Lituln 22 - UWONBƆR A GBƆNPƆŊ LIKƆƆNL

¹ “N nabum nin n baam, ni gbirim n siɛra nan.”

² Baah gbir u pag bi tɔɔl a leen yin ni, le bi ŋmin soon. Le Pɔɔl len ke,

³ “N ye Juu a ninfou le, bi mam Tarsusi kan be Silisiya a tingbɔŋin nin le, amaa n nan ŋa uninfo Jerusalam nan le. Gamaliɛl le nan wɔɔnim. U nan wɔɔnim ti yaajam a siim le chib chib, le n nɔɔ Uwonbɔr nin linunmanl, ke ni biɛn nan kaah nɔɔ U dinan man nan.

⁴ N nan mugir ki ku ban nɔɔ Yisa a samin le, ki ji chor bijab nin bipiib ki loog kuloondiigin,

⁵ a li ke kumanug a yudaau nin ti sanliib biɛn kaah li fir ŋa maah pag tan nan biɛn a siɛradam ke ni sin ye ibamɔn le-n. Hali gbaa n nan tan gaa tigbann bi ban ki ta tan sei bi nabum ban be Damasiko nan, ke n tan choo ban be niin ki nɔɔ Yisa nan, ki ta bi jirin Jerusalam ki nan ŋa bi kuloondiigin wee bin dar bi tuli.

Pɔɔl kaah nan wɔɔn bi u kpenim a bɔr man

⁶ “Maah chaa ki tan mal Damasiko nwosisiigin le nwonween takpem nyan papaab ki nan won n bu ki jim.

⁷ Le n lu tum, ki gbir likukɔl yin ke, ‘Sɔɔl, Sɔɔl, ba ŋa wee a mugirim man naa?’

⁸ “Le n jiin ki baan u ke, ‘Uyudaan a ye ŋmiɛ?’ “Le u beim ke, ‘Min Nazarif a ninfou Yisa le a mugir nmɔn.’

⁹ Bininfob ban nan chiɛmin nan kan nwonween nin na, amaa baa nan biɛ wan nan pag ki tenn min a niɛn ni.

¹⁰ “Le n baan u ke, ‘Uyudaau n yin ŋa nii?’ “Le Uyudaan beim ke, ‘Fiim paab ba ki li chaa Damasiko. Bi ta li wɔɔniŋ nan biɛn wee Uwonbɔr ke a ŋa.’

¹¹ N ninɔɔtab le nan ŋmag n nɔɔ ki dam foo Damasiko, nan bu-n nwonween man nan nyagir n num paamin nan jɔɔn ma.

¹² “Uja uba mu a yinl ye Ananiɛsi nan dan ke un nan kam. U nan ŋmag Uwonbɔr a siimin nbamɔm, ni bu Juu yaab ban nan be Damasiko nan tenn u jilima le takpem.

¹³ Le u nan sir n ban ki ke, ‘N nabig, Sɔɔl, ligira.’ Libonl nmɔn le n ligir ki kan u.

¹⁴ “Le u len ke, ‘Uwonbɔr wan ye ti yaajam a Weemin pii ganiŋ le, ke a biɛ u bam, ki kan U ninfo Buchiu, ki ji gbir u mu a mɔnn.

¹⁵ A li ŋa u siɛradaau, ki li pag tenn bininfob biɛn ŋaah kan nan nin ŋaah gbir nan.

¹⁶ A ji ka ki guu baa? Fiim, wee n fuŋ Uwonbɔr a nyunful, wee a yin Yisa a yinl wee un ŋunn a bir.’

Uyudaan kaah yin Pɔɔl ke un mɔɔn u bɔr ki sei ban kaa ye Juu yaabin man

¹⁷ “Maah nan jir Jerusalam, ki tan kɔɔ iwonjiɛn niin n-yaan, ki miɛ Uwonbɔr nan le n kan zii,

¹⁸ zii nmɔn yaan le n kan Uyudaan, le u beim ke. ‘Ŋa weema! Nya Jerusalam libol libol nan na, nan bu-n ni ye a bei Jerusalam yaab n bɔr ke, baa yin gaa tibɔr nmɔn ni.’

¹⁹ “Le n jiin u ke, ‘Uyudaau, bininfob pii nyi ke min le nan chonn kɔɔ tiwonjiɛndirin ki chor bininfob ban nɔɔ a samin, ki boo bi ki kɔɔn bi tiloondirin.

²⁰ Le baah nan ke bin ku a siɛradaau Sitifin nin, n tɔɔl nan be niin, ki chee ke bin ku mu. Min le ji nan ŋmag ban nan ku win a wan yɔɔr.’

²¹ “Le Uyudaan beim ke, ‘Fin le li chaau; min le yin tuŋ nan fɔg bininfob ban kaa ye Juu yaabin ban.’ ”

²² Kuninfogbaluŋin le maan biba ki pel waah pag man nin nmɔn, nin waah nan nan len ni niɛ. Le bi don bi likukɔl ki tann papaab ke, “Uja nan kaa ŋan nin u li be kutingbɔŋ nan yaan ni. Ni ku mu man.”

²³ Baah nan be tann ki pir bi daalam gabir, ki liɛr titann ki kur kutangbaag jaar paabin,

²⁴ le bitɔtogib a yudaau n sei bimɔb ke bin ta Pɔɔl ki kɔɔn bitɔtogib a niin na ki ji bei bi ke, bin boo mu, wee ki baan u wee win biɛ tibir tan wee u tun wee Juu yaab tann titintann nmɔn.

²⁵ Le bi tann u ki ke bin boo, le Pɔɔl baan bitɔtogib a sanliiru wan nan ŋmag bitɔtogib kobig wee ki si u ban nin ke, “Ni ŋan nin ni boo Rom a tinbig wee baa la jin u tibɔr ki kan u galin yaa?”

²⁶ Bitɔtogib a ninkpelu nmɔn kaah gbir man ni, le u jon bi yudaau n ban, ki tan baan u ke, “A ni yin ŋa nii?” Rom a ninfou le ye uja nmɔn.”

²⁷ Le bitɔtogib a yudaau nmɔn mu fii, ki tan baan Pɔɔl ke, “Beim ni a ye Rom a ninfou lee?” Le Pɔɔl chee ke “Nn.”

²⁸ Le bitɔtogib a yudaau nmɔn bei u ke, “Min nan yɔn ilig takpen le, ki kpann Rom a ninfou.” Amaa le Pɔɔl bei u ke, “Min bu ke n ye Rom a tinbig le.”

²⁹ Libol nmɔn le bitɔtogib ban nan ban bin baan u ibinbaan nin fɔr ki jir bi bɔɔn. Bitɔtogib a yudaau win tɔɔl a lam nan yug le, waah nan nan biɛ ke Pɔɔl ye Rom a tinbig wee u che bi lol u tikulorin bu.

Juu yaab a yudam kaah jin Pɔɔl tibɔr man

³⁰ Naah nan won kutaag wee bitɔtogib a yudaau nmɔn nan ban un biɛ igalin yan wee Juu yaab pag ki jiin Pɔɔl paam nan a bamɔn chib chibin, le ni nan won kutaag, le u che bi lor u, le ki sin sei bimɔb ke, kumanug a ninkpeeb nin Juu yaab a yudamin biɛn lagin ni, le ki che Pɔɔl dan ki nan sir bi nintogil.