Tibɔnyaan ti Luk ŋmee ti na 22 - UWONBƆR A GBƆNPƆŊ LIKƆƆNL

Baah nan lolig bin ku Yisa man

¹ Le ni nan nan mal nin bin ji ki chiig kan wee bi ŋma boroboro kan kaa jɔɔ nnyɔg wee bi yi ke yuglagir a chiigin,

² le Uwonbɔr a minmanib a yudam nin ban wɔɔnn nsiimin nan lolig baah li ŋa man ki ku Yisa, nan bu-n bi nan san bininfobin le bijawaam.

Judasi kaah nan chee ki kɔɔr Yisa man

³ Le Sintani nan kɔɔ Judasi wan wee bi yi u ke, Isikariya nan, wee u nan kpiɛ Yisa a tooi piig nin bilee-n yaan nin.

⁴ Le Judasi nan jon ki tan pag nin biminmanib a yudam nin Iwonjiɛn niin a guguub waah li kɔɔr Yisa man.

⁵ Bi nan jɔɔ npopeen le ki chee ke bi li yɔ u ilig.

⁶ Le u nan chee, ki ni nan piin ki ban isan yan wee u li nɔɔ ki taah Yisa ki ŋubin bi nɔɔn, wee bininfob laa be niin ni.

Yisa kaah nan ŋa sili nin u ji yuglagir a jiir man

⁷ Boroboro kan kaa jɔɔ nnyɔg a ji daal lan wee bi nan yin ta kipeebig ki mann kumanugin nan nan foo.

⁸ Le Yisa nan tun Piita nin Jɔnn kitiŋ nmɔn yaan, ki bei bi ke, “Ni li chaa ki tan ŋa sili wee ti ji yuglagir a jiir.”

⁹ Le bi baan u ke, “La ban wee a ban ti tan ŋa silii?”

¹⁰ Le u bei bi ke, “Ni kɔɔ kitiŋ nmɔn yaan ke, uja uba li to ni nsan bu ki tu linyunbool. Ni li nɔɔ u ki chaa iniin yan yaan wee u ta yin kɔɔ-n,

¹¹ ki bei uniindaan nin ke, ‘wan wɔɔnn ke ti baaŋ: Bi cham a diigin ye kula wee min nin n bɔɔnɔɔbin kɔɔ ki ji Yuglagir a jiir aa?’

¹² U li wɔɔn ni paab a diig kan yab ki jɔɔ ijal. Ni ŋaam sili niin.”

¹³ Le bi nan jon ki sin tan kan tiwann biɛn tan wee Yisa bei bi-n. Le bi nan ŋa Yuglagir a jiir.

Uyudaan a nyiɛg a jiir

¹⁴ Isaŋ nmɔn kaah nan nan foo-n, le Yisa nin u tooi kal bin ji.

¹⁵ Le u bei ke, “N ban ni le nin linunmanl min nin nim nlagin ki ji Yuglagir a jiir wee n nin ji fala.

¹⁶ Nan bu-n n bei ni le, maa ji li ji tijiir nmɔn ni hali nin taah na li kan ngbeem Uwonbɔr a naamin.”

¹⁷ Waah nan yuur kiyiinyɔɔgin, le u sei Uwonbɔr kunɔɔpoog le ki ke, “Gaam ni nan ki por sei tab.

¹⁸ Nan bu-n n bei ni le ke maa ji li nyu isiloon nan a daami hali nin Uwonbɔr a naamin kaah na li foon.

¹⁹ Le ki nan yuur boroboro, ki sei Uwonbɔr kunɔɔpoog, ki war war sei bi, ki ke “N gbanann le n jɔɔ tenn ni nan; ni li ŋaan man na, wee ki li tiɛr nbu.”

²⁰ Baah ji nan jin kunyiɛg a jiir ki diɛ a bɔɔn le u ji yuur kiyiinyɔɔgin, ki ke, “Kiyiinyɔɔg nan li ye Uwonbɔr a poopɔnn tan be n chamin, ki kpaar sei ni nan.

²¹ Amaa n nɔɔ nin wan yin kɔɔrim a nɔɔ li lagin ki bɔr kisaŋin ki ji nan.

²² Uninfosaal a Big li kpo ke naah pii nan siin man nin, amaa tibɔbir li be wan kɔɔr win bu.”

²³ Le bi nan piin ki baan tab wan li tun man.

Limɔkpel ki ta jiin wan jon u kpiɛg paam

²⁴ Le limɔkpel ji nan dan u bɔɔnɔɔb a sisiigin bi wan jon u kpiɛg.

