Jɔnn 7 - UWONBƆR A GBƆNPƆŊ LIKƆƆNL

Yisa nin U Nabum

¹ Ni bɔɔn bu, le Yisa nan choon gɔnn Galilii a timin, kaa nan ban u li be Judiya, nan bu-n Juu yaab ban nan be niin ni nan si guu le ke bin ku u.

² Amaa Juu yaab a Nanbonn a Chiig a jim kaah nan nan malin,

³ le Yisa a watiib nan bei u ke, “Ni ye a nya doo le ki jo Judiya, wee a bɔɔnɔɔbin fir kan ligaril a siɛram yan wee a ŋaan.

⁴ Wan ban bininfobin biɛ waah ye wan kaa woog waah ŋaan nan ni. Ni ye a ŋaan man ke, ta a ba ki wɔɔn dulinyau.”

⁵ Nan bu-n u baantɔɔl a watiib kaa nan ŋaa u yada.

⁶ Mambu le Yisa nan bei bi ke, “N-yonn man wee ni ye n ŋa-n kaa laa fo; nim bu ke n-yonn biɛn ŋan le.

⁷ Dulinya nan a ninfob kaa li fir nan ni, amaa bi nan min le, nan bu-n n ji siɛra ke bi toon ye titoonbir le.

⁸ Nim li chaa kuchiigin na. Min kaa laa ye n jo kuchiig nmɔn yaan ni, nan bu-n min bu ke, n yaa yonni kaa laa fo.”

⁹ Waah nan len man nin, le u nan paar ki be Galilii.

Yisa kaah nan be Tinanbonn a Chiigin man

¹⁰ Amaa, u nabumin kaah nan jon kuchiigin a bɔɔn, le u mu nan woon ki jon, kaa ban bininfobin kan wi.

¹¹ Tɔ kuchiig nmɔn yaan le Juu yaab nan choon ki ban u le ki baan ke, “Uja nmɔn be laa?”

¹² Yisa a bɔr nan ŋuulin le kuninfogbaluŋ nmɔn yaan. Le biba ke, “U ye uninfoŋan le.” Le biba jiin ke, “Aai, u lar bininfob le.”

¹³ Amaa uba kaa nan pag wee bininfob gbiri, nan bu-n bi nan san Juu yaabin le.

¹⁴ Kuchiig nmɔn a jim nan nan por sisiigin le Yisa nin nan jon tan kɔɔ iwonjiɛn niin a loob ki be wɔɔn bininfob.

¹⁵ Ni nan gar Juu yaabin le bi baan ke, “Uja nan ŋa niin ki kan nbiɛm nan wee kaa sin ye wan tinn aa?”

¹⁶ Le Yisa jiin ke, “N yaa wɔɔmin kaa ye n yaan ni. Mi nya uma wan nan tunimin ban le.

¹⁷ Ni ye wan gann ke un tun Uwonbɔr a bam ke, u li biɛ ke n wɔɔnimin nya Uwonbɔr ban le bee ni ye n tɔɔl a biɛm lee.

¹⁸ Wan pag u tɔɔl a bɔr ke u pag man un kan u tɔɔl a jilima le, amaa wan tun ki ban Uwonbɔr wan nan tun win kan jilima ke u ye ubamɔndaan le; waa jɔɔ igalin iba.

¹⁹ Moziz kaa nan sei ni nsiimin naa? Amaa ni ni uba kaa nɔɔ nsiim nmɔn kaah len man ni. Ba ŋa ni ban ni ku maa?”

²⁰ Le kubabugin jiin ke, “Kinaanbiig le jɔɔŋ. Ŋma gbaar un ku ŋaa?”

²¹ Le Yisa nan bei bi ke, “N nan ŋa ligaril a siɛra liba le, le ni biɛn jee.

²² Ni ma biɛn yɔli, Moziz kaah nan sei ni lipunjiil a siimin (ibamɔn bu ke naa nan nyan Moziz ban ni, amaa ni yaajam ban), le ni jiil kibig a punl likpakɔɔl daal.

²³ Tɔ ni ye ke ni li fir jii kibig a punl likpakɔɔl daal wee Moziz a siimin laa bii ke, babu wee ni ŋuui fii n bu maah teb uninfomun likpakɔɔl daalin naa?

²⁴ Ni jiɛn kununaŋ a bɔjila, wee ki li jɔɔ ibamɔn a bɔjil.”

U ma ye Masiya-n naa?

²⁵ Libol nmɔn yaan le Jerusalam a ninfob biba nan piin ki baan ke, “Naa ye uja nan le bi gbaar ke bin ku naa?

²⁶ U ma sɔ, ki si pag bininfobin npaan nin, le baa pag u niba. Ban jɔɔ tininkper a pɔɔmin chee ke u ma sin ye Masiya waa?

