Lituln 27 - UWONBƆR A GBƆNPƆŊ LIKƆƆNL

Pɔɔl kaah nan kɔɔ kuŋaluŋ ki jon Rom man

¹ Baah nan nan bei ke ti kɔɔ kuŋaluŋ ki jo Itali nan, le bi nan ta Pɔɔl ki kpiɛ biloondiikɔɔb biba bu ki sei bitɔtogib a sanliiru wan a yinl ye Juliɛsi nan, wee u be bibɔrtiib a yudaau a paabim n yaan nin.

² Le ti biɛn kɔɔ kuŋaluŋ kan nan nyan Adiramatum, ki pii ŋa sili nin kin jo Asiya a tingbɔŋin nin ntim man mal limɔgilin; le kuŋaluŋin fii. Masedoniya a ninfou Arisitakusi, wan nan nyan Tesalonika n nan be ti ban.

³ Le ni wonn kutaag, le ti foo Sidonn, le bitɔtogib a sanliiru Juliɛsi kaah ŋmag Pɔɔl nbamɔm man nin bu, le u jaa u nsan ke u li chaa u jɔtiib ban be niin nin ban wee bin ter u waah ban nan.

⁴ Le ti nyan nin yaan ki chaa, le nfaam daar ki too ti, mambu le che ti nan nɔɔ Saipuru ligungonl lan be nnyum a sisiigin liwonpɔɔnl paam ki jon.

⁵ Taah lɔŋ limɔgil nni, le ti nɔɔ Silisiya nin Pamfiliya, ki tan foo Mara, Lisiya a tingbɔŋin.

⁶ Nin yaan le bitɔtogib a sanliiru win kan kuŋaluŋ kan nyan Alɛgzandira ki chaa Itali a tiŋin, le u che ti kɔɔ ki ma.

⁷ Ki chaa soon soon, ti nan yuur nsan wamau, ki tan foo Kenidusi a tiŋin ban. Nfaamin kaa nan che ti nɔɔ taah nan ban nan paamin ni, ni bu che ti ni nan nɔɔ ligungonl lan be Kereti a tiŋ kan be nnyum a sisiigin Salmone a logil paamin le.

⁸ Ti nan kpag limɔgil a gbaam le, ni nan pɔɔ pam ki sei ti nin ta tan foo kitiŋ kan wee bi yi ke, sisibol ŋanl nan, nin yaan kaa fɔg nin Lasiya a tiŋin ni.

⁹ Ti nan yuur takpem limɔgil nmɔn yaan na, ni che Juu yaab a mɔlol a chiigin nan nan jon na, n-yonn man wee kidaŋ ti be limɔgil nmɔn yaan nin. Le Pɔɔl sei bi ikpaan ke,

¹⁰ “N jɔtiib, n nyi ke ti li kan kidaŋ ti sanchonl nan yaan, naa ye tiwann yɔɔr tan be kuŋaluŋ nan yaan a binba bu bee kuŋaluŋin a binba bu, amaa ti baantɔɔl a miɛfol be kidaŋin.”

¹¹ Amaa le bitɔtob a sanliiru nan kaa nan chee Pɔɔl kaah len man nni le ki sin nɔɔ wan donn kuŋaluŋin nin kuŋaluŋin daan a bɔr.

¹² Sisibol ŋanl kaa nan be nin kuŋaluŋ n sir wee kufaag a yonn n jo, mambu le che bininfob takpem nan len ke ti pɔɔn ti ba ki foo Fonisi kitiŋ kan be Kereti a tingbɔŋin nin, Fonisi nmɔn jɔɔ tiŋalin kaah sii nan yaan, ni nan too nnɔɔgan nin nnɔɔjiin a wonlul paam le.

Ntafapɔɔrim a bɔr

¹³ Le ntafaam nan fii nnɔɔgan paam limɔgil nmɔn yaan ki daar soon, soon, le bi tiɛr ke bi nyaŋ le nmɔn; le ki choo tikulor tan baag kuŋaluŋ siigin lor, le ki gaa nsan, ki kpag Kereti a mɔgil a gbaam.

