Lituln 11 - UWONBƆR A GBƆNPƆŊ LIKƆƆNL

Piita kaah tan wɔɔn Jerusalam a wonjiɛm a laguŋ man

¹ Iyaayoo Yisa a tooi nin biwonjiɛm ban be Judiya a tingbɔŋin biɛn gbir ke ban kaa ye Juu yaab n mu gaa Uwonbɔr a bɔrin na.

² Ni bu Piita kaah nan jon Jerusalam nan, le ban tiɛr ke lipunl a jiim kpaa ki sei biwonjiɛm biɛn ni, nan pag bii u,

³ ki bei u ke, “A kɔɔ ban kaa jii bi pun a niin le, ki ji lagin jin nin bi.”

⁴ Le Piita piin ki pag wɔɔn bi a li ke naah tun man nin:

⁵ “N nan be Jopa a tiŋin le ki miɛ Uwonbɔr, le ki kan zii, le n kan niwann niba nyan papaab. Ni nan nann likinkenl le, ki peen, ki jɔɔ imɔgban ina ki jiirin ki nan sir n ban.

⁶ Le n lig ki kan tiwankor tan jɔɔ itaa ina, nin ipiɛl, nin tiwanfuul wann nin nnɔɔm man laan paab.

⁷ Le n gbir likukɔl len ke, ‘Piita fiiu, ki ku ki ŋman.’

⁸ Le n ke, ‘Ibamɔn buu Uyudaan! Maa la nyi jin niwann nan kaa be kasi bee niwann nan kaa ŋan ni.’

⁹ Le likukɔl ji mann nyan paab ki len ke, ‘Laa yin nan wee Uwonbɔr ŋa ni kasi, ke naa ŋan ni.’

¹⁰ Ni nan ŋa man le ki tan kpaa nfimitaa, le ki ji jir don paab.

¹¹ “Libol nmɔn le baah nan tun bijab bita ban n ban nin, nan sir maah be iniin yan yaan nin. Bi nan nyan Sizariya a tiŋin le.

¹² Le Kinaaŋ beim ke n nɔɔ bi ki laa yii. Le biwonjiɛm ban be Jopa a tiŋin nin, bi biloob mu nan chiɛnim le ti jon Sizariya, le ti biɛn foo ki kɔɔ Kɔnelu a niin.

¹³ Le u bei ti malaka kaah foon u niin man ki nan bei u ke un tun uba Jopa, wee un tan yin uja wan wee bi yi u ke Simɔnn, wee u yinl liba ji ye Piita nan.

¹⁴ U li pag tibɔr ki seiŋ wee fin nin a niin yaab biɛn n kan feeja.

¹⁵ “Maah piin tibɔr nan a pagim n-yonn man nin, le Kasi a Naaŋ jiirin bi bu, ke waah pii nan jiirin ti bu npiinimin man nin.

¹⁶ Le n tiɛr Uyudaan kaah nan len man nin, ‘Jɔnn nan fun ni Uwonbɔr a nyunful le, amaa nim ma yin gbee nin Kasi a Naaŋ le.’

¹⁷ Ke, ni ye Uwonbɔr sin pu bi ke waah pu tim ban ŋa Uyudaan Masiya yada-n ke, n mu ye ŋma wee ki ke n yii wee Uwonbɔr kaah len man n laa tun naa?”

¹⁸ Baah nan gbir man n-yonn man nin, le bi jiɛn tifur, le ki don Uwonbɔr a yinl, ki len ke, “Uwonbɔr che ban kaa ye Juu yaabin kpenn bi binbema, ke bi mu n kan limiɛfol.”

Antiɛg a wonjiɛm a laguŋ

¹⁹ Yisa a bɔɔnɔɔb ban nan kan limugil Sitifin a kum a yonn nin, bi nan worin le ki jon ntim man fɔg, ki tan kpaa Fonisiya, nin Saipuru, nin Antiɛg ki jɔɔ Yisa a bɔr ki mɔɔn tenn Juu yaab a binba.

²⁰ Le Yisa a bɔɔnɔɔb biba nyan Saipuru, nin Sarene ki jon Antiɛg, ki tan be mɔɔn ti Uyudaan Yisa a bɔŋann nin ki tenn ban kaa ye Juu yaabin.

²¹ Le Uyudaan a pɔɔm be nin bi, le bininfob takpem ŋa yada ki kpenn bi binbem ki sei Uyudaan.

²² Biwonjiɛm a laguŋ kan be Jerusalam nan gbir tibɔr nmɔn le ki tun Banabasi jon Antiɛg a tiŋin.

²³ Waah nan tan foo niin ki kan Uwonbɔr kaah sei bi literil man nin, le ni mɔŋ u, le u kɔɔn bi biɛn lipoobil, ki bei bi ke bi li nɔɔ Uyudaan nin bi sufu biɛn nin ibamɔn.

²⁴ Banabasi nan ye uninfoŋan le, ki gbee nin Kasi a Naaŋ nin yada, le ki nan ta-n bininfob takpem ki sei Uyudaan.

²⁵ Le Banabasi jon Tarsusi a tiŋin, ke un tan ban Sɔɔl,

²⁶ waah nan tan kan win, le u ta u jirin Antiɛg. Libinmunl le Banabasi nin Sɔɔl nan be nin biwonjiɛm a laguŋ ki wɔɔn bininfob takpem. Bi bɔɔnɔɔb nmɔn le nan ye chinchinn a wonjiɛm Antiɛg a tiŋin.

²⁷ Iyaayoo nmɔn le bilinlem biba nyan Jerusalam, ki dan Antiɛg a tiŋin.

²⁸ Bi ni uba a yinl le nan ye Agabu. Le Kinaaŋ nan che u len ke nkom takpem li lu Rom yaab a tingbɔŋin. (Le nkom nmɔn sin nan lu n-yonn man wee Kuladiyasi nan ye uyudaan nin).

²⁹ Le Yisa a bɔɔnɔɔbin lol ke bin ter biwonjiɛn tab ban be Judiya a tiŋin uninfo biɛn kaah li fir man a tarig.

³⁰ Le bi sin nan ŋa man, ki ta bi teril nmɔn tun Banabasi nin Sɔɔl, ke bin ta tan sei biwonjiɛn sanliib n na.