Lituln 21 - UWONBƆR A GBƆNPƆŊ LIKƆƆNL

Pɔɔl kaah jon Jerusalam man

¹ Baah nan chabir ti a bɔɔn bu, le ti kɔɔ kuŋaluŋ ki don limɔgil ki tan foo Kosi. Le ni won kutaag le ti jon Rodesi, ki ji nyan niin ki jon Patara.

² Niin le ti kan kuŋaluŋ kan chaa Fonisiya, le ti kɔɔ kuŋaluŋin ki chaa.

³ Taah nan tan ga Saipuru n-yonn man ni, le ti nɔɔ nnɔɔganpaam ki jon Siriya. Le ki tan foo Taya nan yaan wee bi nan tan yin nyan kuŋaluŋin a wan yɔɔr.

⁴ Niin le ti kan biwonjiɛm, le ki paar bi ban ki tan kpaa iweehn ilile. Le Kinaaŋ che bi balin Pɔɔl ke, un laa jo Jerusalami.

⁵ Amaa le ti chaam a yonn nan foo, le biwonjiɛmin nin bipiib nin bi buwaab chiɛn ti ki tan nyan kitiŋ n yaan. Le ti biɛn gbaan limɔgilin a gbaam ki miɛ Uwonbɔr.

⁶ Taah nan chabir tab a bɔɔn, le ti jon tan kɔɔ kuŋaluŋin ki chaa, le bi biɛn jir kun.

⁷ Le ti nyan Taya ki foo Tolemasi, ki jon tan poor biwonjiɛmin, le ki paar bi ban weemba.

⁸ Le ni won kutaag le ti nyan Tolemasi, ki foo Sizariya, ki jon Filib wan ye umɔleenmɔɔn a niin ki tan be. U nan ye bijab bilile ban wee bi nan gann bi ke bi li tol tijiir n-yaa ni u ba le.

⁹ U nan jɔɔ nbisiɛm mina le ke maa la kun bijabi, le bi pag ilinlen leen.

¹⁰ Ti nan be niin ki yuur wamau, ni bɔɔn bu le Uwonbɔr a linlenu wan wee bi yi u ke Agabu nan nyan Judiya ki dan.

¹¹ Le ki nan ta Pɔɔl a changbam, ki lol u tɔɔl a taai nin u nɔɔi, le ki len ke, “Kasi a Naaŋ len ke, Juu yaab ban be Jerusalam yin lol nchangban nan daan man le ki ta u ŋubin ban kaa ye Juu yaab a nɔɔn.”

¹² Taah nan gbir man nmɔn, le tim nin ban biɛn nan be niin nin, balin Pɔɔl ke u laa ji chaa Jerusalami.

¹³ Amaa le Pɔɔl jiin ke, “Ba ŋa wee ni mɔr ki ku n gbanann naa? Naa ye ba tan yin lolimin a binba bu le n chaa, amaa n ŋa sili nin n tan kpo Jerusalam Uyudaan Yisa a yinl buu.”

¹⁴ Waah len man ni, le ti jir ŋmin, amaa le ki len ke, “Che Uyudaan a bam n tun.”

¹⁵ Ni bɔɔn bu, le ti ŋa sili ki jon Jerusalam.

¹⁶ Le biwonjiɛm ban nyan Sizariya a ni biba chiɛn ti jon Minason a niin nan yaan wee ti nan tan yin be. Minason nmɔn mu pii nan ye Yisa a bɔɔnɔɔru le, u nan ye Saipuru a ninfou le ki ye chinchinn a wonjiɛmin a ni uba.

Pɔɔl kaah gɔnn Jemisi man

¹⁷ Taah foo Jerusalam n-yonn man nin, le biwonjiɛm ban nan be niin nin gaa ti nin npopeen.

¹⁸ Le ni won kutaag, le Pɔɔl nin tim ban gurin jon ke ti tan poor Jemisi. Biwonjiɛn ninkpeebin mu nan be niin.

¹⁹ Le Pɔɔl poor bi, ki wɔɔn bi Uwonbɔr kaah tun nan ki sei ban kaa ye Juu yaabin u ma Pɔɔl a toon yin.

²⁰ Baah gbir u bɔr nmɔn nin, le bi biɛn pag Uwonbɔr. Le ki bei Pɔɔl ke: “Ti na a big, a kan Juu yaab turtur kaah ŋa yada man na, bi biɛn ji ŋmag nsiimin le kenken.

²¹ Biba nan bei bi ke, a wɔɔn Juu yaab ban be ban kaa ye Juu yaab a timin nin, ke bin yii Moziz a siimin na, ki ji bei bi ke, bi laa jiil bi buwaab a pun yi, ki laa nɔɔ Juu yaab a kaali.

²² Ti yin ŋa nii? Bi le li gbir ke a foon na,

²³ ni bu ti beiŋ man ke, a tum man. Bijab bina le be ti ban do ki poo tipoor.

²⁴ Ta bijab nan wee fin nin bi ma li chaa ki tan mann ni bau, wee a yɔ baah jin lipɔnl lan biɛn, wee bin koo bi yuli, wee bininfob biɛn biɛ ke baa pag man ki jiin a paamin kaa ye ibamɔn ni, nan bu-n, fin tɔɔl nɔɔ nsiimin le.