¹⁴ Naa yuuri le ntafapɔɔrim fii n nnɔɔjiin liwonpɔɔnl paam ki daar chaan ligungonl lan be nnyum a sisiigin nin.

¹⁵ Le ki jɔɔ kuŋaluŋin yeŋ, ni che taa ji na li fir too nfaamin ni. Uba kaa ji nan fir ŋmag kuŋaluŋin ni, le ti le ni nan chee sei nfaam nmɔn le mi daar kuŋaluŋin chaa.

¹⁶ Le mi ta ti ki tan foo kugungonbig kan be nyum a sisiigin wee bi yi ke Kɔda, le ti gbaa ki yuur kubulunkpoŋ kan wee kuŋaluŋin darin ki ŋa kuŋaluŋ n yaa poolin.

¹⁷ Le bi nin dar kubulunkpoŋin ki kɔɔn kuŋaluŋin yaan, le ki ta nŋmin ki lol kuŋaluŋin kenken. Bi nan san bijawaam ki nyi ke bi tan li par fel Libiya a tiŋ ban nan yaan a nyum kaa nyɔɔ-n. Mambu le nan che bi jiin kuŋaluŋin a kulorin le ntafaam nin daar bi ki chaa.

¹⁸ Ntafaam la nan daar ki pɔɔ, ni che kuŋaluŋin nan yeŋ le, le ni won kutaag le bi nyan tiwann yɔɔr tiba kuŋaluŋin yaan ki ta jaa nnyumin.

¹⁹ Ni ween itaa daal le bi ji nyan kuŋaluŋ nmɔn a wan yɔɔr tan kpiɛg ki ji gab n nyumin.

²⁰ Taah nan be ntafaam nmɔn a poolin ki chaa, ni nan jin idaa takpem ke taa kan nween bee iŋmabili, ni che taa ji nan jɔɔ tama ke ti li ŋmari.

²¹ Ni nan yuur takpem ke bininfobin kaa jin ni, le Pɔɔl nan fii sir ki bei bi ke, “N jɔtiib, ni nan bi chee n mɔb, wee kaa nan bi nyan Kereti a tiŋin ke, ni bi li ŋan, naa bi li kan kidaŋ nin kininbɔŋ nan a bosu.

²² Amaa daandaan nan, n balin ni le, ni che ni sufu li dɔɔu, ke ni ni uba kaa yin lan u miɛfoli, amaa kuŋaluŋ nan a binba le nɔɔ li bii.

²³ Kunyiɛg n-yaan le n yudaau Uwonbɔr wan yem wee n jiɛn u nan a malaka won jiirin ki nan sir n ban,

²⁴ le ki beim ke, ‘Laa san bijawaami, Pɔɔl. A li foo ubɔr Siiza a nintogil, Uwonbɔr li fee fin nin bininfob ban biɛn be kuŋaluŋ nan yaan nan a miɛfol ki jaa fin bu.’

²⁵ Mambu n jɔtiib ni che ni sufu li pɔɔu man, n ŋa Uwonbɔr yada ke ni li tun ke waah len man nin.

²⁶ Amaa nin ni ma biɛn ni, ntafaam nan li che ti do ligungonl lan wee nnyum lin li nan bu.”

²⁷ Ni nan ŋa tinyiɛmunn piig nin tina ke ntafaamin le la daar ti ki chaa limɔgil lan wee bi yi li ke Adarati a mɔgilin yaan, le kunyiɛgtasiig le bi ŋalindomin ni nan biɛ ke bi be malig nyum a tarig le.

²⁸ Le bi ta nan wee bi jɔɔ bigin nnyum a nyunyɔɔmin ki bigin, ki miin mi nyunyɔɔm ye itaa kobig nin itaa pilee le, ki ji fɔr wama le ki bigin lig ki miin ni ye itaa piwiɛ le.

