Tibɔnyaan ti Luk ŋmee ti na 24 - UWONBƆR A GBƆNPƆŊ LIKƆƆNL

Nkum a fiim

¹ Nnyantoon a chinchinn a weem daal, kitaayɔg, le bipiibin nan taa tifar tan jɔɔ nbaam wee bi nan ban nin ki jon kukaagin yaan.

² Bi nan tan kan ki miin likaloolin choo loora,

³ amaa baah nan tan kɔɔ-n, baa nan kan Uyudaan Yisa a gbanann ni.

⁴ Baah nan si kaa ji nyi baah tiɛr man nin, le libol nmɔn yaan bijab bilee ban nan yee tiwanpenn tan nyagin nan sir bi ban.

⁵ Le bijawaam nan choo bipiibin le bi gbaan tum ki tibin bi yuli, amaa le bijab bilee nmɔn baan bi ke, “Ba ŋa wee ni be ban wan fo bitakpiib a bol aa?

⁶ Waa be do; u fiiu! Ni li tiɛr waah nan bei ni man, n-yonn man wee u la nan be Galilii ni ban ni:

⁷ ‘Ni kpaa le ke bin ta Uninfosaal a Big ki ŋa tibirdam a nɔɔn, le bi li kpaa u lidapunpunl bu, wee iween itaa daal ke un ji fii nkumin.’ ”

⁸ Le bi nan tiɛr u mɔboi nmɔn.

⁹ Baah nan nyan kukaag nmɔn yaan ki jir kun ni, le bi nan ta ni niɛ biɛn ki bei Itoon piig nin uba-n nin ban biɛn nan be niin ni.

¹⁰ Meri wan nyan Magidalin, nin Joana, nin Meri wan nan ye Jemisi a na nan, nin ban nan be niin kpiɛ-n li nan tan bei Yisa a tooi nmɔn ni niɛ biɛn.

¹¹ Amaa baa nan ŋa bipiibin yada, nan bu-n bi mɔboi nan nann tibɔyɔɔr le bi ban.

¹² Amaa le Piita ma nan fii, ki guun ki jon kukaag nmɔn yaan. Waah nan tan bɔɔn ki ligin, le u kan ki miin kikinkenpeŋ nmɔn a binba li dɔ, le nan nan ŋa-n choo u ligaril, le u labir fɔr niin.

Emausi a sam bu a bɔr

¹³ Lidaal nmɔn le bi bilee nan chaa kitiŋ kiba bi yi ki ke Emausi, ki ma nin Jerusalam nan ye maal ilile le.

¹⁴ Bi nan choon ki pag nin tab niwann nan biɛn tun nin bu le.

¹⁵ Baah nan chaa ki pag ni niɛ nan ni, le Yisa tɔɔl nan nan kpiir bi bu ki nan nɔɔ bi chaa;

¹⁶ amaa Uwonbɔr kaa nan wonn bi num wee bi biɛ wi.

¹⁷ Le u baan bi ke, “Ni choon ki pag baa a bɔr aa?” Le bi baan sir, le bi num paam bii.

¹⁸ Le bi ni uba, u yinl ye Kileopa, baan u ke, “A ye uchaan le ki be Jerusalam nan ki ma kaa gbir niwann nan tun niin iweehn ilelee nan naa?”

¹⁹ Le u baan ke, “Wan ba ŋaa?” Le bi jiin ke, “Yisa wan nyan Nazarif nan a bɔr, U nan ye ulinlenn le, ke u mɔboi nin u toon jɔɔ npɔɔn Uwonbɔr a nintogil nin bininfob biɛn ban.

²⁰ Le kumanug a yudam nin ti yudam nan ta u ki ŋa bibɔjib a nɔɔn ke bin ji u tibɔr ki ku u, le bi nan kpaa u lidapunpunl bu;

²¹ amaa ti nan jɔɔ tama ke uma yin ŋa nkpenim a manug ki sei Iziral yaab. Amaa baah ŋa u man nmɔn a ween itaa sɔ dinan.

²² Nan ji kpiɛ ye, ti piib biba mu bei ti tibɔr tiba le ti ŋa ti ligaril. Bi jon kukaag nmɔn yaan le kutaayɔg nan,

²³ amaa le baa tan kan u gbanann ni. Bi jirin ki nan bei ti ke, bi tan kan zii le ni ye malakam, le malakam nmɔn ke u be nin u miɛfol.

²⁴ Le ti ni biba jon kukaag nmɔn yaan, ki sin tan kan bipiibin kaah chinn ki bei ti man nin, amaa baa tan kan wi.”

²⁵ Le u bei bi ke, “Ba ŋa ni jɔr man naa, wee kaa ŋa Uwonbɔr a linlem kaah nan pag tibɔr tan nin biɛn yadaa?

