Lituln 9 - UWONBƆR A GBƆNPƆŊ LIKƆƆNL

Sɔɔl kaah kpenn u binbem man

¹ Sɔɔl le la nan ŋma tijar le ki ke u li ku Yisa a bɔɔnɔɔb. Le ki jon biminmanib a yudaau ban,

² ke un gaa tigbann ki jo Damasiko a wonjiɛndirin ki tan choo ban nɔɔ Yisa a samin bijab nin bipiib ki ta bi jirin Jerusalam ki nan ŋa bi kuloondiigin.

³ N-yonn man wee u nan chaa ki tan mal Damasiko nan, le nwonween nyan paab, ki jiirin ki nan wonn ki linn u.

⁴ Le u nyiɛr lu tum, ki gbir likukɔl yi u ke, “Sɔɔl Sɔɔl, ba ŋa wee a mugirim man naa?”

⁵ Le Sɔɔl baan u ke, “Uyudaan a ye ŋmiɛ?” Le likukɔlin jiin ke, “Min le ye Yisa wan wee a mugirin.

⁶ Daandaan nan fiim ki li chaa kitiŋ nmɔn yaan na, bi li beiŋ nan kpaa talar wee a ŋa.”

⁷ Iyaayoo nmɔn le bijab ban chiɛn Sɔɔl nan, nan paar sir soon kaa ji pagi. Bi nan gbir likukɔl kaah paga, amaa le kaa kan wan pagi.

⁸ Le Sɔɔl nan nan fii paab, ki ligir u numbili, amaa le kaa ji ga ni ba. Le bi nan da u nɔɔ ki ta u jon Damasiko.

⁹ Iweehn itaa waa nan ga, kaa jin ni, kaa nyun mu.

¹⁰ Yisa a bɔɔnɔɔru uba nan be Damasiko nmɔn yaan, bi nan yi u ke Ananiɛsi. Le uyudaan yin u zii a poolin le ki bei u ke, “Ananiɛsi!” Le u jiin ke, “Min sɔ, n Yudaau.”

¹¹ Le Uyudaan bei u ke, “Fiim ki li chaa ki tan nɔɔ nsan man tel ki chaa Judasi a niin ni, ki baan uja wan nyan Tarsusi, wee u yinl ye Sɔɔl nbu. Lig, daandaan nan u be miɛ Uwonbɔr le.

¹² Le ki kan uja uba zii nin, wan a yinl ye Ananiɛsi, le u kɔɔn ki ta u nɔɔi ki paan u bu, ke un ligir.”

¹³ Le Ananiɛsi jiin ke, “Uyudaan, bininfob takpem le pag uja nmɔn bu, ki jiin niwann nan biɛn wee u tun ki jin a tɔɔl a ninfob fala Jerusalam man.”

¹⁴ Le u dan nan do nin tininkper a pɔɔm man wee u gaa biminmanib a yudam ban nin, ke un nan choo ban biɛn yi a yinl.”

¹⁵ Amaa le Uyudaan bei u ke, “Fin li chaau, uma ye wan wee N gann u ke un mɔɔn N yinl ki bei ban kaa ye Juu yaab nin bi bɔrtiib nin Juu yaab.

¹⁶ N li wɔɔn u naah kpaa talar nin un ji fala N yinlin bu man.”

¹⁷ Le Ananiɛsi nan jon ki tan kɔɔ iniin nmɔn yaan, ki ta u nɔɔi ki paan Sɔɔl bu, le ki bei u ke, “N nabig Sɔɔl, n Yudaau Yisa wan degir a bu nsan n-yonn man wee a nan chaan do nan ni, u ma tunim ke n nan ligir a num wee a gbee nin Kasi a Naaŋ.”

¹⁸ Libol nmɔn, le niba nyan u numbili yin ki lu, ki nann tijanpɔgir, le u ligir ki fii sir, le bi fun u Uwonbɔr a nyunful,

¹⁹ le u jin tijiir le ki kan npɔɔn. Iyaayoo le Sɔɔl nan lagin be nin Yisa a bɔɔnɔɔbin iweehn ilee Damasiko.

Sɔɔl kaah mɔɔn Yisa a bɔŋann Damasiko man

²⁰ Libol nmɔn le u piin ki mɔɔn Yisa a bɔr tiwonjiɛndirin, ke Yisa ye Uwonbɔr a Big le.

²¹ Ban biɛn nan gbir u mɔɔn ni nmɔn, ni nan gar bi le, le bi baan ke, Uja nan le kaa nan ku ban yi Yisa a yinl Jerusalam nnaa? Waah yaan ti dan le ke un nan choo Yisa a bɔɔnɔɔb ki lol bi ki ta bi jir tan sei kumanug a yudam lee?”

²² Le Sɔɔl a mɔɔni nmɔn nan mann ki kpiɛ nin Uwonbɔr a pɔɔm, le u bɔr nmɔn wɔɔn ke Yisa sin ye Masiya le, le Juu yaab ban be Damasiko nan a potiɛl nan ŋmarin.

