Lituln 5 - UWONBƆR A GBƆNPƆŊ LIKƆƆNL

Ananiɛsi ni Safira a bɔr

¹ Uja uba mu nan be le u yinl ye Ananiɛsi, le u poo mu a yinl mu ye Safira, le bi nan kɔɔr bi paam ki gaa mi ligi.

² Le ki nyan ilig iba ki woon, ke u poo nyi i bu, amaa le ki ta yan gurin dan ki nan sei itoon nin.

³ Le Piita baan u ke, “Ananiɛsi, ba ŋa wee a che Sintani kɔɔ a sufu ni, wee a por tibɔkar ki sei Kasi a Naaŋ ki nyan ilig yan wee a kɔɔr a paamin ki woon naa?

⁴ Ŋaah nan kɔɔr npaan nin ni, maa nan ye a yaan lee? Ŋaah ji kɔɔr ki gaa ilig yan nin, yaa be a nɔɔn lee? Ke ba ŋa wee a tiɛr man a sufu ni naa? Naa ye uninfo le a por tibɔkar nmɔn ki sei, amaa ni ye Uwonbɔr le.”

⁵ Ananiɛsi kaah gbir man n-yonn man ni, le u nyiɛr lu tum ki kpo. Le bijawaam choo ban biɛn nan gbir nan tun nmɔn.

⁶ Le binaachipɔm yuur u ki pɔbin likinkenlin ki ta u nyan ki tan pii u.

⁷ Le ni kpiɛ wama, le u poo mu kɔɔn, kaa la nyi nan ŋa.

⁸ Le Piita baan u ke, “Beim ni, fin nin a chal a paam man wee ni nan kɔɔrin a ligi a biɛn sɔɔ?” Le u jiin ke, “Nn i biɛn le yen.”

⁹ Le Piita baan u ke, “Ba ŋa wee ni kpaag bimɔb, ki mag Uyudaan a Naaŋ aa? Lig! Ban ta a chal ki tan pii-n a taai li dɔ ntimansanmɔnn nan, bi ji li yuur a mu.”

¹⁰ Libol nmɔn, le u mu nyiɛr lu u tum ki kpo. Le binaachipɔmin kɔɔn ki nan kan waah kpo dɔ, le bi ji yuur u mu nyan ki tan pii u bagin u chal.

¹¹ Le bijawaam nan mann choo biwonjiɛm a laguŋin nin ban biɛn nan gbir nan tun nmɔn takpem.

Ligaril nin lijinjeel a toon

¹² Itoon nin nan tun ligaril a siɛra nin lijinjeel a toon le takpem bininfobin a sisiigin. Biwonjiɛm biɛn nan ti lagin tab Solomɔnn a dɔŋin le.

¹³ Hali nin bininfobin kaa nan jɔɔ li nungbeel bi ni-n, baa nan fir lagin bi ban ni, amaa le ki sin nan pag ki don Yisa a bɔɔnɔɔbin takpem.

¹⁴ Nin nima biɛn ni, le bijab nin bipiib takpem nan ŋa Uyudaan yada le nin kpiɛ bi kanlin.

¹⁵ Mambu le bininfob nan nyan nin bibaarib, ki paan bi gadum nin tiwandɔɔn wann bu, nsan gbaan ke Piita nan chaa jo n-yonn man ke, u jinjiim li lu bibam bu.

¹⁶ Le bininfob ban be Jerusalam a tinbumin mu tu bibaarib, nin ban wee nnaanbiim mugir bin ki dan, le bi biɛn nan kan kutebug.

Baah nan mugir Itoon man

¹⁷ Le biminmanib a yudaau nin u tab biɛn ban ye Sadusi yaab nan jɔɔ lipiiponl nin itoon nin.

¹⁸ Le bi choo itoon nin ki kɔɔn bi kuloondiig kan bi loog bininfob biɛn.

¹⁹ Amaa lidaal a nyiɛg le Uyudaan a malaka jiirin ki nan loor kuloondiigin a naanganl, ki nyan itoon nmɔn niin.

²⁰ Le ki bei bi ke, “Ni li chaa iwonjiɛn niin nan yaan, ki tan sir, ki bei bininfobin limiɛfol pɔnl nan a bɔr biɛn na.”

²¹ Baah gbir u bɔr nmɔn, le bi jon ki tan kɔɔ iwonjiɛn niin nmɔn yaan, njakpanyiɛn ki piin ki wɔɔn bininfob. Biminmanib a yudaau nin u tabin kaah nan dan ni, le bi yin Iziral yaab a yudamin biɛn, le ki tun ke bin tan nyan Yisa a toon yin kuloondiigin ni ki ta bi dan.