²⁵ Le Yisa nan bei bi ke, ban kaa ye Juu yaab a bɔrtiib jɔɔ bi naamin mugir bininfob le; le ban jɔɔ tininkper a pɔɔm ki jon dulinya nan yaab yi biba Bititerib.

²⁶ Amaa nim kaa ye ni li be man ni. Wan jon ni biɛn nan, ye u li be le ke wan ye ni biɛn a bigin, le wan ye uyudaan li be ke utoontunn nin.

²⁷ Nan bu-n wan ka ji tijiir nin wan tol tijiir, ŋma ye uninkpel laa? Naa ye wan ka ki ji-n naa? Amaa n be ni sisiigin le ki nann utoontunn wan tol tijiirin.

²⁸ Nim li ye ban nan si n chaŋ n fala a jimin.

²⁹ N Baa Uwonbɔr kaah jim nnaam man nin, mu yaa naam le n yin jin ni mu,

³⁰ wee ni li fir ji ki nyu n ban n naamin, ki nan kal tinaangbann bu ki ji Iziral yaab a bol piig nin ilee-n tibɔr.”

Yisa nan bugir Piita kaah na li niɛ u man

³¹ Le Yisa len ke, “Simɔnn, Simɔnn, lig, bi tunn Sintani le ke un nan lenn ni ke idi-n.

³² Amaa n miɛ Uwonbɔr, fin Simɔnn bu, ke a wonjiɛnl laa jiir tumi. Le a jirin n ban ke, a pɔɔg a nabum a gbanann na.”

³³ Amaa le Piita jiin ke, “Uyudaan, n ŋa sili nin n nɔɔŋ ki kɔɔ kuloondiigin bee nkumin na.”

³⁴ Le Yisa jiin ke, “N beiŋ le, Piita, kunyiɛg nan, ukooja kaa laa yin mɔɔ le a niɛ nfimitaa ke ŋa nyimi.”

Kiligbɔɔlig, bee lipɔgil, bee takoobi a bɔr

³⁵ Le Yisa nan baan bi ke, “Maah nan tun ni wee kaa sei ni kiligbɔɔlig bee lipɔgil bee inaatag, niba nan par ni waa?” Le bi jiin ke, “Naa nan par kolibi.”

³⁶ Le u bei bi ke, “Amaa daandaan nan ni ye wan jɔɔ kiligbɔɔlig bee lipɔgil ke, un yuura; le ni ye wan kaa jɔɔ takoobi ke, un kɔɔr u daala ki daa ki bau.

³⁷ Ni sɔb Uwonbɔr a gbɔŋin ke: ‘Bi kan u kpiɛ titoonbirdamin na’; le n bei ni le ke ni na li gbeen n ni. Nn, nan pii nan sɔb ki ta jiin n bu-n mal nin gbeen na.”

³⁸ Le u bɔɔnɔɔbin ke, “Uyudaan, lig, takoobi bilee sɔ.” Le u jiin ke, “Ni li kpaan.”

Yisa kaah miɛ Uwonbɔr Olif a jɔɔl a paab man

³⁹ Le Yisa nan nyan ki jon Olif a Jɔɔl a paab, ke waah pii ti ŋaan man nin, le u bɔɔnɔɔb nɔɔ u.

⁴⁰ Waah nan tan foo niin nin, le u bei bi ke, “Ni miɛ Uwonbɔr wee ki laa kɔɔ libiginlin ni.”

⁴¹ Le ki nan fɔɔr bi ban ki jon wama le ki tan gbaan tum ki miɛ Uwonbɔr,

⁴² ki ke, “N Baa, ni ye a bam ke, a laa che n nyu kiyiinyɔɔg nan yaan ni, ki mu laa ye min a bami, amaa ni li ye a yaa bam.”

⁴³ Le malaka nan nyan paab ki jiirin u bu ki pɔɔg u gbanann.

⁴⁴ Le waah nan be nton ni bu le u miɛ Uwonbɔr nin u pɔɔm biɛn. Le kutuntoŋ nan pɔɔ u bu ki nann ncham ki too tum.

⁴⁵ Le u nan fii liwonmiɛlin ki jir u bɔɔnɔɔb ban, ki miin bi dɔ jiɛn le, ki gbarig nin npoobiin.

⁴⁶ Le u baan bi ke, “Ba ŋa wee ni dɔ jiɛn naa? Ni fiim ki miɛ Uwonbɔr wee ki laa nan kɔɔ libiginl nan yaan ni.”

