Lituln 8 - UWONBƆR A GBƆNPƆŊ LIKƆƆNL

¹ Sɔɔl tɔɔl nan chee Sitifin a kum buu. Lidaal nmɔn le limugil takpenl nan dan biwonjiɛm a laguŋ kan nan be Jerusalam n bu, le bi biɛn nan nyan ki yal jon Judiya nin Samariya a tinbumin, ki jiɛn Yisa a toon n yaa binba nin yaan.

Sɔɔl kaah nan mugir biwonjiɛm a laguŋ man

² Le bininfob ban san Uwonbɔr nan ta Sitifin ki tan pii, le ki mɔr ki fabin takpem u bu.

³ Amaa le Sɔɔl ma piin ki bii biwonjiɛm a laguŋ. Ki kɔɔ bi niin yin ki chor bijab nin bipiib, ki tan loog bi kuloondiigin.

Tibɔŋannin kaah mɔɔn Samariya a tiŋin man

⁴ Biwonjiɛmin kaah nan yalin, bi ni nan mɔɔn tibɔŋann nin le nan yaan biɛn wee bi jon.

⁵ Le Filib jon Samariya a tiŋ kiba ni ki tan mɔɔn Masiya a bɔr ki sei bi.

⁶ Le kuninfogbaluŋin kaah gbir Filib a bɔrin ki ji kan ligaril a siɛra a toon yan wee u tun ni, le bi biɛn ni nan mann pel u bɔr nmɔn.

⁷ U na nyan nnaanbiim takpem bininfobin, le bi yigin papaab ki sin nyan, ki ji teb tigbanann kpiindam nin nwɔbim takpem kan kutebug.

⁸ Mambu nmɔn takpem nan be kitiŋ nmɔn yaan.

⁹ Le uja u ba mu nan be kitiŋ nmɔn yaan, ki ye unyɔgdaan, le u yinl ye Simɔnn, u nan tun ligaril a toonl le ni gar Samariya yaab biɛn. U nan far u gbingbanl ke u ye uninfoja le,

¹⁰ bininfob pɔɔndam nin bilanjiim biɛn nan pelig u bɔr le ki len ke, “Uja nan jɔɔ nween a pɔɔm le Npɔɔn Takpen.”

¹¹ Nan bu-n u nyɔgi a toon nmɔn nan ŋa bi ligaril le ke ni yuur, ni bu le che bi nan chee sei u ki nɔɔ u.

¹² Amaa Filib kaah dan ki nan wɔɔn bi Uwonbɔr a naam a bɔŋann nin, nin Yisa Masiya a yinlin, bijab nin bipiib nan ŋa u yada, le u fun bi Uwonbɔr a nyunful.

¹³ Simɔnn tɔɔl nan ŋa u yadau, le u fun u nnyumin. Le u nɔɔ Filib ki choon nan yaan biɛn wee u chaa ki ga ligaril a siɛra a toon gbingbemin yan wee u ŋaan nin, le ni gar u.

¹⁴ Yisa a toon ban be Jerusalam nan kaah gbir ke Samariya yaab gaa Uwonbɔr a bɔrin ni, le bi tun Piita nin Jɔnn bi ban.

¹⁵ Baah nan tan foon, bi nan miɛ Uwonbɔr le ki sei bi ke bin gbee nin Kasi a Naaŋ,

¹⁶ nan bu-n Kasi a Naaŋin kaa la nan jiirin bi ni u ba bu; bi nan fun Uwonbɔr a nyunful Uyudaan Yisa a yinlin a binba le.

¹⁷ Le Piita nin Jɔnn nan ta bi nɔɔi ki paan bi bu, le bi gbee nin Kasi a Naaŋ.

¹⁸ Simɔnn kaah nan kan Yisa a toon n kaah ta bi nɔɔi ki paan bi bu, wee Uwonbɔr sei bi Kinaaŋin, le u sei bi ilig,

¹⁹ ki bei bi ke, “Ni seim npɔɔn nmɔn ni, wee n mu ti ta n nɔɔi ki paan wan bu ke un gbee nin Kasi a Naaŋ.”

²⁰ Amaa le Piita jiin u ke, “A tug ke a li fir ta ilig ki daa Uwonbɔr a piin yaa? Fin nin a ligi nmɔn n gabim yɔli!

²¹ Ŋaa tun niba ti toon nan yaan ni, nan bu-n a sufu kaa be nbamɔm nin Uwonbɔr i.

