Tibɔnyaan ti Luk ŋmee ti na 18 - UWONBƆR A GBƆNPƆŊ LIKƆƆNL

Lipukɔɔl nin ubɔjir a bɔŋal

¹ Le Yisa gaa u bɔɔnɔɔb libɔŋal ki wɔɔn bi ke li ŋan ni bi li miɛ Uwonbɔr iyoo biɛn, wee ki laa bagir ki ta jiɛn ni.

² Le ki ke, “Ubɔjir uba le nan be kitiŋ kiba ni le kaa san Uwonbɔr le u baga mu kaa be bininfob ni.

³ Lipukɔɔl mu nan be kitiŋ nmɔn yaan, ki gbaa chaan u ban ki nan bei u ke ‘Seim ibamɔn ni, wee n nya kidataag kan mugirim nan a nɔɔn.’

⁴ “Iyonn iba u nan ti yiin le. Ni bɔɔn bu, le u nan tiɛr ke, ‘Hali maah kaa le san Uwonbɔr wee n baga kaa be bininfobin ni,

⁵ amaa lipukɔɔl nan kaah chaan ki nan mugirim iyoo biɛn nan see ke n sei u ibamɔn, wee u fɔɔr ki sin jiɛnim ke n miɛl fa wa.’ ”

⁶ Le Uyudaan len ke, “Ni pel ubɔjir wan kaa ye ubamɔndaan nan kaah len man.

⁷ Ke Uwonbɔr kaa li sei u ninfogann kaab ban miɛ u nween nin kunyiɛgin ibamɔn naa? U li yii baa?

⁸ “N bei ni le, u yin sei bi ibamɔn le weem. Amaa Uninfosaal a Big nan foon n-yonn man ke u li kan yada daam kutingbɔŋ nan yaan naa?”

Farasii nin ulanpogaar a bɔr

⁹ Le Yisa gaa libɔŋal ki sei ban tiɛr ke bi ma ye bibuchim ki jon bininfob biɛn nan ke:

¹⁰ “Bijab bilee le nan tan kɔɔ iwonjiɛn niin ke bin miɛ Uwonbɔr, uba nan ye, Farasii le wan gurin mu ye ulanpogaar.

¹¹ Le Farasii nmɔn sir ki miɛ u tɔɔl a miɛm ke: ‘Uwonbɔr, n pooriŋ, maah kaa nann n tab ban ye, ban feen, ban ŋaan tibir, ban tun iwanchɔgin toon, bee ulanpogaar nan ni.

¹² N lolig bimɔb itaa ilee le iweehn ilile a poolin. Maah jɔɔ nan biɛn piig a poolin, n nyan liba le ki sei Uwonbɔr.’

¹³ “Le ulanpogaarin ma sir dindanl kaa chee un waan lig paabi. Le ki tibin u yul ki ke, ‘Uwonbɔr, sam min tibirdaan kunyunyunbaag ni.’ ”

¹⁴ Le Yisa ji mann bei bi ke, “N bei ni le nan, ulanpogaar n-yaa miɛm le Uwonbɔr nan chee le u nan kun, amaa naa ye Farasii a ninfou n ni. Uninfo wan biɛn don uba paab nan, le Uwonbɔr yin jiin u tum, le wan mu jiin uba tum nan, le Uwonbɔr yin don u paab.”

Yisa kaah nan kaab jaa nbuwaab finfim bu man

¹⁵ Bininfob nan jɔɔ nbuwaab finfim le chaan Yisa ban ke un ta u nɔɔ ki paan bi bu. U bɔɔnɔɔbin kaah kan man ni; le bi fuun bi bu.

¹⁶ Amaa le Yisa yin nbuwaabin ke bin dan u ban, le ki ke, “Ni che nbuwaab finfim nmɔn dan n ban, ki laa ŋɔɔ bi, nan bu-n Uwonbɔr a naamin ye bi yaa bosu nan yaan le.

¹⁷ N bei ni ibamɔn le, uninfo wan kaa chee un gaa Uwonbɔr a naamin ke kibig finfiŋ ke, waa yin kɔɔ u naam nmɔn yaan ni.”

Ujɔɔndaan a bɔr

¹⁸ Uninkpel uba nan baan Yisa ke, “Wan wɔɔn ki ŋan, n yin ŋa nii wee ki nan kan limiɛl lan kaa jɔɔ ndiɛm maa?”

¹⁹ Le Yisa jiin ki baan u ke, “Ba ŋa wee a yim wan ŋan naa?” “Uninfo ŋan kaa be see Uwonbɔr a binba.