Baah choo Yisa man

⁴⁷ Waah nan be ki pag nin u bɔɔnɔɔbin, le bi kan kuninfogbaluŋ chaan. Le Judasi wan nan ye u tooi piig nin bilee-n a ni uba, nan lii bi sam, le ki nan fɔɔr mal Yisa ke un poor u,

⁴⁸ amaa le Yisa baan u, “Judasi a dan a nan kɔɔr Uninfosaal a Big le nin ipooraa?”

⁴⁹ Yisa a bɔɔnɔɔbin kaah nan biɛ nan yin tun nin, le bi ke, “Uyudaan, ti ta ti takoobim ki li gaar bi waa?”

⁵⁰ Le bi ni uba gaa kumanug a yudaau a toontunnu a nɔɔjiim a tul ki par.

⁵¹ Amaa le Yisa jiin ke, “Ni laa ji ŋa man ni!” Le ki maa uja-n a tul le li jir ki tabin.

⁵² Le Yisa baan kumanug a ninkpeebin nin Iwonjiɛn niin a guguub nin Juu yaab a ninkpeeb ban dan bin nan choo win ke, “N lii ban kɔnn nin bininkpeeb a sam le ni dan nin tijukpar nin njubum aa?

⁵³ N nan be nin ni le idaa biɛn iwonjiɛn niin, le naa ta ni nɔɔ ki ma mi. Amaa iyoo nan le ye ni yonni, n-yonn man wee libunbɔnl a pɔɔm ŋmag dulinya nan.”

Piita kaah niɛ ke waa nyi Yisa man

⁵⁴ Le bi nan choo u, ki ta u jon kumanug a ninkpelu a niin. Le Piita nan tan be bɔɔn ki nɔɔ u chaa.

⁵⁵ Amaa baah nan tan nyɔɔ nŋmi nlosisiigin ki nan lagin ka worin, le Piita nan kal kpiɛ bi bu.

⁵⁶ Le kitoontun bisiɛg kiba nan kan Piita kaah ka kuŋmiweeŋ nmɔn yaan. Le ki lig u chimm ki nan ke, “Uja nan ti be u ban.”

⁵⁷ Amaa le u niɛ. Ki ke, “Upii, maa nyi wi.”

⁵⁸ Le naa kan yuuri le uba mu kan u le ki ke, “A mu ye bi ni uba le.” Le Piita jiin ke, “Aai, uja nan, maa ye bi ni uba.”

⁵⁹ Le kukurug kuba a bɔɔn le uba ji pag kpiɛ ke, “Ibamɔn buu uninfo nan ti be u ban le, nan bu-n u nyan Galilii le.”

⁶⁰ Le Piita jiin ke, “Uja nan, maah nyi nan wee a pag nan ni!” Waah nan be pag man nin le ukooja mɔɔ.

⁶¹ Le Uyudaan gbiɛ lig Piita chimm. Le Piita nan tiɛr limɔbonl lan wee Uyudaan nan pag sei win: “Kunyiɛg nan, ukooja kaa la yin mɔɔ le a niɛ nfimitaa ke ŋaa nyi mi.”

⁶² Le Piita labir ki nyan nkaafiin ki tan mɔɔ nbirim.

Baah nan daar Yisa nyɔɔrug ki boo u man

⁶³ Bijab ban nan guu Yisa nan, nan piin ki daar u nyɔɔrug ki boo u.

⁶⁴ Bi nan piin u num le ki ji baan u ke, “Bugira, ŋma fa ŋaa?”

⁶⁵ Le bi ji nan pag tisugir a leen takpem ki sei u.

Yisa kaah be Juu yaab a ninkpeeb a nintogil man

⁶⁶ Naah nan won kutaag njakpanyiɛn le Juu yaab a ninkpeeb nin kumanug a yudam nin ban wɔɔnn Uwonbɔr a siim lagin, le bi taa Yisa jon bi nintogil.

⁶⁷ Le bi ke, “Ni ye fin li ye Masiya ke, bei ti ni.” Le Yisa jiin ke, “Ni ye n bei ni ke, naa li ŋaam yada,

⁶⁸ le n baan ni ke naa li jiin ni.”

⁶⁹ Amaa daandaan nan ki jɔɔ chaa, Uninfosaal a Big li kal npɔɔndaan Uwonbɔr a nɔɔjiim paam.”

⁷⁰ Le bi biɛn baan, “A nin ye Uwonbɔr a Bija lee?” Le u jiin ke, “Ni jɔɔ ibamɔn naah len ke min li ye-n.”

⁷¹ Le bi ke, “Ti ji ban siɛra ba buu? Ti pii gbir tibɔr nmɔn u tɔɔl a mɔboi yin na.”