²² Ni bu jiɛn a potiɛbir nmɔn na, ki kpenn a binbem wee ki miɛ Uyudaan. Ni ba ke u li jiɛn a potiɛbir nmɔn ki periŋ.

²³ Nan bu-n n kan ki miin a gbee nin npooton le, ki ji ye tibir a yomu.

²⁴ Le Simɔnn bei bi ke, “Ni miɛ Uyudaan ki seim ni, wee nan wee ni len nan n laa kan mi.”

²⁵ Ni bɔɔn bu Piita nin Jɔnn kaah nan mɔɔn Uyudaan a bɔrin ni, le bi jir Jerusalam. Baah nan chaan bi nan mɔɔn Yisa a bɔŋann n le, Samariya a tinbumin.

Filib nin Itopiya a toontunn sanliiru a bɔr

²⁶ N-yonn nmɔn le Uyudaan a malaka bei Filib ke, “Fii ki li chaa ki tan nɔɔ a nɔɔgam paam a sam man nyan Jerusalam ki chaa Gaza a tiŋin ni.”

²⁷ Le Filib fii ki nyan ki piin u sanchonl, le ki to Itopiya a jau uba wan wee bi faarin ki miin u mu nyan lisanchonl le ki chaa kun. Uja nmɔn nan ye Itopiya a piibɔru wan a naam a yinl nan ye Kandasi a lig ŋmagib a gbansɔbib a yudaau le, u nan jon Jerusalam le un tan jiɛn Uwonbɔr,

²⁸ ki nan chaa jir kun ki ka u toroko a poolin, le itaan dar u. Waah nan chaa n-yonn man nin, le u be karin ulinlenn Azaya kaah sɔb kugbɔŋ kan nin.

²⁹ Le Kinaaŋ bei Filib ke, “Fɔɔr ki mal toroko nan ban na.”

³⁰ Le u guun jon niin, ki gbir ujan kaah karin Uwonbɔr a linlenu Azaya a gbɔŋin. Le Filib baan u ke, “A biɛr nan wee a karin nan a taai yaa?”

³¹ Le u jiin ki ke, “N yin ŋa nii ki biɛ ni taai yaa, wee naa ye uba le wɔɔm maa?” Le u yin Filib ke un kɔɔn ki nan kal kpiɛ u bu.

³² Uwonbɔr a gbɔŋin tibɔr tan wee lijafaalin nan be karin nmɔn ye nan le, “Le u chee ki jon a li ke baah ti dar upee chaa bin tan ku man nin, Ki ŋmin ke baah chiɛ kipeebig a kor ke ki ŋmin man nin, kaa yaar u mɔbi.

³³ U fai a jimin, bi nan mɔu ibamɔn na. Ki junn u miɛfol dulinya nan yaan. Ke ŋma ji li fir pag u yaabili a bɔraa?”

³⁴ Le lijafaal nmɔn baan Filib ke, “Beim ni, ŋma wee ulinlenn nmɔn pagaa? U pag ki jiin u tɔɔl paam le bee uba paam maa?”

³⁵ Le Filib piin nan yaan wee lijafaal nmɔn bi karin chaan, ki bei u Yisa a bɔŋann.

³⁶ Baah nan nɔɔ nsan nmɔn ki chaa n-yonn man nin, le bi tan kan nnyum nba kaah dɔ, le lijafaal n bei Filib ke, “Lig nnyum sɔ. Ba yin ŋa wee ŋaa li fum Uwonbɔr a nyunfulaa?”

³⁷ Le Filib bei u ke, “Ni ye a ŋa Yisa yada nin a sufu biɛn ke n li fuŋ.” Le u jiin ke, “N ŋa yada ke Yisa Masiya ye Uwonbɔr a Bija le.”

³⁸ Le lijafaalin che itaan nin sir, le u ma nin Filib jiir nnyumin yaan, le Filib fun u Uwonbɔr a nyunful.

³⁹ Le bi nan nyan nnyumin yaan ki don, le Uyudaan a Naaŋ ta Filib yaar jon, le lijafaalin kaa ji kan wi, le ki kɔɔ u toroko a poolin ki kun nin nmɔn.

⁴⁰ Filib nin nan tan be Azotusi le, ki jin ntim ntim biɛn ki mɔɔn Yisa a bɔŋann hali nin waah nan nan foo Sizariya.