²³ Ni bɔɔn bu, le Juu yaab nan lagin tab ki lol ke bin ku Sɔɔl,

²⁴ nween nin kunyiɛg ke bi guu kitiŋ nmɔn a timansanmɔnn le nbamɔm ke bin ku u. Le u biɛ baah lolig u bu man.

²⁵ Kitiŋ nmɔn a gonl nan jɔɔ libonl. Le Sɔɔl a bɔɔnɔɔb yuur u kunyiɛg ki ŋa kukachiɛg takpeŋin, ki ta u nyan kitiŋ nmɔn a gonl a bonlin yaan.

Sɔɔl kaah be Jerusalam man

²⁶ Le Sɔɔl jon Jerusalam ki tan pɔɔn u ba ke un lagin nin Yisa a bɔɔnɔɔb, le baa ŋa u yada ke u ye u bɔɔnɔɔri ki san u bijawaam.

²⁷ Amaa le Banabasi dan ki nan ta u jon Yisa a toon-yin ban. Ki bei bi Sɔɔl kaah nan kan Uyudaan nsan bu man, nin Uyudaan kaah nan pag sei u man, nin Sɔɔl kaah nan mɔɔn Yisa a yinl nin lipoobil man Damasiko a tiŋin.

²⁸ Le Sɔɔl lagin be nin bi ki choon u wiib ki gɔnn Jerusalam, ki mɔɔn Uyudaan a yinl nin lipoobil.

²⁹ U ma nin Juu yaab ban pag Girig a leen yin nan fa limɔkpel le, mambu le bi nan ban baah li ŋa man ki ku u.

³⁰ N-yonn man wee n nabumin nan nan biɛ man ni, le bi ta Sɔɔl jon Sizariya a tiŋin, le ki che u kun Tarsusi.

³¹ Judiya nin Galilii nin Samariya a wonjiɛm a laguŋ kan nposɔɔn n-yonn nmɔn. Kasi a Naaŋ a teril bu le bi kan ngbanann pɔɔn, le bi kanl kpiɛ, le ki be ki san Uyudaan.

Piita kaah nan be Liida nin Jopa a timin man

³² Piita kaah nan choon jin kutingbɔŋin, le ki nan nan jon un tan gɔnn Uwonbɔr a ninfo gann kaab ban be Liida a tiŋin ni.

³³ Nin yaan le u nan tan kan uja uba, wan wee bi yi u ke Aniɛsi, wee u ye tigbanann kpiindaan nin, wee u nan dɔɔn u wan dɔɔn waŋ bu ki tan kpaa ibin iniin nin.

³⁴ Le Piita bei u ke, “Aniɛsi, Yisa che a kan kutebuga, fiiu ki kpab a wan dɔɔn waŋa.” Libol nmɔn yaan le Aniɛsi fii.

³⁵ Le bininfob ban biɛn nan be Liida a tiŋin nin Saron a yagil nan kan u, le ki kpenn bi binbem ki ŋa Uyudaan yada.

³⁶ Upii wonjiɛn uba mu nan be Jopa, le u yinl ye Tabita, (amaa le Girig a leen yin, bi nan yi u ke Dokasi). U nan tun itoon ŋan le iyoo biɛn ki tenn faladam.

³⁷ Iyaayoo nmɔn le u nan buŋ ki kpo, le bi fun u ki ta u don kudiititɔrug a paab ki tan bil.

³⁸ Jopa nin Liida kaa nan fɔg nin tabi, le Yisa a bɔɔnɔɔb ban be Jopa gbir ke Piita be Liida, le bi tun bijab bilee u ban ke bin tan balin u ke “Ti baliŋ le ŋa weema ki dan!”

³⁹ Le u fii ki nɔɔ bi, waah nan tan foon, le bi ta u ki don paab a diig n-yaan. Le ipukɔɔ yan biɛn nan be kudiig nmɔn yaan fii ki sir gɔɔn Piita ki mɔr, ki ta bi tan nin bi daalam ki wɔɔn u, ki ke, “Dokasi kaah nan be u miɛfolin ki ŋal nan teen ti sɔ.”

⁴⁰ Le Piita nyan bi biɛn kudiig nmɔn yaan; le ki gbaan ki miɛ Uwonbɔr. Le ki nan jir utakpiir n ban, ki yin u, “Tabita, fiiu.” Le u ligir ki kan Piita, le ki fii kal.

⁴¹ Le Piita choo u nɔɔ, ki ter u, le u fii sir. Le u yin biwonjiɛmin nin ipukɔɔ-n, ki ta u ki sei bi, ke u fo.

⁴² Le bininfob ban biɛn nan be Jopa a tiŋin nan gbir tibɔr nmɔn, le bininfob takpem nan ŋa Uyudaan yada.

⁴³ Piita nan paar be Jopa a tiŋin, ki jin isaŋa, un nan be uja wan nan ye ugbanjab n-yaa niin le, wan wee bi yi u ke Simɔnn nin.