²⁹ Le bijawaam kɔɔ ti, ti nan tiɛr ke n ba ke kuŋaluŋ n tan par do itangbag bu, ni ma che ti ni nan ta tikur tan kpiɛg tina tan chor kuŋaluŋ ki siigin, ki jaa nnyumin, ki ta lol choo kuŋaluŋin a bɔɔn, le ki sin miɛ Uwonbɔr ke kutaag nwonn ti.

³⁰ Amaa biŋalindomin nan ban bin ŋmiɛr le ki jiɛn kuŋaluŋin, le ki lor kubulunkpoŋin jiin nnyumin, le ki nin kpalin ke bi ban bin ta tikur tan kpiɛg n le ki lol kuŋaluŋin a titogilin.

³¹ Le Pɔɔl bei bitɔtogib a sanliiru win nin bitɔtogibin ke, “Ni ye biŋalindom nan kaa be kuŋaluŋ nan yaan ke ni ni uba kaa yin ŋmari.”

³² Le bitɔtogibin nan jii iŋmin yan wee bi ta lol kubulunkpoŋin ki chi chi, ki che ku lu.

³³ Le ki be kutaayɔg paam, le Pɔɔl balin bi biɛn ke bin jim tijiir, le ki ke “Nan bu-n dinan yin kpiɛ iweehn piig nin ina le nan, le bijawaam che naa jin niba.

³⁴ Daandaan nan n balin ni le ke ni pɔɔn ni ba ki ji tijiira. Ni ma li che ti kan npɔɔn. Ni ni uba kaa yin lan u yukpobig u yul bu.”

³⁵ Waah len man nmɔn a bɔɔn, le u yuur boroboro ki poor Uwonbɔr bi biɛn nan a numin. Le ki choo war war ki piin nŋmam.

³⁶ Bi biɛn nan a sufu nan pɔɔg le bi jin tijiir bi baantɔɔl.

³⁷ Tim ban nan be kuŋaluŋ nmɔn yaan nan ye bininfob kobilee nin pilile nin biloob le.

³⁸ Baah jin ki kpaan baah ban man a tarigin, le bi ta tijiir tan gurin jaa nnyumin, le kuŋaluŋin kaa ji kpiɛgi.

Kuŋaluŋ kaah bii man

³⁹ Kutaag kaah won diɛ-n le bi kan litanbiiril, le biŋalindomin kaa biɛ ke kitiŋ le yen ni, amaa le ki nin gbeer ke ni bi li fir ke, bin bi ta kuŋaluŋin kɔɔ niin wee kun fel titann nin.

⁴⁰ Le bi jii iŋmin nin chinn, le tikur tan kpiɛgin lu nnyumin, le ki ji lor iŋmin yan lol tidaar tan wee bi jɔɔ don kuŋaluŋin ni, le ki nin don likinkenl kuŋaluŋin a titogil, ke ntafaam li daar bi chaa, le ki tan mal likpengonl.

⁴¹ Le kuŋaluŋin a titogil fel titann nin, kaa ji li fir jo, le kuŋaluŋin sir le kunyungbɔŋ nin chaan ki nan liɛr kuŋaluŋin a bɔɔn le ku nan choo bɔgir bɔgir.

⁴² Le bitɔtogibin nan ban bin ku ban wee bi nan ta ŋa kuloondiigin nin biɛn, ke ni ba ke bi ni uba n nan wo nnyum do ki guun ŋmar.

⁴³ Amaa le bitɔtogibin a sanliiru n ma nan ban un ŋmiɛn Pɔɔl le, le kaa chee bi lol nmɔn ni. Amaa le ki sin jaa bi ke wan nyi linyunwol wee ki li fir wo do ke, un chinn yug ki lu ki li wo chaa likpengonla.

⁴⁴ Ban gur kaa nyi linyunwol nan mu n choo kuŋaluŋ a daag bee iŋalinbɔg ki kpab ki wo do. Ti biɛn nan ŋa man le ki ŋmar.