah pii ti wɔɔn man nin.

² Le Farasii yaab dan u ban ki ban bin mag u lig, le ki baan u ke, “Nsiim chee sei ke uja n yii u poo?”

³ Le u mu baan bi ke, “Moziz nan sei ni nsiim nii ki jiin ni paamaa?”

⁴ Le bi ke, “Moziz nan wɔɔn ti ke uja li fir sɔb lipiiyiil a gbɔŋ ki yii u poo.”

⁵ Le Yisa bei bi ke, “Ni tukangbir bu le nan che Moziz nan sɔb nsiim nmɔn ki sei ni.

⁶ Amaa Uwonbɔr kaah nan naan dulinya npiinim ni, ‘U nan naan uja nin upii le.’

⁷ Mambu, le uja li jiɛn u baa nin u na le ki kɔɔn upii,

⁸ wee binib bilee n lagin ki li ye tigbanann tiba, baa ji yin ye bininfob bilee, amaa bi ni yin ye uninfo uba le.

⁹ Mambu, ban wee Uwonbɔr ta bi ki lagin ni, uninfosaal li nyi un choo bi ki bɔgir.”

¹⁰ Baah nan nan jirin iniin n-yonn man nin, le u bɔɔnɔɔb nan baan u bɔr nmɔn a taai.

¹¹ Le u bei bi ke, “Uja wan yii u poo wee ki kɔɔn upii uba ke, u tun iwanjaab toon na, waah kɔɔn upii ki kpiɛ u bu-n bu.

¹² Man mu jigin, upii yii u chal wee ki tan kun uja uba ke, u mu tun iwanjaab toon na.”

Yisa kaah nan kaab jaa nbuwaab bu man

¹³ Le bininfob biba nan ta bi buwaab ki dan Yisa ban, ki ke un ta u nɔɔ ki paan bi bu-u, amaa le u bɔɔnɔɔb fu bi bu.

¹⁴ Waah nan kan bi tann bi bu-n ni, le u ŋuul nan fii bi bu, le u bei bi ke, “Ni che nbuwaab nmɔn n dan n ban ni, ki laa ŋɔɔ bi, nbuwaab nan kaah be man nan Uwonbɔr a niin a naamin ye bi yaan le.

¹⁵ Ibamɔn le n bei ni nan, wan kaa gaa Uwonbɔr a naam ke kibigin ke, waa li kɔɔ mi ni.”

¹⁶ Le ki gaa nbuwaab nmɔn, le ki ta u nɔɔ ki paan paan bi bu, ki kaab jaa bi bu.

Ujɔɔndaan uba a bɔr

¹⁷ Yisa kaah nan nyan ni yaan ki chaa nmɔn, le uja uba guun kenn u ki gbaan u nintogil, le ki baan u ke, “Wan wɔɔn ŋan, n yin ŋa nii wee ki nan kan limiɛfol lan kaa jɔɔ ndiɛm aa?”

¹⁸ Le Yisa jiin ki bei u ke, “Ba ŋa wee a yim uninfo ŋan naa? Uba kaa be ki ye uninfo ŋan ni, see Uwonbɔr a binba.

¹⁹ A pii nyi Uwonbɔr a siim kaah wɔɔn man, ‘Laa ku uninfo; laa tun iwanchɔgin toon ni, laa su, laa ji tibɔkar a siɛra ki bii a kpiɛgi; laa ŋal bininfobi, ki li tenn a baa nin a na jilimau.’”

²⁰ Le uja-n bei u ke, “Wan wɔɔn, n pii chee ki tun ni niɛ nan n nbuwaan nin le.”

²¹ Le Yisa lig u chimm nin njiɛm, le ki nan bei u ke, “Niwann niba kpeŋileŋ li pariŋ; li kun na ki tan kɔɔr ŋaah jɔɔ niwann nan biɛn na, wee ki ta iligin ki sei faladama, wee ki nan kan njɔɔm Uwonbɔr a niin, wee ki ni li nɔɔm.”

²² Uja-n kaah nan gbir man nin, le u sufu nan bii takpem, le u nan jir ki kun nin npoobiin, u nan jɔɔ tiwann takpem pam.

²³ Le Yisa nan gbiɛ lig u bɔɔnɔɔbin, le ki bei bi ke, “Ni li pɔɔ pam nin bijɔɔndam n nan kɔɔ Uwonbɔr a niin a naamin.”

²⁴ U bɔr nmɔn nan ŋa bi ligaril le; le u ji mann ki bei bi ke, “N buwaab, ni pɔɔ pam nin uninfosaal n nan fir kɔɔ Uwonbɔr a niin a naamin.

²⁵ Ni pɔɔ paa nin ujɔɔndaan n kɔɔ Uwonbɔr a niin a naamin ki jon nin alakoomi kaah li kɔɔ siɛrig a bolin na.”

²⁶ U mɔleen nmɔn nan gar bi pam, le bi nin baan tab, “Ke ni ye man ke ŋma pii li fir ŋmaraa?”

²⁷ Le Yisa lig bi ki bei bi ke, “Uninfosaal kaa li firi amaa Uwonbɔr ma li fir tun niwann biɛn.”

²⁸ Le Piita bei u ke, “Liga, tim jiɛn niwann biɛn le ki nɔɔŋ.”

