Lituln 12 - UWONBƆR A GBƆNPƆŊ LIKƆƆNL

Biwonjiɛm kaah kan limugil takpem man

¹ Iyaayoo nmɔn le Ubɔr Herɔd nan choo biwonjiɛm bibam, ki ban un mugir bi.

² U nan che bi ta takoobi le ki ku Jemisi wan ye Jɔnn a kpelin.

³ Waah ŋa man, ki biɛ ke Juu yaab a sufu penn nin, le u che bi choo Piita mu. Ni nan ŋa ki yegin yuglagir a chiig kan wee bi ŋma boroboro kan kaa jɔɔ nnyɔgin a yonn le.

⁴ Baah choo Piita nan, ni bɔɔn bu le bi ta u ŋa kuloondiigin le ki che bitɔtogib bina na a kerim mina guu u ki kpenn tab. Ubɔr Herɔd nan lol ke yuglagir a chiig a jiir a jim nmɔn a yonn jon ke, u li nyan Piita kuloondiigin, ki ta u siin kuninfogbaluŋ a numbimin ki ji u tibɔr.

⁵ Piita kaah nan be kuloondiigin nin, amaa le biwonjiɛm a laguŋ mu nan miɛ Uwonbɔr linunmanl ki tenn u.

Piita kaah nyan kuloondiigin man

⁶ Herɔd nan lol ke ni won njakpanyiɛn ke, u li nyan Piita ki ji u tibɔr, le Piita dɔ biguguub bilee a sisiigin ki jiɛn le bi ta tikulor tilee ki baan u, le ban guun nmɔn a ni bibam mu guu kuloondiigin a timansanmɔnn.

⁷ Libol nmɔn le Uyudaan a malaka degirin, le nwonween wonn kuloondiig nmɔn yaan. Le u dam dam Piita a bɔsipar ki fiin u, ki bei u ke, “Fii weema.” Le tikulorin pir ki lu.

⁸ Le malaka n bei u ke, “Yeem a wan yɔɔr ki tag a naatagiya.” Le Piita ŋa man. Le malaka n ji bei u ke, “Ta a kinkenl gaba ki li nɔɔm ni.”

⁹ Le u nɔɔ u, le bi nyan kuloondiig n-yaan, amaa le kaa biɛ ke malaka-n kaah tun nan nin ye ibamɔn le, ki nyi ke u kan zii le.

¹⁰ Le bi nan jon lagir chinchinn a guguuru n bu, le ki ji lagir umiɛn nin bu, ki nin tan foo tikur a naanganl lan leg ntimansanmɔnn man chaa kitiŋ poolin nin. Le linaanganl nmɔn loor litɔɔl ki sei bi, le bi n-yaan nkaafiin. Ki nɔɔ nsan ki chaa, le malaka-n bor ki jiɛn Piita.

¹¹ Le Piita a num wonn, le u len ke, “Daandaan nan le n nin biɛ ke ni sin ye ibamɔn le ke Uwonbɔr le tun u malaka le u dan nan nyam Herɔd a nɔɔn, ki ji nyam Juu yaab kaah bi ban bin ŋam man nin.”

¹² Waah biɛ man nin bu, le u jon Jɔnn Mag a na Meri a niin, ki miin bininfob takpem pii lagin niin ki miɛ Uwonbɔr le.

¹³ Le Piita kpaar kpaar nkaafiin a naanganl, le usapɔɔn toontunn, wan a yinl ye Roda dan linaanganl nmɔn ban ke un jee ŋma yen naa.

¹⁴ Le ki biɛ Piita a niɛn, ki guun jir bininfobin ban nin nmɔn takpen, le kaa ji loor linaanganlin ni, ki tan bei bi ke, “Piita be nkaafiin.”

¹⁵ Le bi bei u ke, “A waar le.” Waah nan gbaa pag bi ke ni sin ye man nin, le bi ke, “Ni li ye u tinaaŋ le.”

¹⁶ Amaa le Piita le si ki kpaar linaanganl, le bi nan loor linaanganl nmɔn ki kan u, le ni gar bi.

¹⁷ Le u don u nɔɔ ke bin ŋmin tifura, le ki wɔɔn bi Uyudaan kaah nyan u kuloondiigin man. Le u bei bi ke, “Ni li chaa ki tan bei Jemisi nin biwonjiɛmin nan tun nan a bɔr,” le u fɔɔr jiɛn bi ki yaar jon niba paam.

¹⁸ Naah nan wonn kutaag, le ni mug ban guu kuloondiigin, kaa ye wama, nan bu-n baa nyi Piita kaah be nan yaan ni.

¹⁹ Le Herɔd sei bimɔb ke bin ban u ni, le bi ban ban kaa kan wi, le u baan ban guu kuloondiigin ibinbaan, ki sei nsan ke bin ku ba. Ni bɔɔn bu le Herɔd nyan Judiya ki jiir Sizariya, ki tan be nin yaan wama.

Herɔd a kum a bɔr

²⁰ Herɔd nan kɔnn Taya nin Sidom yaab le; le bi lagin tab ki ban nsan bin tan kan u. Baah nan kan nsan nmɔn Basitusi wan ye ubɔr Herɔd a toontunn wan wee u nan ŋau yada nban nin, le bi faa u tisandann, nan bu-n bi jiir nan nya ubɔr n yaa tiŋin le.

²¹ Le ubɔr Herɔd gann lidaal liba, ki yee u naam a daala ki nyan nan kal u naangbɔŋ bu, le ki pag sei bininfobin.

²² Le bi tiɛn ke, “Likukɔl nan ye nween a kukɔl le, naa ye uninfosaali.”

²³ Libol nmɔn le Uyudaan a malaka che kuwiɛnbirug choo Herɔd le igoor jin u le u kpo, waah kaa nan pagir Uwonbɔr nbu.

²⁴ Amaa le Uwonbɔr a bɔr mann mɔɔn ki yan kɔɔ bininfobin.

²⁵ N-yonn man wee Banabasi nin Sɔɔl diɛ bi toon yan wee bi nan jon ke bin tan tun nin, le bi ta Jɔnn Mag ki nyan Jerusalam ki jir kun Antiɛg.