Tibɔnyaan ti Luk ŋmee ti na 7 - UWONBƆR A GBƆNPƆŊ LIKƆƆNL

Yisa kaah nan teb Rom a tɔtogib a sanliiru a toontunnu man

¹ Yisa kaah nan len man wee ni kɔɔ bininfob a tuli yin ni, le u jon Kapeniɛm a tiŋin.

² Bitɔb a sanliiru nan be niin ki jɔɔ u yom wan wee u num nan gbee, le nwiɛn choo u, ni nan gur wama le nin un kpo.

³ Iyaayoo nmɔn le bitɔb a sanliiru win nan gbir Yisa bu, le ki tun juu yaab a ninkpeeb, ke bin tan bei u wee u dan ki nan che u yomu nan n pɔɔg.

⁴ Baah nan foo Yisa ban ni, bi nan balin u le nin kinimaŋ ki ke, “Uja nmɔn kpaan nin a ŋa man sei wa,

⁵ nan bu-n u jiɛ ti ninfob, ki ji maa kuwonjiɛndiig sei ta.”

⁶ Le Yisa nan fii ki nɔɔ bi. Waah nan tan mal iniin nmɔn yaan ni, le bitɔb a sanliiru win tun u jɔtiib ke bin bei Yisa ke: “Uyudaan, laa bagir a ba ki chaan ni, maa kpaan nin a dan ki nan kɔɔ n niin nan yaan ni.

⁷ Ni ma bu le n lig ki miin maa kpaan nin n foo a ban ni. Amaa pagim a mɔbonl wee n yomu nan n pɔɔg.

⁸ N baantɔɔl ye wan wee tininkper a pɔɔm ŋmagim le, le n mu ŋmag bitɔtogib. Ki li fir tiɛn uba bu ke ‘Li chaau’ le un jo, ki tiɛn utɔ bu ke ‘Dan’, le un dan, le ki bei n yomu ke ŋa nan na, le un ŋa man.”

⁹ Yisa kaah nan gbir man nin, uja nmɔn a bɔr nan gar u le, le u gbiɛ lig kininfogbalɔŋ kan nɔɔ win, le ki len ke, n bei ni le, maa laa nyi kan uninfo wan jɔ yada nan a bosu, hali nin Iziral yaabin gbaa.”

¹⁰ Iyaayoo nmɔn le bijab ban u nan tun ni nan labir jir u niin, ki tan foo ki miin u yomu nmɔn pɔɔga.

Yisa kaah nan fiin lipukɔɔl a bija nkumin man

¹¹ Naa kan yuuri le Yisa nan jon kitiŋ kan wee bi yi ki ke Neyin ni, U bɔɔnɔɔb nin bininfob takpem le nan nɔɔ u.

¹² Waah nan foo kitiŋin a timansanmɔnn n-yonn man ni, le u kan baah tu nkum chaa bin tan pii. U takpiir nmɔn nan ye lipukɔɔl liba a bigaŋ le, le kitiŋ nmɔn a ninfob takpem nan be lipukɔɔlin ban.

¹³ Uyudaan kaah nan kan lipukɔɔl nan, le kunyunyunbaag choo u, le u bei u ke, “Laa mɔri.”

¹⁴ Le u jon ki tan maa nkumin, le ban nan tun nkumin sir. Le u ke, “Unaachipɔɔn, n beiŋ le, fii paaba!”

¹⁵ Le utakpiirin nan fii kal paab, ki piin ki pag, le Yisa ta u ki ŋubin u na a nɔɔn.

¹⁶ Le bijawaam nan choo ban biɛn nan be niin nmɔn, le bi don Uwonbɔr a yinl. Ki len ke, “Ulinlenn takpen le kpiirin ti sisiigin. Uwonbɔr le dan ke u nan ter u ninfob.”

¹⁷ Yisa a bɔr nmɔn nan mɔɔn Judiya a tingbɔŋin nin ntim man nan mal nin yaan nmɔn biɛna.

Jɔnn kaah nan tun u tooi man

¹⁸ Le Jɔnn a bɔɔnɔɔb nan bei u ni niɛ nan biɛn, le u yin u bɔɔnɔɔb bilee,

¹⁹ ki tun bin tan baan ke, “Fin li ye wan nan yin dan ni naa, bee ti la li lig u nsan buu?”

²⁰ Bijabin kaah nan foo Yisa ban ni le bi bei u ke, “Jɔnn Wan Fu Bininfob Uwonbɔr a Nyunful nan le tun ti ke ti nan baaniŋ ke, ‘Fin le ye wan nan yin dan ni naa bee ti le la li lig u nsan buu?”

²¹ Iyaayoo nmɔn le Yisa nan che bibaarib takpem pɔɔg, le ki nyan nnaanbiim bininfobin ki ligir bijɔɔm takpem.

²² Le u bei Jɔnn a tooi ke, “Ni li jir ki tan bei Jɔnn naah kan nan nin naah gbir man: Bijɔɔm ligir, le nwɔbim choon, le nkɔm kan kutebug, le bitukpaab gbir, le bitakpiib fii nkumin, le bi mɔɔn tibɔŋann ni ki sei bilanjiim.

²³ Tikaar be wan kaa jɔɔ nbiɛnim n bu nan.”

²⁴ Jɔnn a tooi yin kaah nan jir a bɔɔn bu, le Yisa nan piin ki pag bininfob ki jiin Jɔnn paam ke: “Naah nan jon lisagilin ni nan tan kan baa? Igbingbaan yan wee nfaam daarin bee?

²⁵ Naa ye man ke, ni nan jon ni tan kan baa? Uninfo wan yee tiwann yɔɔr ŋanin bee? Aai, bininfob ban yee kudaapɔɔrug a wann ki be bi wiibin be ibɔrniin le.

