Matiu 19 - UWONBƆR A GBƆNPƆŊ LIKƆƆNL

Yisa kaah wɔɔn lipiiyiil nin lijayiil a bɔr

¹ Yisa kaah pag imɔbon nan ki diɛ n-yonn man ni, le u nyan Galilii ki jon Judiya a yagil lan be Jɔdann a kpenn a doolin paam.

² Le kuninfogbaluŋ nɔɔ u bɔɔn, le u teb bi niin.

³ Le Farasii yaab biba dan u ban ki ban bin mag u lig. Le ki baan ke, “Nsiim chee ke uja nbin yii u poo niba bu waa?”

⁴ Le u jiin ke, “Naa karin Uwonbɔr a gbɔŋ kaah wɔɔn man ni naa? ‘Ke npiinimin na, Uwonbɔr nan naan uja nin upii le’,

⁵ ki len ke, ‘Ni bu uja li nya ki jiɛn u baa nin u na wee ki kɔɔn u poo, wee bininfob bilee nmɔn ŋa gbanann tibaa’?

⁶ Tɔ, ni ye man ke, baa ji ye ninfob bilee, amaa bi nin ye uninfo uba le. Ni bu ban wee Uwonbɔr ta bi ki lagin tabin, uninfosaal li nyi nin un choo bi ki bɔgir.”

⁷ Le bi baan ke, “Ba ŋaa, Moziz nan jaa ke uja li fir sei u poo lipiiyiil a gbɔŋ wee ki nin yii waa?”

⁸ Le Yisa jiin ke, “Ni tukangbir bu le Moziz nan jaa yaag ke ni li yiin ni piiba. Amaa naa nan ye man npiinimin ni.

⁹ N bei ni ibamɔn le, wan yii u poo wee naa ye u tun iwanchɔgin toon le, wee ki kɔɔn upii uba ke, uja nmɔn tun iwanchɔgin toon na.”

¹⁰ Le Yisa a bɔɔnɔɔbin bei u ke, “Ni ye man yin be uja nin u poo a sisiigin ke, uja kaa kɔɔn u pii ke ni sɔ.”

¹¹ Le Yisa bei bi ke “Naa ye uninfo biɛn le li fir nɔɔ nwɔɔm nmɔn ni, see ban wee Uwonbɔr ta sei bin a binba le li fir ŋmag.

¹² Nan bu-n nbinben nba le che bijab biba kaa kɔɔn bipiibi, bi ti li fir maa biba ki miin baa ye bijabi, biba mu, bininfob li ti faar bi, le biba mu paab a naamin bu le bin yii lipiikɔɔnl, amaa wan li fir ki ŋmag nwɔɔnim nmɔn ke u li ŋmaga.”

Yisa kaah kaab tikaar ki ŋa nbuwaab bu man

¹³ Tɔ, le bininfob biba ŋmag bi buwaab ki dan Yisa ban, ke un ta u nɔɔ ki paan bi bu ki miɛ Uwonbɔr ki sei bi, amaa le u bɔɔnɔɔb fuun bininfobin bu.

¹⁴ Le Yisa bei bi ke, “Ni che nbuwaab nmɔn n dan n ban ni ki laa ŋɔɔ bi, nan bu-n bi bosu le kpaan nin paab a naamin.”

¹⁵ Le n-yonn man wee u ta u nɔɔ ki ma ma bi-n le u fɔr niin.

Unaachipɔɔn jɔɔndaan a bɔr

¹⁶ Le unaachipɔɔn uba dan Yisa ban ki nan baan u ke, “Wan wɔɔn, litoonl ŋanl li la baa wee n li tun ki nan kan limiɛfol lan kaa jɔɔ ndiɛm maa?”

¹⁷ Le Yisa jiin ke, “Ba ŋa wee a baanim itoon ŋan buu? Uninfo uba kpeŋileŋ le ye wan ŋan, amaa ni ye ke a ban limiɛfol lan kaa jɔɔ ndiɛm ke, a li ŋmag Uwonbɔr a siimin na.”

¹⁸ Le unaachipɔɔn nin ji baan Yisa ke “Nsiim mi la baa?” Le u jiin ke, “Laa ku uninfo, laa tun iwanchɔgin toon ni, laa su, laa ji tibɔkar a siɛra,

¹⁹ li tenn a baa nin a na jilimau, ki li jiɛ a kunkɔɔn tab ke ŋaah jiɛ a ba man ni.”

²⁰ Le unaachipɔɔn nin bei u ke, “N pii nɔɔ nsiim nan biɛn le. Ni la ba ji guraa”?

²¹ Le Yisa bei u ke, “Ni ye a ban a binbem li be chasi ke, a li chaa ki tan kɔɔr ŋaah jɔɔ nan biɛn, ki ta iligin ki sei faladama, wee ki li jɔɔ njɔɔm Uwonbɔr a niin, ki li nɔɔm ni.”

²² Unaachipɔɔn nmɔn kaah gbir man n-yonn man ni, le u fɔr nin npoobiin, nan bu-n u jɔɔmin nan yab le takpem.

²³ Le Yisa bei u bɔɔnɔɔbin ke, “N bei ni ibamɔn le, ni li pɔɔ nin ujɔɔndaan nfir kɔɔ paab a naamin.

²⁴ N ji bei ni le ke, ni pɔɔ pam nin ujɔɔndaan nnan kɔɔ paab a naamin ki jon alakoomi kaah li kuur siɛrig a bolin ki nyau.”

²⁵ U bɔɔnɔɔb kaah nan gbir man ni, ni nan gar bi le takpem, le bi piin ki baan tab ke, “Ni ye man ke ŋma ji li fir kan nŋmarimaa?”

²⁶ Le Yisa lig bi chimm le ki bei bi ke, “Uninfosaal ban ni pɔɔ, amaa Uwonbɔr ma ban niwann biɛn kaa pɔɔ.”

²⁷ Iyaayoo nmɔn le Piita bei u ke, “Lig tim bu ke ti jiɛn niwann biɛn le ki nɔɔŋ. Ti nyɔɔr na yin ye baa?”

²⁸ Le Yisa bei bi ke, “N bei ni ibamɔn le, n-yonn man wee Uninfosaal a Big nan kal u naangbann bu nin npɔɔn takpen, dulinya pɔŋ n-yaan ke, nim ban ye n bɔɔnɔɔb nan mu na yin kal tinaangbann piig nin tilee bu le, ki li ji Iziral yaab piig nin bilee a bɔr.

²⁹ Le wan biɛn jiɛn u niin, bee u kpetiib, bee u watiib, bee u baa, bee u na, bee u buwaab, bee u kpaann, n yinl bu ke, u na li kan nibooli kobig, ki kan limiɛfol lan kaa jɔɔ ndiɛmi.

³⁰ Amaa bininfob takpem ban chinn nintogil daandaan nan, bi na li joor bɔɔn, bininfob takpem ban mu joor bɔɔn na li jo nintogil.