²² Amaa baah nan tan fo kuloondiig nmɔn yaan ki tan lig, kaa nan kan bi, le ki jir bisanliibin ban ki tan bei bi ke,

²³ “Ti foo kuloondiigin ki miin inaangan nin kpal le; le ban guun si ki guu, amaa le ti loor kaa kan uba kuloondiigin a poolin ni.”

²⁴ Ban guu iwonjiɛn niin a ninkpelu nin biminmanib a yudamin kaah gbir man nin, le ni ŋa bi kuŋmaruŋ nin lijinjeel, nan na li ŋa.

²⁵ Le uba kɔɔn, ki nan bei bi ke, “Ni lig! Bijab ban wee ni ta ŋa kuloondiigin nin, bi si iwonjiɛn niin ki wɔɔn bininfob Uwonbɔr a bɔr.”

²⁶ Iyaayoo nmɔn le ban guu iwonjiɛn niin nin a ninkpelu nin u tabin jon ki tan ta itoon nin ki jirin. Baa nan nyan bi nin npɔɔn ni, nan bu-n bi nan san bijawaam le ke bininfobin na li gabir bi itangbag.

²⁷ Baah nan ta itoon nin jirin n-yonn man nin, le bi che bi sir Juu yaab a yudam a nintogil, wee biminmanib a yudaan win baan bi ibinbaan,

²⁸ Le u len ke, “Ti nan sei ni bimɔb nin inunman, ke ni laa wɔɔn bininfob li yinl nan ni, ke lig naah ta nwɔɔnim nmɔn ki yar Jerusalam a gbanann biɛn, wee ki che Yisa a cham nan yin be ti nɔɔn.”

²⁹ Le Piita nin u tooi tabin jiin ke: “Ni kpaa le nin ti chee Uwonbɔr a mɔb le ki jiɛn uninfosaal a mɔb!

³⁰ Yisa wan wee ni pii nan kpa u lidapunpunl bu wee u kpe-n, Uwonbɔr wan ye ti Wonbɔru nan fiin u nkumin na.

³¹ Le ki don u ki tan kaan U baan tɔɔl a nɔɔjiim paam, ki ŋa u ki Bɔrbig nin Ufeer, ke Iziral yaabin kpenn bi binbema, wee un jiɛn bi toonbir ki per bi.

³² Tim nin Kasi a Naaŋin le ye ni nan a siɛradam, le Uwonbɔr ta U Kasi a Naaŋ nmɔn sei ban cheel U mɔb.”

³³ Juu yaab a yudamin kaah gbir man n-yonn man nin, le bi ŋuui fii, le bi ban bin ku bi.

³⁴ Amaa Farasiim a ninfou uba nan be niin, le u yinl ye Gamaliɛl, u nan ye wan wɔɔnn Uwonbɔr a siim le, le bininfob biɛn tenn u jilima, le u fii sir Juu yaab a yudam a laguŋ nmɔn yaan, ki len ke bin laan ta itoon nmɔn ki nyan nkaafiin wamau;

³⁵ le ki sin bei biyudam nmɔn ke, “Hei Iziral yaab, ni li nyi naah ke ni ŋa bininfob nan man nan fa.

³⁶ Iyoo yan nan jon nin, Tiudiɛ nan wɔɔn u ba le ke u ye lininfo takpenl le, le bijab kobina nan nɔɔ u bɔɔn, amaa baah nan nan ku win, u bɔɔnɔɔbin biɛn nan worin na, le ni biɛn ŋa yɔli.

³⁷ U kum a bɔɔn, le Judasi wan nan ye Galilii a ninfo win mu nyan ki sir lininfo kanl a yonn, ki wɔɔn u ba, ki kpenn bininfob takpem a lam le bi nɔɔ u. Le bininfob ji nan ku u, le u bɔɔnɔɔbin biɛn worin.

³⁸ Mambu, n kpaan ni le ke ni paan jaa bininfob nmɔn na! Ki che bi li chaau! Wee ni ye bi toon nmɔn ye bininfosaalib yaan le ke, naa yin tun ni.

³⁹ Amaa ni ye ni nyan Uwonbɔr ban ke, naa li fir gɔɔ bi. Ni li kan ke ni kɔnn Uwonbɔr le.”

⁴⁰ Le biyudam nmɔn nin chee Gamaliɛl a mɔb ki yin itoon nin ki kɔɔn, ki che bi boo bi ki ta bi jaa, ki sei bi bimɔb ke, bi li nyi ki laa mɔɔn Yisa a yinl nmɔn ni.

⁴¹ Le itoon nin nan nyan Juu yaab a yudamin ban nin nmɔn, nin baah kpaan nin bin ji ifa Yisa a yinl bu-n.

⁴² Lidaal biɛn ke bi chaa iwonjiɛn niin ni le, le ki jin mɔɔn Yisa a yinl bininfob a niin yin, ke Yisa le ye Masiya, ki ji mɔɔn u bɔŋann nin.