²⁶ Amaa ni nan jon ni tan kan baa? Ulinlenn naa? Nn, n bei ni le, u yab jon ulinlenn na.

²⁷ U bu le ni nan sɔb Uwonbɔr a gbɔŋin ke: ‘N li tun n toom wee un liir a nintogil, Wan yin mann a dam a sam.’

²⁸ N bei ni le, baa laa nyi ma uninfo uba wee u jon Jɔnn ni; amaa wan joor Uwonbɔr a naamin nan yab jon Jɔnn na.”

²⁹ (Le bininfobin biɛn, hali nin bilanpogaab, baah nan gbir Yisa a mɔboi, nan chee ke Uwonbɔr a sam ŋan, nan bu-n Jɔnn kaah nan fun bi Uwonbɔr a nyunfulin bu.

³⁰ Amaa Farasii yaab nin ban nyi Uwonbɔr a siim nan kaa nan ga Uwonbɔr a mɔleen kaah ye man ki sei bin ni, nan bu-n Jɔnn kaa nan fu bi Uwonbɔr a nyunful li.)

³¹ Le Yisa nan jiin ki bei bi ke, “Nim daandaan nan a ninfob, n yin ta ni ki bigin baa? Bi ye ninfo bol baa?

³² Bi nann nbuwaab kaah ka kinyaŋin ki yi tab ke: ‘Ti pee iwol ki tenn ni, le naa waa. Ti mɔɔr tikpemɔr ki tenn ni, le naa fabin ni!’

³³ Nim daandaan nan a ninfob ni nann nbuwaab nmɔn le, Nan bu-n Jɔnn Wan nan Fu Bininfob Uwonbɔr a Nyunfulin nan dan kaa ji tijiir kaa nyu ndaami le ni ke, ‘U jɔɔ kinaanbiig le.’

³⁴ Le Uninfosaal a Big nan dan ki ji ki nyu, le ni ji ke, ‘Lig uja nan, u ye ujijir nin udanyur le, ki ye bilanpogaab nin tibirdam a jɔ.’

³⁵ Amaa Uwonbɔr a lam wɔɔn miba ban ga mi ban le.”

Yisa kaah nan be Farasii a jau Simɔnn a niin man

³⁶ Farasii yaab uba le nan yin Yisa ke un dan ki nan ji kujɔɔg a jiir u niin, le Yisa nan jon uja nmɔn a niin, le bi nan lagin ki ka ji.

³⁷ Upii uba mu nan be kitiŋ nmɔn yaan ki tun tibir. Waah nan nan gbir ke Yisa be iniin nmɔn yaan ki ji tijiir nan, le u nan dan niin ki ŋmag tulaali a lulog,

³⁸ ki nan sir Yisa a bɔɔn u taafar paam le ki mɔr le u nyinyinn nan lur Yisa a taa far bu le u ta u yukper ki pir Yisa a taai, le ki ŋa tulaali ki ŋa u taai nmɔn.

³⁹ Farasii a jau wan nan yin Yisa nan kaah nan kan man, u nan tiɛr u sufu ni le ke, “Uja nan bi ye ulinlenn ke, u bi li biɛ upii wan maar u nan kaah ye wan, ke u ye tibir daan le.”

⁴⁰ Le Yisa jiin u ke, “Simɔnn n jɔɔ limɔbonl liba le ki yin beiŋ, le Simɔnn jiin bei u ke, “Wan wɔɔn, beim ni.”

⁴¹ Le Yisa bei u ke, “Bijab bilee le nan jɔɔ wan peŋ bininfob ilig a pɔnl. Uba nan jɔɔ u pɔnl nkpalam kobiŋmu, le utɔ mu jɔɔ nkpalam piŋmu.

⁴² Bi bilee nmɔn bi ni uba kaa nan fir yɔn ni. Le u nan jiɛn per bi biɛn ke bi li chaau. Tɔ, a tiɛr ki miin bi bilee nan ŋma le ni nan yin jiɛ wan pen bi ilig nan a bɔr takpem maa?”

⁴³ Le Simɔnn jiin u ke, “N tiɛr wan a pɔnl nan yaab wee u jiɛn per win le.” Le Yisa bei u ke, “A jɔɔ ibamɔn.”

⁴⁴ Ki nan gbiɛ lig upii nmɔn, le ki bei Simɔnn ke, “A kan upii nan waa? Maah kɔɔn a niin nan ŋaa seim nnyum wee n ŋunn n taai, amaa upii nan ma ta u nyinyinn le ki ŋunn n taai, le ki ji ta u yukper ki pir pir n taai.

⁴⁵ Ŋaa poor mi amaa u ma nan sɔɔn le ki poorim n-yonn man wee n kɔɔn a niin nan ki nan kpaa daandaan nan.

⁴⁶ Ŋaa biɛ nug n yukper nkpami amaa upii nan ma faan n taai le tulaali.

⁴⁷ Mambu N beiŋ le, n jiɛn u toonbir takpem ki per wa, ni ma bu li che u bam man takpem. Amaa wan wee n jiɛn u toonbir wama ki per u nan, u mu jiɛm wama le.”

⁴⁸ Le Yisa nan bei upii-n ki ke, “A kan tibir a jiɛn pera.”

⁴⁹ Le bicham ban gur ki nan ka ji nan, nin baan tab ibinbaan ke, “Ŋma sɔɔ, wee hali ki li fir jiɛn tibir ki per aa?”

⁵⁰ Le Yisa bei upii-n ke, “A yada feeŋ gaba. Mambu li chaa nin nposɔɔn na.”