Tibɔnyaan ti Luk ŋmee ti na 15 - UWONBƆR A GBƆNPƆŊ LIKƆƆNL

Upee wan bor nan a bɔr

¹ Bilanpogaab nin “titoonbirdam” takpem nan lagin Yisa ban ke bi nan pel u bɔr.

² Amaa le Farasii yaab nin ban wɔɔnn nsiim ŋulin ki ke, “Uja nan gaan titoonbirdam le ki ji bi ban.”

³ Le Yisa nan gaa bi libɔŋal nan:

⁴ “Ni ye ni ni uba jɔɔ ipee kobig wee upee uba bor ke, waah li jiɛn piwiɛ nin iwiɛn kulɔŋ ki tan ban uba-n hali nin waah na li kan waa?

⁵ U nan kan u ke, u li ta u ki paan u bɔsiper bu nin npopeen,

⁶ ki ta u kun iniin. Le ki nin yin u jɔtiib nin u kunkɔɔn tab ki lagin tab ki bei bi ke, ‘N peeu wan nan borin, n kan wa, che ti li jɔɔ npopeen na man.’

⁷ N bei ni le ke ni ye man le, ni ye ke titoonbir daan uba kpenn u binbem ke npopeen takpem li be paab ki jon bibuchim piwiɛ nin biwiɛ ban wee naa ji kpaa talar nin bin kpenn bi binbem nan buu.”

Nligibim man bor nan a bɔr

⁸ “Ni ye upii uba mu jɔɔ nligibim piig, wee nba bor ke, waa li nyɔɔ fila ki tigin u diig nbamɔm nin waah na li kan maa?

⁹ Ni ye u kan mi ke, u yin yin u jɔtiib le nin u kunkɔɔn tab ki lagin tab ki bei bi ke, ‘N kan nligibim man nan borin na, ni che ti li jɔɔ npopeen na man.’

¹⁰ Ni ye man le, n bei ni le, npopeen be Uwonbɔr a malakam ban ni ye tibirdaan uba nan kpenn u binbem ke.”

Kibijag kan bor

¹¹ Le Yisa ji tugir ki ke: “Uja uba le nan jɔɔ nbijabum milee.

¹² Le wan ye kibigin nan bei u baa ke, “N baa, n ban a ta lifaal lan wee n na yin ga-n le ki seim; le u baa por lifaal nmɔn ki sei u.

¹³ “Naa nan yuuri, le kibigin ta u faalin ki yaar jon kitiŋ kan fɔgin. Le ki jin u ligin nmɔn yɔli yɔli le i biɛn diɛ.

¹⁴ Iligin biɛn kaah diɛ n-yonn man ni, le nkom lu kitiŋ nmɔn yaan takpem, le u nin piin ki ye wan chonn miɛ.

¹⁵ Le u nan jon ki tan ta uba ki sei kitiŋ nmɔn yaan a ninfou uba, le u ta u ŋa u kpaab ban yaan wee u goon idoolin, ke u li ŋaan idool nmɔn tijiir.

¹⁶ U ni nan ban un ji idool a jiirin le ki gbeen u pool, amaa uba kaa nan sei u niba.

¹⁷ “U lam kaah nan nan jirin ni le u baan uba ke, ‘N baa a toontum be bi ŋaa ki ji tijiir ki gbeeg ki sin gur, wee nkom yin ku min doo!

¹⁸ N li jir kun n baa a niin, ki tan bei u ke: N baa, n galin paab ki ji galin a muu.

¹⁹ Maa ji kpaan nin a yim a bija; ŋaam a toontumin a ni uba u.’

²⁰ Le u nan fii ki jir kun u baa ban. “Waah laa nan be nan fɔg ki chaa kun nin, le u baa kan u, le kunyunyunbaag choo u takpem, le u guun ki too u nsanbu ki tan bib u ki poor u.

²¹ “Le kibigin bei u baa ke, ‘N baa, n galin paab ki ji galin a muu. Maa ji kpaan nin a yim a bija.’

²² “Amaa le u baa bei u toontumin ke, ‘Ni ŋaam weem ki yuur daala ŋaŋ ki yeen mu, ki ta kigbiɛŋ ki yee u nɔɔbila, ki tagin u inaataga.

²³ Wee ni taan kinaajakpamigin ki ku ka. Ni che ti ŋa tijiir ki ji kunaachuŋ.

²⁴ Nan bu-n n big nan nan kpo le ki ji jirin nin limiɛfol; u nan bora le n ji nan kan u.’ Le bi piin kunaachuŋ a jim.

²⁵ “Ki miin u bija uninkpelin laa nan be bukpaabin. Waah nan nan mal iniin ni, le u gbir ilan nin kiwaag.

²⁶ Le u yin utoontunn uba ki nan baan u nan ŋaan iniin.

²⁷ Le u jiin ke, ‘A waalin le kun, le a baa che bi ku kinaajakpamigin waah foon kaa kan kidaŋ kiba ki jɔɔ npotiɛŋamin bu.’

²⁸ “Le u kpelin a ŋuul nan fii le u yii nloob a kɔɔm. Le u baa nyan ki nan balin u.

²⁹ Amaa le u jiin bei u baa ke, ‘Lig! Min le bɔɔ koŋ ibin nan biɛn le kaa la nyi yii a mɔbi. Amaa ŋaa la nyi ki ta kiŋɔɔbig ki seim ke n ku ki yin njɔtiib wee ti ji kunaachuŋi.

³⁰ Amaa a bija wan bii a faal biɛn, ki choon nɔɔ ipiijagɔɔr kaah nan kunn ni, le a ku kinaajakpamig ki sei u!’

³¹ “Le u baa bei u ke, ‘N big, fin le be n ban le iyoo biɛn; le nan biɛn wee n jɔɔ, ye a yaal le.

³² Amaa ni ye ti ji kunaachuŋ le ki li jɔɔ npopeen, nan bu-n a waal nan nan kpo le, amaa le ki ji jirin u miɛfolin, u nan bora, le ti ji nan kan u.’ ”