Juud 1 - UWONBƆR A GBƆNPƆŊ LIKƆƆNL

¹ Min Juud wan ye Yisa Masiya a toontunnu ki ye Jemisi a nabigin, Le sɔb kugbɔŋ nan tenn bininfob ban wee Uwonbɔr yin bin, wee bi ye Uwonbɔr a ninfob jiɛkaab wee Yisa Masiya ŋmag bin:

² Uwonbɔr a nyunyunbaag nin nposɔɔn nin njiɛm li be nin ni takpem.

Ban wɔɔn tibɔkar

³ N jɔtiib, hali maah nan jɔɔ inunman ke n sɔb kugbɔŋ ki sei ni ki ta jiin nŋmarim man wee ti nan por nin tabin paami, n lig ki miin ni kpaa le nin n sɔb ki balin ni wee ni li kɔn yada kan wee Uwonbɔr nan ta ŋubin u ninfogannkaabin a nɔɔn nin buu.

⁴ Ni ma bu bininfob bibam woon ki kɔɔ ni sisiigin na, ban wee bi nan sɔb bi bɔr ke bi li bii bin. Bi ye ban kaa jiɛn Nween le, bi ye ban labir ti Wonbɔru a nyunyunbasanl a bɔrin le, ki nɔɔ iwanchɔgin toon, ki yii Yisa Masiya wan ye ti bɔru nin ti yudaau win.

⁵ Hali naah le pii nyi ni niɛ nan biɛn bu-n, n ban n tiɛr ni le ke Uyudaan nan nyan U ninfob Ijibir a tiŋin na, amaa ni bɔɔn bu U nan bii ban kaa nan ŋa U yada-n na.

⁶ Le malakam ban kaa nan ŋmag bi ninkper a pɔɔm a sisibol amaa wee ki fɔɔr bi baantɔɔl a niin yin nin, Uwonbɔr ta ni niɛ le ŋa libunbɔnlin, ki lol bi tikulor tan kaa jɔɔ chiim ki guu tibɔr a jim lidaal takpenlin daal.

⁷ Ni ye man le a li ke, Sodom nin Gomoriya nin ntim man nan mal bin a ninfob kaah nan tun iwanchɔgin toon bi piibanlin nin bi jabanlin nin ichɔgin. Bi ma ye limagil ki wɔɔn ban nan yin kɔɔ nŋmi-n a fala a jim kaah na li ye man.

⁸ Man mu jigin, ban dɔgin man nmɔn bii bi baantɔɔl a gbanann le, le ki yiin tininkper a pɔɔm, ki jɔɔ kutingbiig ki tenn paab a wann naan wann tan fo.

⁹ Amaa hali malakam a ninkpelu Maakil, nin Sintani kaah nan far limɔkpel nin tab ulinlenn Moziz a gbanann bu-n, waa nan chee ki jɔɔ kutingbiig a galin nin Sintani, amaa le ki len ke, “Uyudaan li fuun a bu!”

¹⁰ Amaa bininfob nan ma sugir niwann nan biɛn wee baa biɛ le nin tiwann tan wee bi nyi wee kaa jɔɔ nlamgɔrikaami, ke tiwankor tan kaa jɔɔ potiɛlin, tiwann nmɔn le bii bi.

¹¹ Bi woo tibɔbir be bi bu! Bi gaa Kenn a toon le, bi ban tinyɔɔr le weem weem le ki kɔɔ Balaam kaah kɔnn nin bininkpeeb; le ni bii bi Kɔra mɔyiilin bu.

¹² Bininfob nan ŋaan ni mɔkpaam a jiirin le tijaginn, bi lagin ji nin ni le ke ifa kaa jɔɔ bi, bi ye bipeekpaab ban jinn biba le ki jiɛn tiwankor. Bi nann titalangbann tan kaa jɔɔ utaal wee ntafaam daar mi chaa-n le, ki nann lipiɛl a siigi yan a far soor wee yaa jɔɔ iloon nin ki ŋab lu, wee ki kpo nfim milee-n.

¹³ Bi nann limɔgil a nyungbann tan fii takpemin le, le bi fai a toon nmɔn nann ke bichiib a puugin. Bi nann iŋmabil yan chon jin le. Uwonbɔr pii mann libunbɔnjal le li si guu bi.

¹⁴ Enog wan ye Adam a yaabisagira bilile nan, nan pag ilinlen leen ki jiin bininfob nan paama: “Lig, Uyudaan nin U kasidam tuturil a turil le chaan nin,

¹⁵ ke un ji uninfo biɛn tibɔr, ki choo ban kaa ye biwonjiɛm biɛn baah nɔɔ nan kaa ye liwonjiɛnl a sam ki ŋaan tiŋaar tan kaa ye Liwonjiɛnl a ŋaarin bu, nin titintann a mɔleen yan wee tibirdam ban kaa ye biwonjiɛm pag ki galin Uwonbɔr nan.”

¹⁶ Bininfob nmɔn ŋulin le ki ban bitab a galin; bi nɔɔ bi baantɔɔl a gbanann a kɔlisa; ki far bi tɔɔl a gbingban ki jɔɔ nmɔmɔn nin bininfob bi tɔɔl a nyɔɔr bu.

Ikpaan nin n wɔɔnim

¹⁷ Amaa, n jɔtiib, ni li tiɛr nan wee ti Yudaau Yisa Masiya a tooi pii nan pagin buu.

¹⁸ Bi nan bei ni ke, “Iyoo yan na yin joorin, ban yɔɔlin na li be, ki nɔɔ bitɔɔl a wonjiɛnl a kɔlisa birug.”

¹⁹ Bi ma ye bininfob ban bɔgir ni, ki nɔɔ bi gbanann kaah ban man wee kaa jɔɔ Kinaaŋin.

²⁰ Amaa nim, n jɔtiib, ni li kpiɛg ni ba ni kasi a yada wee ki li miɛ Kasi a Naaŋ.

²¹ Ni li ŋmag niba Uwonbɔr a jiɛmin yaan na, ki li guu Uyudaau Yisa Masiya a nyunyunbasanl lan na yin ta ni ki kɔɔ limiɛfol lan kaa jɔɔ ndiɛmin yaan.

²² Ni li san bininfob ban jɔɔ nbiɛnimin kunyunyunbaaga;

²³ ni yug ni tab nŋmi ni ki fee bi gaba, le bitab mu ni li san bi kunyunyunbaaga ki ŋmarin bijawaam, wee ki li nan bi wanyeewann tan wee kuŋmaruŋ a gbanann ngbarin.

Npagim a wonmiɛl

²⁴ Uwonbɔr wan li fir ŋmag ni wee ni laa lu-n, U li ta ni ki siin U nintogil U pag kan kaa jɔɔ igalin ki jɔɔ nmɔn takpen nin bu.

²⁵ Ti sei Uwonbɔr wan be U binba wan ye ti feeru ki jɔɔ kupag, nin jilima, nin npɔɔn, nin tininkper a pɔɔm, ti Yudaau Yisa Masiya a yinlin, iyoo yan nan jon nin, nin daandaan nan nin iyoo yan kaa jɔɔ diɛm! Ibamɔn.