Matiu 4 - UWONBƆR A GBƆNPƆŊ LIKƆƆNL

Yisa a biginim

¹ Le Kinaaŋ che Yisa don kukunkɔɔg bu ke ulinlaril ntan bigin u.

² Waah nan lol bimɔb iweehn pina nin tinyiɛr pina-n a bɔɔn bu, le nkom nan choo u.

³ Le ulinlaril dan u ban ki nan bei u ke, “Ni ye ke a sin ye Uwonbɔr a Bija ke, a bei itangbag nan wee i kpann tijiir.”

⁴ Le Yisa jiin ke, “Ni sɔb ke: ‘Uninfosaal kaa be tijiir a binba bu, amaa imɔleen yan biɛn nyann Uwonbɔr a mɔnn ni.’”

⁵ Le ulinlaril ta u ki jon Jerusalam, kan a yinl ji ye kasi a tiŋin, le ki ta u don iwonjiɛn niin a mɔɔ pin yul bu.

⁶ Le ki bei u ke “Ni ye a sin ye Uwonbɔr a Bija ke, a yug ki lu tuma. Nan bu-n ni sɔb Uwonbɔr a gbɔŋin ke: ‘U li che u malakam nguuriŋ, wee ki keŋ nin bi nɔɔi, le a taal kaa li gbiɛr litangbagili.’”

⁷ Le Yisa jiin u ke, “Ni ji sɔb Uwonbɔr a gbɔŋin ke: ‘Laa mag Uyudaan a Wonbɔr wi.’”

⁸ Le ulinlaril ji ta u ki don lijɔɔl lan kper a paab, ki wɔɔn u kutingbɔŋ nan a yagi nin i ŋam biɛn.

⁹ Le ki ke, “A bi li gbaan ki jiɛm ke, n bi li ta ni biɛn ki seiŋ.”

¹⁰ Le Yisa bei u ke, “Fɔr n ban na, Sintani! Nan bu-n ni sɔb Uwonbɔr a gbɔŋin ke: ‘Li jiɛn Uyudaan wan ye a Wonbɔr win, ki li tun tenn u binba.’”

¹¹ Le ulinlaril fɔr ki sin jiɛn u, le malakam dan ki nan ter u.

Yisa kaah piin u toon Galilii man

¹² Yisa kaah nan nan gbir ke bi loon Jɔnn kuloondiigin ni, le u nan jir Galilii.

¹³ U nan nyan Nazarif le, ki tan be Kapeniɛm kan be Zebulun nin Nafitali a mɔgil a gbaamin.

¹⁴ Ni niɛ nan nan tun ki gbeen ulinlenn Azaya kaah nan pag nan ke:

¹⁵ “Zebulun a tiŋin nin Nafitali a tiŋin, man be limɔgil a sam bu-n, ki yeg Jɔdann ni, ban kaa ye Juu yaab a Galilii;

¹⁶ bininfob ban be libunbɔnlin nan ni kan nwonween takpen na; le ban ka nkum a jinjiimin a tingbɔŋin ni kan nween nin kaah won ki pii ba.”

¹⁷ Iyaayoo nmɔn le Yisa piin ki mɔɔn ke, “Ni jiɛn ni toonbirin na ke paab a naamin malin na.”

Yisa kaah yin bijanchoob bina man

¹⁸ Yisa kaah nan chonn Galilii a mɔgil a gbaamin, le u nan kan nnabum milee, bi ma nan ye Simɔnn wan wee bi nan yi u ke Piita, nin u waal Anduru. Bi nan ye bijanchoob le ki be jaar kujanlaaŋ limɔgilin.

¹⁹ Le Yisa bei bi ke, “Ni dan, ki na li nɔɔm ni, wee n che ni li chor bininfob ke naah chor ijan man ni.”

²⁰ Le bi nan jiɛn bi janlann weem ki nɔɔ u.

²¹ Waah nan nyan niin ki chaa-n, le u kan Zebedi a naachim bilee, Jemisi nin u waal Jɔnn. Bi ma nin bi baa li nan be kuŋaluŋin ki mann bi janlann. Le Yisa yin bi,

²² libol nmɔn, le bi jiɛn bi ŋaluŋ nmɔn weem, le ki nɔɔ u.

Yisa kaah wɔɔn ki mɔɔn ki sin teb bibaarib man

²³ Yisa nan chonn jin Galilii a tim biɛn ni le, ki wɔɔn tiwonjiɛndirin, ki mɔɔn Uwonbɔr a naam a bɔŋann ni, ki che ban bu iwiɛn a booli biɛn kan kutebug.

²⁴ Le u yinl nan mɔɔn Siriya a tiŋin. Le bi nan ŋmagin bibaarib a booli biɛn, ki dan u ban: Tigbanann wiɛn, ban gbee nin nnaanbiim, ban nan lur likpikpiil, nin tigbanann kpiindam, le u teb bi biɛn.

²⁵ Le kuninfogbaluŋ nan nyan Galilii, nin Ntim Piigin nin Jerusalam nin Judiya, nin Jɔdann a kpenn dool yaab biɛn nan nɔɔ u.