²⁰ A nyi nsiimin: ‘Laa tun iwanchɔgin toon ni, laa ku uninfo, laa su, laa ji tibɔr kaar ki siɛra, ŋa jilima ki sei a baa nin a na.’ ”

²¹ Le uja nmɔn jiin ki bei u ke, “N pii ŋmag ni niɛ nan biɛn le nbuwaan nin na.”

²² Yisa kaah nan gbir man ni, le u bei u ke, “Niba le laa pariŋ. Kɔɔr tiwann tan biɛn wee a jɔɔ-n na, wee ki ta sei faladama, wee ki li jɔɔ lifaal paab wee ki dan ki nan nɔɔm.”

²³ Waah nan gbir man ni, le u sufu bii, nan bu-n u nan ye uja wan jɔɔ lifaal le takpem.

²⁴ Le Yisa lig u ki len ke, “Naah pɔɔ man ki sei nin bijɔɔndam nkɔɔ Uwonbɔr a naamin!

²⁵ Ibamɔn, alakoomi kaah li kuur siɛrig a bonlin kaa pɔɔ foo nin ujɔɔndaan n fir kɔɔ Uwonbɔr a naamin ni.”

²⁶ Ban nan gbir man nin nan baan ke, “Ŋma ni li fir ŋmaraa?”

²⁷ Le Yisa jiin ke, “Nan pɔɔ uninfosaal ban ni kaa pɔɔ Uwonbɔr ban ni.”

²⁸ Le Piita bei u ke, “Lig tim jiɛn nan biɛn wee ti jɔɔ-n le ki nɔɔŋ!”

²⁹ Le Yisa bei bi ke, “N bei ni ibamɔn le,” “Uba kaa be wee ki jiɛn u niin bee u poo, bee u baa, bee u na, bee u kpetiib, bee u watiib, Uwonbɔr a naamin bu,

³⁰ wee ki laa kan limiɛfol takpem lan kaa jɔɔ ndiɛm n-yonn nan yaan nin iyoo yan chaan nan ni.”

Yisa kaah nan pag u kum a bɔr ki kpiɛ nfim mitaa man

³¹ Le Yisa nan yin u bɔɔnɔɔb piig nin bilee-n ki nyan ngbaan ki tan bei bi ke, “Ti chaa do Jerusalam le nan, le niwann nan biɛn wee Bilinlemin nan sɔb ki jiin min Uninfosaal a Bigin paamin li gbeen.

³² Bi na li taa u ki sei ban kaa ye Juu yaabin. Bi na li daar u nyɔɔrug, ki sugir u, ki siin timɔsann ki jaar u bu, ki fiɛb u ki nan ku u.

³³ Le ni ween itaa daal u li fii nkumin.”

³⁴ U bɔɔnɔɔb nmɔn kaa nan biɛ u bɔr nmɔn a taai kolibi. Bi nan woon ni taai le bi ban, le baa nan biɛ Yisa kaah nan pag jiin nan paami.

Yisa kaah nan ligir ujɔɔn wan miɛ man

³⁵ Yisa kaah nan tan mal Jeriko a tiŋin nan, le ujɔɔn uba nan ka nsangbaan ki miɛ.

³⁶ Waah nan gbir bininfob takpem kaah choon ni, le u baan nan ŋaan.

³⁷ Le bi bei u ke, “Yisa wan ye Nazarif a ninfo win le chaa jo.”

³⁸ Le u yin nmɔpɔɔn bu ke, “Yisa, Defid a yaabil, sam kunyunyunbaag ni!”

³⁹ Le bininfob ban nan lii Yisa a samin tiɛn u bu ke un ŋmin ma, amaa le u mann ki yin nmɔpɔɔn ke, “Defid a yaabil, sam kunyunyunbaag ni!”

⁴⁰ Le Yisa sir, ki bei bi ke bin dar ujɔɔn nmɔn ki dan u ban ni. Waah nan chaan ki nan mal Yisa ban n-yonn man ni, le Yisa baan u ke,

⁴¹ “A ban n tun baa ki sei ŋaa?” Le u jiin bei Yisa ke, “U yudaau, n ban n ligir le,”

⁴² Le Yisa bei u ke, “Ligira; a yada tebiŋa.”

⁴³ Libol nmɔn le u numbili ligir le u nɔɔ Yisa, ki donn Uwonbɔr a yinl. Bininfobin biɛn kaah nan kan man nin, le bi mu nan pag Uwonbɔr.