Kolosiya 4 - UWONBƆR A GBƆNPƆŊ LIKƆƆNL

¹ Biyudam, ni li ŋaan ni yomi tiŋann nin nan kpaan na, nan bu-n, ni nyi ke ni tɔɔl jɔɔ Uyudaan wan be paab.

Nwɔɔnim

² Ni li ta ni ba ki sei liwonmiɛl, ki li guu ni ba ki tenn Uwonbɔr kunɔɔpooga.

³ Ki ji li miɛ U ki tenn ti, wee Uwonbɔr n loor nsan ki sei ti mɔleen yin, wee ti fir mɔɔn Masiya a bɔwoonkaarin, nan bu-n, tan bu wee n be libaalin ni.

⁴ Ni li miɛ Uwonbɔr ki tenn ma wee n fir mɔɔn ti nbamɔm, ke naah kpaa n mɔɔn ti man nin.

⁵ Ni chee ni num li ween nin naah be nin ban kaa nɔɔ Yisa nan, wee ki laa bii ni saŋi yan biɛn wee ni kan ni.

⁶ Ni che ni bɔr a pagim li gbee nin linyunyunbasanl ki mɔ ke n-yaamin, wee ni li nyi naah li jiin bininfob biɛn a binbaan yin man.

Ipoor yan joor

⁷ Tachikusi li bei ni n bɔr biɛn, u ye ki na big jiɛkaag le wan si bogil liba u toon yin ki ye ti toontunn kpiɛg Uyudaan a toon yin,

⁸ nan bu wee n tun u ni ban ye ni biɛ ti binbem kaah ye man, wee un pɔɔg ni sufu.

⁹ Uma nin Onesemosi le yin nɔɔ dan, wan ye ti na big jiɛkaag ki si bogil liba-n, ki ye ni ni uba-n. Bi li bei ni nan biɛn ŋaan do.

¹⁰ Arisitakusi, wan wee bi loon u ki kpiɛ n bu-n, u mu poor ni. Le Banabasi a pool a bija Mag mu poor ni. (N pii nan wɔɔn ni u bɔra; ni ye u nan foon ni ban ke, ni gaam u.)

¹¹ Josuwa wan wee bi yi Jasitusi mu poor ni. Bijab bita nmɔn le ye Juu a ninfob ban kpiɛg n bu wee ti tun Uwonbɔr a naam a toon yin nmɔn. Bi sɔŋir n sufu pam.

¹² Epafarasi, wan ye ni ni uba wee ki ji ye ni toontunn kpiɛg Masiya a toon nin mu poor ni. U miɛ Uwonbɔr le nin linunmanl iyoo biɛn ki tenn ni, ke ni sir kenken ki li ye bininfob chegirikaab ban tun Uwonbɔr a bam.

¹³ N jin siɛra ke u sin tun nin linunmanl ki sei nim nin Laodisiya a tiŋ a ninfob nin Herapolisi a tiŋ a ninfoba.

¹⁴ Ti jɔ Lug, wan ye utebirin, uma nin Demasi mu poor ni.

¹⁵ Ni poor ti nabum ban be Laodisiya nna, ki ji poor ti ninsa Ninfa nin biwonjiɛm a laguŋ kan be u niin ni.

¹⁶ Ni karin kugbɔŋ nan ki diɛ a bɔɔn ke, ni pɔɔn niba wee bin karin ki, ki sei biwonjiɛm a laguŋ kan be Laodisiya nna wee ni mu n karin kugbɔŋ kan be Laodisiya a wonjiɛm ban nin na.

¹⁷ Ni bei Achipusi ke “Pɔɔn a ba ki diɛ litoonl lan wee Uyudaan nan ta seiŋ ke a tun nin na.”

¹⁸ Min, Pɔɔl, n tɔɔl a nɔɔ le n ta ki sɔb ipoor nan. Ni laa tam n baalin bu. Uwonbɔr a nyunyunbasanl li be ni bu.