²⁹ Le Yisa bei bi ke, “Ibamɔn le n bei ni nan, wan biɛn jiɛn u niin, bee u watiib nin u kpetiib, bee u ninsiɛb, bee u nam, bee u baam, bee u buwaab, bee u kpaab, n yinl bu nin tibɔŋann nin bu ke,

³⁰ u na li kan tiwann ke tin jo waah nan jiɛn tiwann tan ni biɛn. U na li kan iniin, nin watiib nin kpetiib, nin ninsiɛb, nin nam, nin nbum, nin tikpaann, a kobig kobig kutingbɔŋ nan yaan, ki biɛ na li kan limugil ki kpiɛ; le n-yonn man chaan nan le un nan kan limiɛfol lan kaa jɔɔ ndiɛm nan.

³¹ Bisanliib na li ŋa bibɔɔnpaab, le bibɔɔnpaab mu na li ŋa bisanliib.

Yisa kaah nan pag u kum a bɔr nfimitaa man

³² Iyaayoo nmɔn le Yisa nin u bɔɔnɔɔb nan nyan nsan bu ki do Jerusalam, le u gaa bi sam ki liin, le ni gar bi, le bijawaam mu ji choo kuninfogbaluŋ kan nan pa bi bɔɔn nin. Le u yaan ti nan ta u tooi piig nin bilee-n ki nyan ngbaan, ki wɔɔn bi nan li ŋa u,

³³ ke laa, “Ti yin do Jerusalam le nan, nan yaan wee bi li ta Uninfosaal a Big ki ŋubin kumanug a yudam nin ban wɔɔnn nsiim a nɔɔn le bin ji u tibɔr ki ke bin ku u, le ki ta u ki sei ban kaa ye Juu yaab nan;

³⁴ le bi li laa u ki sii timɔsann ki ŋaa u ki boo u, ki nan ku u, amaa ni ween itaa daal u li fii nkumin.”

Jemisi nin Jɔnn kaah miɛ Yisa tininkper man

³⁵ Iyaayoo le Jemisi nin Jɔnn, ban nan ye Zebedi a naachim nan, nan dan Yisa ban ki nan bei u ke, “Wan wɔɔn, ti ban a tun niba le ki sei ti.”

³⁶ Le u baan bi ke, “Ni ban n tun ba sei naa?”

³⁷ Le bi jiin ki bei u ke, “N-yonn man wee a nan jin a naamin ki kan npɔɔn ke, a che ti ni uba n kal a nɔɔjiim paam wee u miɛnin mu n kal a nɔɔgam paam.

³⁸ Le u jiin ki bei bi ke, “Naa nyi naah miɛ niwann nan ni. Ni li fir nyu kiyiinyɔɔg kan wee n yin nyu nan naa? Bee ni li fir ki ji fala ke maah yin ji man nan naa?

³⁹ Le bi jiin ki ke, ti li fir. Le u bei bi ke, “Ni sin li fir nyu kiyiinyɔɔg nmɔn yaan ki biɛ li fir ji fala ke maah yin ji man ni.

⁴⁰ Amaa naa ye min le li gann wan na yin kal nnɔɔjiim paam bee n nɔɔgami. Uwonbɔr le yin gann ban na yin kal nkaam nmɔn bu.”

⁴¹ Le Yisa a tooi piigin kaah gbir man nin, le bi ŋuui fii Jemisi nin Jɔnn bu.

⁴² Le Yisa yin bi biɛn ki lagin u ban, ki bei bi ke, “N tɔɔl nyi ke bininfob ban yin biba dulinya nan a yudam nan don biba le; le ban mu jɔɔ tininkper nan mu ŋmag bininfob npɔɔn le.

⁴³ Amaa ni laa be man ni. Ni ye uba ban tininkper ke, see ke u ta uba ki ŋa ni biɛn nan a yomu;

⁴⁴ Wan mu ban un ŋa uyudaan ke, see ke u ŋa u ba ni biɛn nan a yomu;

⁴⁵ Uninfosaal a Big kaa dan ke bininfob n tun ki sei u le, amaa u dan ke u nan tun ki sei bininfob le, le ki ji ta u miɛl ki da bininfob takpem.”

Yisa kaah ligir ujɔɔn Batimiyasi a num man

⁴⁶ Le Yisa nin u bɔɔnɔɔb dan Jeriko, ki nan nan nya, le bi ma nin bininfob takpem nɔɔ; le ujɔɔn uba nan be ki miɛ, u nan ka nsan gbaan le bi yi u ke Batimiyasi, u nan ye Timiyasi a bija le.

⁴⁷ Waah nan nan gbir Yisa wan ye Nazarif a ninfo bu n-yonn man nin, le u yigin papaab ki ke, “Yisa, Ubɔr Defid a yaabil, sam kunyunyunbaag ni.”

⁴⁸ Le bininfob takpem nan tan u bu ke u ŋmin na. Le u ji mann tiɛn papaab ke, “Defid a yaabil, sam kunyunyunbaag ni.”

⁴⁹ Le Yisa sir ki bei ke, “Ni yin u ni.” Le bi yin u, ki bei u ke, “Che a sufu li pɔɔu. U yiŋ. Fii sira.”

⁵⁰ Le ujɔɔn nmɔn pir u daala takpoŋ ki bil, le ki fii sir, ki dan Yisa ban. Le Yisa baan u ke, “A ban n tun ba ki seiŋaa?”

⁵¹ Le u jiin ki ke, “N baa, n ban a ligir n num le.”

⁵² Le Yisa bei u ke, “Tɔ, li chaau. Ŋaah ŋaam yada n bu le a num ligir.” Libol nmɔn, le u num ligir, le u nɔɔ Yisa, le bi chaa.