Matiu 3 - UWONBƆR A GBƆNPƆŊ LIKƆƆNL

Jɔnn Wan nan Fu Bininfob Uwonbɔr a Nyunful kaah nan mɔɔn tibɔr man

¹ Iyaayoo nmɔn, le Jɔnn Wan nan Fu Bininfob Uwonbɔr a Nyunfulin nan nan be kukunkɔɔg bu, Judiya a tingbɔŋin, ki mɔɔn Uwonbɔr a bɔr

² ki ke “Ni jiɛn tibira, nan bu-n paab a naamin a jim mala.”

³ Wan wee Ulinlenn Azaya nan pagin sɔ, waah nan ke: “Uninfo uba be kukunkɔɔg bu ki kuun ke ‘Ni mann Uyudaan a dam a samin ki bila, ki mann u sam nmɔn wee mi li tela.’ ”

⁴ Alakoomi a gbann le bi nan ta ŋaa Jɔnn a wan yeewann, le ki nan lol nchangban u chaŋin, le u jiir nan ye itɔɔn nin tiseer.

⁵ Le bininfob nan nyan Jerusalam, nin Judiya a tingbɔŋ biɛn, nin Jɔdann a tingbɔŋin biɛn ki jon u ban.

⁶ Le ki tan kpiir bi toonbir, le u fun bi Uwonbɔr a nyunful Jɔdann a kpenn.

⁷ Amaa waah nan nan kan Farasii yaab nin Sadusi yaab takpem mu chaan u ban ke un fu bi Uwonbɔr a nyunful nan, le u bei bi ke, “Nim iwaalab a buwaab nan! Ŋma kpaan ni ke ni guun ki nya Uwonbɔr a ŋuufiiŋ kan yin dan ni bu nan naa?

⁸ Ni tun nan li wɔɔn ke ni sin jiɛn ni toonbira.

⁹ Ni laa tiɛr ke ni li fir bei niba ke, ‘Ti jɔɔ Abiraham wan ye ti yaaja.’ N bei ni le ke Uwonbɔr li fir fiin itangbag nan wee yin kpann Abiraham a yaabili.

¹⁰ Lilajal pii tɔɔ isiig a nyagi bu le, le busub ban biɛn kaa lo iloon ŋan ke, bi li ga i jaa nŋmi-n.

¹¹ “Min fun ni nnyum man wɔɔn ke ni jiɛn ni toonbira, amaa wan yin ŋɔɔrin n bɔɔn nan ma jon ma, le maa pii kpaan nin n tu u naatagili, u ma yin fun ni Kasi a Naaŋ nin nŋmi.

¹² U ŋmag u dilenn yikpeŋin le ki yin lenn idi nmɔn biɛn nbamɔm, ki nyan ndibimin ki ŋuun u binbolin, le ki nyɔɔ kufoŋin nŋmi man kaa jɔɔ njunimi.”

Yisa kaah nan ga Uwonbɔr a nyunful man

¹³ Le Yisa nyan Galilii ki jon Jɔdann a kpenn ke Jɔnn ntan fu u Uwonbɔr a nyunful.

¹⁴ Amaa le Jɔnn kaa chee. Le ki bei u ke, “Min li bi ye n dan a ban wee a fum, le a mu ji chaan n ban naa?”

¹⁵ Le Yisa jiin ke, “Che ni ŋa man daandaan nan, ni ŋan nin ti tun man wee nin gbeen nbuchin binben biɛn.” Iyaayoo nmɔn le Jɔnn chee.

¹⁶ Waah fun Yisa Uwonbɔr a nyunful diɛ-n, le Yisa nyan nnyumin weem. Libol nmɔn le kitilangbɔŋ loor, le u kan Uwonbɔr a Naaŋ kaah jiirin u bu ki nann ulanjel, ki nan wonn u bu.

¹⁷ Le likukɔl nyan paab ni ki len ke, “N bija sɔ, u ma le N jiɛ, u ma le N num gbee.”