²⁵ Amaa ban kaa ye Juu yaab wee ki ye biwonjiɛm nan ma, ti pii sɔb kugbɔŋ sei bi ki wɔɔn bi ke, bi laa ji tijiir tan wee bi ta mann libawoli, bee ki ŋman nchami, bee kuwankobug kan wee bi ŋmaan ŋmaan ku, ki laa tun iwanjaab toon lipiibanlin bee lijabanlin ni.”

²⁶ Le ni won kutaag le Pɔɔl ta bijab nmɔn, le u ma nin bi ma mann biba, le ki kɔɔ iwonjiɛn niin, ke bin wɔɔn bi idaa yan wee bi yin be ki tan kpaa lidaal lan wee biba a manim na li diɛ wee bin mann kumanug ki sei bi biɛn.

Baah nan choo Pɔɔl iwonjiɛn niin man

²⁷ Iweehn ilile nmɔn kaah nan nan mal ndiɛmin, le Juu yaab ban nyan Asiya ki dan nin kan Pɔɔl iwonjiɛn niin. Le ki fiin kuninfogbaluŋin a ŋuui Pɔɔl bu le ki choo u,

²⁸ le ki ji tann ke “Iziral yaab, ni ter ti ni! Uja nan le choon ilog biɛn, ki pag ki bii ti ninfob ki bii ti siim nin iwonjiɛn niin nin paam, nan ji kpiɛ ye ti jɔɔ ban kaa ye Juu yaabin chaan tiwonjiɛn niin nan yaan, ki bii ti kasi a niin nmɔn.”

²⁹ (Baah nan chinn kan Pɔɔl nin Tirofimusi wan nan ye Efesusi a ninfou win, ki miin bi be kitiŋ nmɔn yaan nin, le bi nyi ke Pɔɔl ta u kɔɔ iwonjiɛn niin nin yaan le.)

³⁰ Le kitiŋin yaab biɛn a ŋuui nan fii, le bininfobin biɛn guun ki nyan ilog biɛn. Ki nan leg Pɔɔl, ki choo u, ki dar u nyan iwonjiɛn niin n-yaan. Libol nmɔn le bi loon iwonjiɛn niin ni a timansanmɔɔŋi.

³¹ Le bininfobin nin ban bin ku Pɔɔl, iyaayoo le Rom a tɔtogib a yudaau wan nan ŋmag bitɔtogib tur nan gbir ke Jerusalam yaab biɛn be gaan tijar le.

³² Le u ŋa weem ki fii ki ta bitɔtogib ninkpeeb biba nin bitɔtogib, le bi daa jon kuninfogbaluŋin ban. Bininfobin kaah kan u ma nin bitɔtogibin n-yonn man ni, le bi jiɛn Pɔɔl a boor.

³³ Le bitɔtogib nmɔn a yudaau jon ki tan choo Pɔɔl, ki sei bi mɔb ke bin ta tikulor tilee ki baan mu. Le ki baan bi uninfo nmɔn waah ye wan nin waah galin nan.

³⁴ Le kuninfogbaluŋin yaan biba tann Pɔɔl bu balbal, balbal, bi ŋmaruŋ nmɔn bu che bitɔtogib a yudaau win kaa nan biɛ ni taai nbamɔmi. Mambu le u sei bimɔb ke bin ta u ŋa bitɔtogib a niin na.

³⁵ Baah nan tan foo ntisamɔn a nan yaan wee bi tɔɔg kɔɔ-n, le bitɔtogibin yuur Pɔɔl papaab, nan bu-n, kuninfogbaluŋin nan ban bin ku u le.

³⁶ Le bi nin nɔɔ bitɔtogib a bɔɔn ki tann ke, “Kum uja nan na!”

Pɔɔl kaah jin uba a siɛra man

³⁷ Bitɔtogibin kaah nan tan yin ta u kɔɔ bi niin n-yonn man nin, le u baan bitɔtogib nmɔn a yudaau ke, “Npaan be nin n pag niba ki sei ŋaa?” Le u jiin ki baan u ke, “A fin pag Girig yaab a leen yaa?”

³⁸ “Ŋaa ye Ijibir a ninfou wan che bininfob ta ikɔn dan kitiŋ nan yaan ki ta bitɔtogib turina, ki jon kulɔŋ ki tan be n-yonn man nan jon n lee?”

³⁹ Le Pɔɔl jiin u ke, “N ye Juu a ninfou le, n nyan Tarsusi kan be Silisiya a tingbɔŋin nin le, n ye kitintakpeŋ a ninfou le, n baliŋ le, che n pag ki sei bininfob nan.”

⁴⁰ Le bitɔtogib a yudaan win sei npaan. Le Pɔɔl sir bitɔtogibin a diig a tisanmɔnn nan yaan wee bi tɔɔg ki kɔɔ-n, ki don u nɔɔ bininfobin bu ke bin ŋmin na. Baah ŋmin n-yonn man nin, le u pag sei bi Juu yaab a leen yin, ke: