Lituln 16 - UWONBƆR A GBƆNPƆŊ LIKƆƆNL

Timoti kaah nɔɔ Pɔɔl nin Silasi choon man

¹ Le Pɔɔl foon Deba, le ki jon foo Lisitira, nan yaan wee u kan ubɔɔnɔɔr wan wee bi yi u ke Timoti. Wan a na nan ye Juu a ninfou ki ye yada daan ni, amaa le u baa ye Girig a ninfou.

² Nnabum ban be Lisitira nin Ikoniɛm a timin nan pag Timoti pam.

³ Pɔɔl nan ban un ta Timoti le jo nsan nmɔn, ni ma bu le u nan jii u punl Juu yaab ban nan be niin nin bu, nan bu-n bi biɛn nan nyi Timoti a baa kaah ye Girig a jau.

⁴ Baah nan choon ntimin nin, le bi nan mɔɔn tibɔr tan wee itoon nin bisanliib ban be Jerusalam nan pag choo ki wɔɔn ke bi li nɔɔ-n.

⁵ Le biwonjiɛmin a yada nan pɔɔgir le bi kanl kpiɛg lidaal biɛn.

Pɔɔl kaah nan kan zii Tirosi a tiŋin man

⁶ Kasi a Naaŋ kaah kaa nan chee ke bin mɔɔn tibɔrin nmɔn Asiya a yerin nin ni, le Pɔɔl nin u ninɔɔtabin nan nɔɔ Ferijiya nin Galantiya a tingbɔŋin.

⁷ Baah nan tan foo Misiya a timin a tarigin, bi ni nan ban bin kɔɔ Batiniya a timin le, amaa le Yisa a Naaŋ kaa chee ke bin kɔɔ.

⁸ Mambu che bi nan lagir Misiya a tiŋ bu ki jon Tirosi.

⁹ Kunyiɛg kaah nan foo-n le Pɔɔl kan zii, u zii nmɔn a poolin le Masedoniya a jau uba si ki balin u ke, “Dan Masedoniya ki nan ter ti ni.”

¹⁰ Pɔɔl kaah kan zii nmɔn a bɔɔn, le ti ŋa sili weem ke ti jo Masedoniya, nan bu-n ti nan biɛ ke Uwonbɔr le ke ti jo nin yaan ki tan mɔɔn tibɔŋann nin ki sei nin yaan a ninfob.

Lidiya kaah nan kpenn u binbem Filipi man

¹¹ Taah nan nyan Tirosi a tiŋin, ti nan jon limɔgilin le ki tan kɔɔ kuŋaluŋ ki jon Samotara, le ni won kutaag le ti foo Niɛpolisi.

¹² Ti nan nyan nin yaan ki jon Filipi, kitiŋ nmɔn nan be Rom yaab a nɔɔn le ki ye kitiŋ takpeŋ Masedoniya a yerin nin. Ti nan be niin ki yuur wamau.

¹³ Likpakɔɔl daal le ti nɔɔ nyan kitiŋ nmɔn a timansanmɔnn ki jon nkpenn, ti nan ban nan yaan wee ti li miɛ Uwonbɔr le. Le ti kal ki piin ki pag tenn bipiib ban nan lagin niin nmɔn.

¹⁴ Bipiib ban nan ka pelig tibɔr nmɔn, bi ni u ba a yinl le nan ye Lidiya, u nan nyan Tayatira le, ki choon kɔɔr ikinken man yan a daag pɔɔ, ki jiɛn Uwonbɔr. Le Uyudaan loor u sufu le u chee tibɔr tan wee Pɔɔl pagin.

¹⁵ Taah nan fun u ma nin u niin yaab Uwonbɔr a nyunfulin, le u gɔɔ ti ke ti jo u niin. Le ki ke, “Ni ye ni sin nyi ke n ŋa ti Yudaau yada ke, ni li chaan ki nan be n niin.” Le u balin ti le ti jon.

Baah loon Pɔɔl nin Silasi Filipi a tiŋin man

¹⁶ Weemba le ti nan chaa baah miɛ Uwonbɔr nan yaan nin, taah nan chaa-n, le kibisiɛg ki ba to ti nsan, u nan ye uyom le. Le kinaaŋ be u bu le ki ŋa u uninligir. Waah nan ye uninligir nbu, u nan ga ilig takpem ki tenn u dam.

¹⁷ Le kibisiɛgin nɔɔ Pɔɔl nin tim ban gurin a bɔɔn ki tann papaab ke, “Bininfob nan ye Uwonbɔr wan kaa jɔɔ kpiɛg nan a toontum le, le ki bei ni naah li ŋa man ki kan nŋmarim.”

¹⁸ U le nan ŋaan man le lidaal biɛn. Waah ŋaan man ni le Pɔɔl a ŋuul nan fii, le u gbiɛ lig u le ki bei kinaaŋ kan be u ni nmɔn ke, “Yisa Masiya a yinl bu, n ke a nyam u ni.” Libol nmɔn le kinaaŋin nyan u ni.

¹⁹ Kiyom bisiɛg nmɔn a dam kaah nan biɛ ke baa ji li kan ilig kibisiɛgin ban nin, le bi choo Pɔɔl nin Silasi ki dar bi jon kitiŋ nmɔn a bɔjib ban kinyaŋin ban jɔɔ tininkper a pɔɔm ban.

²⁰ Baah ta bi foo ubɔjir ban n-yonn man nin, le bi bei u ke, “Bininfob nan ye Juu yaab le, ki jɔɔ kuŋmaruŋ ti tiŋ nan yaan,

²¹ ki wɔɔn ke ti chee ki li ŋaan likaal lan wee Rom yaab a siim kaa chee.”

²² Le kuninfogbaluŋin kpiɛ bibɔjibin bu, le bi bei bi ke bin pir Pɔɔl nin Silasi ki boo ba.

²³ Baah nan boo bi nmɔn a bɔɔn le bi ta bi ki ŋa kuloondiigin, le ki bei uloondiiguurin ke u li mann guu bi nbamɔma.

²⁴ Waah nan gbir man nin, le u ta bi ŋa kuloondiig kan be poolinpoolin nin, le ki baan bi tibaandaar.

²⁵ Le kunyiɛgtasiig le Pɔɔl nin Silasi nan miɛ Uwonbɔr ki gaa liwonpagil a lai-n ki pagir Uwonbɔr, le ban loo kpiɛ bi bu-n nin pelig.

²⁶ Libol nmɔn le kitiŋ dam, le kuloondiig nmɔn a fiɛl tɔɔl nan dam dam. Le tidir a timansanmɔɔŋi loor nba bu, le baah nan baan bi tibaandaar tan ni choo gɔgir lu.

²⁷ Iyaayoo le wan guu kuloondiigin fii njiɛmin, ki miin tidir biɛn a timansanmɔɔŋi loor le ki yaa yaa, le u nyi ke baah loon ban nin biɛn guun na, le u nan fɔɔ u tɔb a jug ke un ku uba.

²⁸ Amaa le Pɔɔl tiɛn ki ke, “Laa sei a baa kidaŋi! Ti biɛn be doo!”

²⁹ Le uloondiiguurin ke bin sei nŋmi ni, le ki guun kɔɔ weem ki jegil, ki tan gbaan tum Pɔɔl nin Silasi a nintogil.

³⁰ Le u nan ta bi ki nyan tan baan bi, “N yin ŋa ni wee ki kan feegabaa?”

³¹ Le bi jiin bei u ke, “Ŋaam Uyudaan Yisa yada, wee ki kan feegab, fin nin a niin yaab biɛn.”

³² Le bi nan pag Uyudaan a bɔr ki sei u ma nin ban be u niin nmɔn biɛn.

³³ Lidaal a nyiɛg, le uloondiiguurin nan ŋunn bi biɛi; le u ma nin u niin yaab biɛn nan gaa Uwonbɔr a nyunful.

³⁴ Le u nan ta Pɔɔl nin Silasi ki kɔɔ u niin le ki sei bi tijiir; ni nan mɔŋ u le, nan bu-n u ma nin u niin yaab biɛn kaah nan ŋa Uwonbɔr yada nbu.

³⁵ Naah nan won kutaagin, le Rom yaab a bɔjib nan tun bi tooi uloondiiguurin ban ke: “Nyan bininfob nmɔn ki jaau.”

³⁶ Le uloondiiguurin bei Pɔɔl ke, “Bibɔjib tun bi tooi ni ke n che fin nin Silasi nya kuloondiigin n-yaan na, ni li fir n nya. Ni li chaa nin nposɔɔn na.”

³⁷ Amaa le Pɔɔl bei bi ke: “Baa la jin ti tibɔri, amaa bi won boo ti kuninfogbaluŋ a numin na, hali nin taah le ye Rom yaab nna, le ki won ta ti ki ŋa kuloondiigin, le daandaan nan bi nin ban bin woon ki nyan taa? Aai! See ke bi baantɔɔl dan ki nan nyan ti.”

³⁸ Le itoon nin nan jir ki tan bei bibɔjibin man, baah nan gbir ke Pɔɔl nin Silasi ye Rom yaabin le bijawaam choo bi.

³⁹ Le bi jon Pɔɔl nin Silasi ban ki tan fa bi tisandann, le ki nyan bi kuloondiigin, ki balin bi ke, bin nya bi tiŋin na.

⁴⁰ Pɔɔl nin Silasi kaah nan nyan kuloondiig nmɔn a bɔɔn, bi nan jon tan kɔɔ Lidiya a niin le. Nin yaan le bi nan lagin biwonjiɛm ki pɔɔg bi sufu. Le bi nin fɔɔr kitiŋ nmɔn yaan.