²⁶ Naa ye ni kpaa le ke Masiya n ji fala nmɔn, wee ki nan kɔɔ u pagin naa?”

²⁷ Le waah nan piin Moziz a yonn ki tan kpaa Uwonbɔr a Linlemin, le u pag wɔɔn bi nan biɛn nan len nsɔbimin biɛn a poolin ki ta jiin u paam.

²⁸ Tɔ, baah nan tan mal kitinbig kan wee bi chaa-n, le Yisa ŋa ke u yin jo jo le-n.

²⁹ Amaa le bi nan bei u nin inunman ke, “Paar ti ban na, nan bu-n nween lu; le ni nin be nin bɔŋ le.” Le u nan nɔɔ bi ki kɔɔ ki tan be bi ban.

³⁰ Waah nan kal un ji bi ban nin, le u yuur boroboro ki sei Uwonbɔr kunɔɔpoog, le ki nan piin ki war tenn bi.

³¹ Le bi num nin nan wonn le bi biɛ u. Le u bor bi ban,

³² le bi nin bei tab ke, “Waah bi pag nsann ki wɔɔn ti tibɔr tan sɔb Uwonbɔr a gbɔŋin a taai yin, naa bi nann ke nŋmi le be ti sufu ni naa?”

³³ Le bi nan fii weem ki jir Jerusalam. Ki tan kan u tooi piig nin uba-n nin bibam kaah lagin ka,

³⁴ le ki len ke, “Ni ye ibamɔn le! Uyudaau sin fii nkumin na ki ta uba ki wɔɔn Simɔnn na.”

³⁵ Le bininfob bilee-n mu bei bi nan tun nsann, nin baah nan biɛ u, waah nan war boroboro n yonn man ni.

Yisa kaah degir u bɔɔnɔɔb bu man

³⁶ Baah la nan be pag ki jiin man paamin, le Yisa baantɔɔl nan nan sir bi sisiigin ki bei bi ke, “Nposɔɔn li be ni bu.”

³⁷ Le tiwar nin bijawaam choo bi, bi nan tiɛr ke bi kan utakpiir le.

³⁸ Le u baan bi ke, “Ba ŋa wee ni che ni mug naa, ba ŋa wee ni che nbiɛnim be ni ban naa?”

³⁹ Ni lig n nɔɔi nin n taai man. Ni ye nbaantɔɔl le! Ni maam wee ki lig; U takpiir kaa jɔɔ tigbanann nin ikpab ke naah kam wee n jɔɔ man nan ni.”

⁴⁰ Waah nan pag man ki diɛ le u wɔɔn bi u nɔɔi nin u taai.

⁴¹ Baah kaa la nan ŋa yada npopeen nin ligaril bu-n, le u nan baan bi ke, “Ni jɔɔ tijiir doo ni ji?”

⁴² Le bi yuur ujan ŋaakaa a wangenl ki ta sei u,

⁴³ le u gaa ki ŋman bi num min.

⁴⁴ Le ki bei bi ke, “Ni niɛ nan le n nan bei ni maah la nan be ni ban nin: Ni kpa le ke nan biɛn nan sɔb Moziz a siimin nin Bilinlem nin Ilan a gbɔŋin ni, ye nin gbeen le.”

⁴⁵ Le u nan loor bi potiɛl ke bin biɛ nan sɔb Uwonbɔr a mɔleen yin a taai.

⁴⁶ Le u bei ke: “Nan wee bi nan sɔb sɔ: Masiya-n li ji fala ki fii nkumin iween itaa daal,

⁴⁷ le nbinben a kpenim nin tibir a jiɛn per li mɔɔn u yinl bu ki piin Jerusalam ki sei ibol biɛn.

⁴⁸ Nim li ye ni niɛ nan a siɛradam.

⁴⁹ N yin sei ni nan wee n Baa nan siin limɔsiinl ke u li sei ni-n le; amaa ni laa nya kitiŋin yaan ni, ki li guu n-yonn man wee npɔɔn na li nya paab ki jiirin ki nan piin ni bu.

Uwonbɔr kaah ta Yisa don paab man

⁵⁰ Waah nan ta bi ki nyan kitiŋ nmɔn yaan ki tan mal Betani, le u nan don u nɔɔi paab ki kaab jaa bi bu.

⁵¹ Waah nan be kaab ki jaar bi bu-n, le u nan fɔr ki jiɛn bi le Uwonbɔr nan yuur u ki don paab.

⁵² Le bi nan jiɛ u ki jir Jerusalam ni npopeen takpem

⁵³ le bi nan be iwonjiɛn niin iyoo biɛn, ki donn Uwonbɔr a yinl.