Jɔnn 9 - UWONBƆR A GBƆNPƆŊ LIKƆƆNL

Yisa Teb Uja Wan Bi Nan Ma U Nin Tijɔɔn

¹ Waah nan chaa-n, le u nan kan uja wan bi nan ma u nin tijɔɔn.

² Le u bɔɔnɔɔbin baan u ke, “Wan wɔɔn, ŋma nan ŋa tibira, uja nan bee u baa nin u naa, wee bi nan ma u nin tijɔɔn naa?”

³ Le Yisa ke, “Naa ye uja nan bee u baa nin u na le ŋa tibiri, amaa ni sei yaag le ke bininfob nkan Uwonbɔr a pɔɔm kaah yin tun man u miɛfolin.

⁴ Naah le la ye nweehn nan, ni ye ti tun wan nan tumin a toon le. Kunyiɛg chaan, le uba kaa li fir tun ni.

⁵ Maah la be dulinya nan yaan nan, min le ye dulinya nan a wonweem.”

⁶ Waah nan len nan nin, le u sii timɔsann ki jaa tum, le ki ŋmarin titann nin timɔsann nin, le ki taa ŋa uja-n a numbili.”

⁷ Le ki bei u ke, “Li chaau, tan ŋunn a num Siloom a biɛŋin. (Siloom a taai le ye bi nan tun). Le bi nan ta u jon ki tan ŋunn u num, le u jir kun ki nin ga.

⁸ Le u kunkɔɔn tab nin ban nan nyi kan waah miɛ-n nan baan, “Naa ye uja wan nan ti ka ki miɛ-n sɔɔ?”

⁹ Le biba nan ke uma le yen. Le biba mu ke, “Aai, waa ye wan miɛ-n ni, u nann u le.” Amaa le uja-n baantɔɔl yii ke, “Min le yen.”

¹⁰ Le bi baan ke, “Ni ŋa nii a num ligiraa?”

¹¹ Le u jiin ke, “Uja wan wee bi yi u ke Yisa-n le nan ta titansɔɔn ki ŋa n numbili yin. Le ki biɛm ke n li chaa Siloom ki tan ŋunn n numa. Le n jon ki tan ŋunn, tɔ le n nin gaa.”

¹² Le bi baan u ke, “Uja nmɔn be laa?” Le u ke, “Maa nyi.”

Farasii Yaab Kaah Feen Kutebugin Bu Man

¹³ Le bi nan ta uja wan nan jɔɔn nin ki dan Farasii yaab ban.

¹⁴ Lidaal lan wee Yisa nan ta titansɔɔn ki ligir uja-n a numin nan ye likpakɔɔl daal le.

¹⁵ Mambu le Farasii yaabin mu nan baan uja-n naah nan ŋa man wee u num nan ligir. Le uja-n jiin ke, “U nan ta titansɔɔn le ki ŋa n numbili yin, le n tan ŋunn, le ki ligir.”

¹⁶ Le Farasii yaab biba len ke, “Uja nan kaa nyan Uwonbɔr ban ni, nan bu-n waa ŋmag likpakɔɔl daali.” Amaa le biba baan ke, “Tibirdaan yin ŋa niin ki ŋa ligaril a siɛram nan naa?” Le bi potiɛm nan bɔgir.

¹⁷ Ni joorim le bi ji nan labir ki baan ujɔɔn nin ke, “Naah ye a yaa num le u ligirin, a yin ke baa ki jiin u paamaa?” Le uja-n jiin ke, “U ye ulinlenn le.”

¹⁸ Juu yaabin kaa le nan ŋa yada ke uja wan nin nan gaa-n nan ye ujɔɔn le, man ke baah nin nan tun yin u baa nin u na-n.

¹⁹ Le bi nan baan bi ke, “Ni bija sɔɔ? U ma le ni nan ke bi nan ma u nin tijɔɔn nin naa? Ni ŋa nii wee daandaan nan u ligiraa?”

²⁰ Le u baa nin u na jiin ke, “Ti nyi waah ye ti bija, le ki ji nyi taah nan ma u nin tijɔɔn.

²¹ Amaa naah ŋa man wee u ligirin, bee wan ligir u numin ma, taa nyi. Baan u. U choo tininkpera; u li fir pag u baantɔɔl.”

²² Nan bu wee u baa nin u na nan len man nin, bi nan san Juu yaab ban pii nan bon ke wan biɛn chee ke Yisa le ye Masiya-n ke bi li nyan udaan kuwonjiɛndiigin.

²³ Man bu le u baa nin u na nan ke, “U choo tininkpera; baan u.”

²⁴ Le bi ji nan yin uja wan nan jɔɔn nin, le ki ke, “Pag Uwonbɔr a ti nyi uja nan kaah ye tibir daan.”

²⁵ Le uja-n jiin ke, “U ye tibir daan nin waah ye ke, maa nyi. Maah nyi nan ye, n nan jɔɔn na le daandaan nan n ligira!”

²⁶ Le bi baan u ke, “U ŋaaŋ niin? U ligir a num niin?”

²⁷ Le u jiin ke, “N pii bei na le naa peligi. Ba ŋa ni ji ban ni gbir aa? Bee ni mu ban ni ŋa u bɔɔnɔɔb lee?”

²⁸ Le bi sugir u ki ke, “A ye uninfo nan a bɔɔnɔɔru le! Tim ye Moziz a bɔɔnɔɔb le!

²⁹ Ti nyi Uwonbɔr kaah nan pag sei Moziz, amaa uninfo nan ma, taa pii nyi waah nyan nan yaan ni.”

³⁰ Le uja-n jiin ke, “Man ke ni ye nan wee bi nan li tiɛr le! Naa nyi waah nyan nan yaan ni, u mu li ligir n num.

³¹ Ti nyi ke Uwonbɔr kaa pelig tibirdam a wonmiɛli. U pelig wan nyi Uwonbɔr ki tun u bamin a wonmiɛl le.

³² Uba kaa la nyi gbir ke bi ligir uja wan bi nan ma u nin tijɔɔn a numi.

³³ Ni ye ke uja nan kaa nan bi nyan Uwonbɔr ban ke, waa nan bi li fir ŋa niba.”

³⁴ Le bi jiin u ke, “Fin wan bi nan ma nin tibir nan, a mu ye ŋmiɛ ki li wɔɔn taa!” Le bi ŋɔɔr u kuwonjiɛndiig nmɔn yaan.

Kinaaŋ a Jɔɔnn

³⁵ Yisa nan gbir ke bi ŋɔɔr wan a num nan ligirin kuwonjiɛndiigin na, le u ban kan u, le ki ke, “A ŋa Usaal a Bija yada waa?”

³⁶ Le uja-n nan baan ke, “Uyudaan, ŋma ye waa, beim ni wee n ŋa u yada.”

³⁷ Le Yisa ke, “A nin kan wa, ibamɔn buu, u ma ye wan nin fin pag nan.”

³⁸ Tɔ le uja-n ke, “Uyudaan, n ŋa yadau,” le u gbaan Yisa a nintogil ki jiɛn u.

³⁹ Le Yisa ke, “Libɔjil bu le n dan dulinya nan yaan, wee bijɔɔm nligir le ban lig nlabir bijɔɔm.”

⁴⁰ Farasii yaab biba ban nan be u ban nin nan gbir waah len man le ki baan u ke, “Baa? Ti mu ye bijɔɔm lee?”

⁴¹ Le Yisa len ke, “Ni bi ye bijɔɔm ke, naa bi li jɔɔ tibir a galin yi; amaa naah ke ni num ga nan, ni galin la be.”