Matiu 14 - UWONBƆR A GBƆNPƆŊ LIKƆƆNL

Jɔnn Wan nan Fu Bininfob Uwonbɔr a Nyunful nan a kum a bɔr

¹ Iyaayoo nmɔn le Galilii a bɔrbig Herɔd nan gbir Yisa a bɔr bu,

² le ki bei u toontum ban nan be u ban ni ke, “Uja nan ye Jɔnn Wan nan Fu Bininfob Uwonbɔr a Nyunfulin le, u fii nkumin le! Mambu le che u tun ligaril a toon yan jɔɔ npɔɔn ni.”

³ Tɔ, Herɔd pii nan choo Jɔnn ki lol u ki ta u ki ŋa kuloondiigin, Herɔdiya wan ye u waal Filib a poo-n bu,

⁴ Nan bu-n Jɔnn pii nan gbaa bei Herɔd le ke: “Naa ŋan nin a fee a waal a poo ki kɔɔn ni.”

⁵ Herɔd nan ban un ku Jɔnn le amaa le ki sin san Juu yaab, nan bu-n bi nan chee ke Jɔnn ye ulinlenn le.

⁶ Le ubɔr Herɔd a maa daal nan foo, le Herɔdiya a bisa nyann ki nan waa bi nintogil, le ni mɔŋ ubɔr Herɔd takpem,

⁷ le u poo bimɔb ke u li sei kibisiɛgin waah li len ke u ban nan biɛn.

⁸ Le u na wɔɔn waah li baan nan bu, le kibisiɛg nmɔn bei ubɔr Herɔd ke, “Tugir Jɔnn Wan Fu Bininfob Uwonbɔr a Nyunfulin a yul ki kpeen kusɔŋin ki seim ni.”

⁹ Ni nan bii ubɔr n-yaa sufu le; u mu kaah chinn ki poo bimɔb nin u chamin bu, waa ji li fir yii, le ki jaa bi ke bin tun man,

¹⁰ le ki tun biba kuloondiigin le bi tan tugir Jɔnn a yul.

¹¹ Le bi nan ŋmagin u yul nmɔn, ki nan ta sei kibisiɛg nmɔn; le u ga tan sei u na.

¹² Le Jɔnn a bɔɔnɔɔb dan ki nan ta u gbanann ki pii, le ki jon ki tan bei Yisa.

Yisa kaah jin bijab turiŋmu man

¹³ Yisa kaah gbir nan tun ni, le u fii niin ki kɔɔ kuŋaluŋ u binba, ki jon lisagilin. Kuninfogbaluŋin kaa kan man ni, le bi choon tum bi taai bu ki kpagin limɔgil ki tan kenn u limɔgil a dool.

¹⁴ Yisa kaah nyan kuŋaluŋ n-yaan ki kan kuninfogbaluŋin ni, le kunyunyunbaag choo u, le u teb bi wiɛn.

¹⁵ Nween kaah nan nan diŋ n-yonn man nin, le u bɔɔnɔɔb dan u ban, ki bei u ke, “Taah be nan yaan nan ye kulɔŋ le, nween mu ban min lu le; mambu che bininfobin jo ntinbum man mal do nan ki tan kan tijiir daa.”

¹⁶ Le u jiin ke, “Bi laa chaa. Ni tɔɔl n seim bi tijiir wee bin ji.”

¹⁷ Le bi jiin ke, “Boroboro kon iŋmu nin njanbum milee le be ti ban doo.”

¹⁸ Le u bei bi ke, “Ni ta i seim ni man,”

¹⁹ le ki sin bei bininfobin ke bin kalim timɔɔr bu. Le u yuur boroboro kon iŋmu-n nin njanbum milee-n, ki waan lig paab, ki sei Uwonbɔr kunɔɔpoog tijiir n bu, le ki war war boroboro-n ki sei u bɔɔnɔɔb, le bi tol tol bininfobin.

²⁰ Le bi biɛn jin gbee ki gur. Le u bɔɔnɔɔbin lagin tijiir tan gurin, le ti gbee tikachar piig nin tilee.

²¹ Bijab ban nan jin tijiir nmɔn nan ŋa bininfob turiŋmu paam ma, bipiib nin nbuwaab a kanl kaa nan kpiɛ niin ni.

Yisa kaah nan chonn nnyum bu man

²² Libol nmɔn le Yisa nan che u bɔɔnɔɔb kɔɔ kuŋaluŋ ki lii u sam ki chaa limɔgil a dool, amaa le u ma paar ke un chabir kuninfogbaluŋin.

²³ Waah chabir kuninfogbaluŋin ki diɛ n-yonn man ni, le u don lijɔɔl a paab ke un miɛ Uwonbɔr. Le kunyiɛg nan ŋmiɛ ke u la be niin u binba.

²⁴ Iyaayoo ki miin u bɔɔnɔɔb ma be kuŋaluŋ a poolin nnyumin, ki bol nan fɔg nin limɔgil a doola, le kunyungbɔŋ jɔɔ bi ki yeŋ nan bu-n bi nan too nfaam le.

²⁵ Le Yisa nan nyan kikojamɔɔŋ ki jiir limɔgilin, ki choon nnyum bu ki chaa bi ban.

²⁶ U bɔɔnɔɔb kaah nan kan u choon nnyum bu ki chaan bi ban ni, le bijawaam choo bi takpem, le bi ke, “Ni ye utakpiir le.” Le ki sin yigin bijawaam a yigin ni.

²⁷ Amaa libol nmɔn le Yisa bei bi ke, “Ni che ni sufu li pɔɔu! Ni ye min le. Ni laa san bijawaami.”

²⁸ Le Piita bei u ke, “Uyudaan, ni sin ye fin ke, beim ni wee mu tɔɔn nnyum nan bu ki dan a ban.”

²⁹ Le u jiin Piita ke, “Li chaan.” Le Piita nyan kuŋaluŋ a poolin ki tɔɔn n nyumin bu, ki piin ki choon ki too Yisa.

³⁰ Amaa waah nan kan nfaam daarin, le bijawaam choo u, le u piin ki niɛg nnyumin, le ki yigin ki ke, Uyudaan, feem jaau!”

³¹ Libol nmɔn le Yisa tann u nɔɔ ki choo u. Le ki ke, “Fin yada pariŋ daan nan, ba ŋa wee a biɛn naa?”

³² Baah nan jir ki don kɔɔ kuŋaluŋin n-yonn man ni, le nfaam jiɛn kaa ji daari.

³³ Le ban be kuŋaluŋin a poolin ni dan ki nan gbaan ki jiɛn Yisa ki ke, “Ibamɔn a sin ye Uwonbɔr a Bija le.”

Yisa kaah teb bibaarib Genesareti man

³⁴ Baah nan don limɔgil a dool n-yonn man ni, le bi nan foo Genesareti.

³⁵ Kitiŋ nmɔn a ninfob kaah nan biɛ Yisa nan, le bi mɔɔn ki sei kitiŋ nmɔn a tingbaai biɛn, le bi lagin bibaarib ki ta bi dan u ban,

³⁶ le ki nan balin u ke un che bibaarib nan n maa u daala takpeŋ a mɔgbeli. Le ban biɛn nan maa u kan kutebug.