²⁷ Amaa ti nyi uja nan kaah nyan kitiŋ kan; Masiya-n nan foon ke, uba kaa yin nyi waah nyan kitiŋ kan ni.”

²⁸ Yisa kaah la nan be iwonjiɛn niin nin, le u tiɛn paab npɔɔn bu ki ke, “Nn, ni nyim, le ki nyi ma nyan nan yaan. Maa dan do n baantɔɔl a pɔɔm bu, amaa wan nan tunimin le ye ubamɔndaan. Nim kaa nyi wi,

²⁹ amaa min nyi u, nan bu-n uma nan tum le n nyan u ban le ki dan.”

³⁰ Ni nan bu le bininfob ban nan be niin ni nan gbaar ban bin choo u, amaa uba kaa nan taa u nɔɔ paan u bu, nan bu-n u yonni kaa laa nan foo.

³¹ Ni man biɛn nan, bininfob takpem ban nan be kulaguŋin yaan nan ŋa u yada. Le ki ke, “Masiya-n nan foon ke, u li ŋa ligaril a siɛram wee nin jo uja nan kaah ŋa man naa?”

Bi nan tun iwonjiɛn niin a guguubin ke bi tan choo Yisa

³² Farasiim nan gbir kuninfogbaluŋin kaah ŋulin Yisa nin u garil a siɛra bu-n, le biminmanib a yudaau nin Farasiim nan tun iwonjiɛn niin a guguubin ke bin tan choo u.

³³ Le Yisa len ke, “N yin be ni ban n-yonn man kaa fɔg le, ki nin jo wan nan tunimin ban.

³⁴ Ni na li ban n bol, amaa naa na li kami; maah nan yin be nan yaan nin, naa na li fir foon niin ni.”

³⁵ Le Juu yaabin nin baan tab ke, “Uja nan yin jo laa wee taa li fir ban kan waa? U li jo nan yaan wee ti yaa ninfob yaal ki be Girig yaabin ni, ki tan li wɔɔn Girig yaabaa?

³⁶ Waah nan len ke, ‘Ni na li ban n bol, amaa naa na li kami, maah nan yin be nan yaan nin naa na li fir foon niin ni’ a taai yaa?”

Ikpen yan jɔɔ Nnyum man Tenn Limiɛfol

³⁷ Kuchiig nmɔn a joor daal lan ye lidaal takpenlin, le Yisa nan fii sir paab ki tiɛn npɔɔn bu ke, “Ni ye nnyunyum jɔɔ wan ke, ni che un dan n ban ki nan nyu.

³⁸ Wan biɛn ŋaam yada ke Uwonbɔr a mɔleen yin kaah nan len ke, ikpen yan jɔɔ limiɛfol a nyum li puu ki nyann u sufu ni.”

³⁹ Yisa kaah nan pag man nin, u nan len Uwonbɔr a Kasi a Naaŋ kan wee ban ŋa u yada-n na yin ga-n le. Ki nan nan kpaa n-yonn nmɔn nin, Uwonbɔr kaa la nan ta Kinaaŋin ki sei ban ŋa u yada-n ni, nan bu-n Yisa kaa la nan kan kupagi.

Bininfobin kaah nan bɔgir man

⁴⁰ Baah nan gbir u mɔleen yin, le bininfobin biba ke, “Ibamɔn uja nan sin ye ulinlenn nin le.”

⁴¹ Le biba ke, “U ye Masiya-n le.” Amaa le biba ji nan baan ke, “Masiya-n yin ŋa niin ki nyann Galilii?

⁴² Uwonbɔr a mɔleen yin kaa ke Masiya-n na li nya ti baa Defid a niin yaabin nin Betiliham, kitiŋ kan wee Defid nan be-n naa?”

⁴³ Mambu bininfobin a potiɛm nan bɔgir le Yisa bu.

⁴⁴ Biba nan ban bin choo u le, amaa uba kaa nan ta u nɔɔ ki maa wi.

Juu yaab a Ninkper a Pɔɔm kaah kaa Ŋa Yisa Yada man

⁴⁵ Le iwonjiɛn niin a guguubin nan jir biminmanib a ninkpeeb nin Farasiimin ban, le bi baan bi ke, “Ba ŋaa wee naa ta u kɔɔn naa?”

⁴⁶ Le iwonjiɛn niin a guguubin pag npaan nin ke, “Uba kaa la nyi pag ke uja nan ni.”

⁴⁷ Le Farasiimin jiin ke, “Ni ban ni ke u ji lar ni mu le bee?

⁴⁸ Biyudamin a ni uba bee Farasiim ŋa u yada waa?

⁴⁹ Aai! Amaa kuninfogbaluŋ ban kaa nyi nsiimin a niba-n, limɔpool be bi bu.”

⁵⁰ Le Nikodimosi, wan nan chinn jon Yisa ban nin wee ki nan ye bi ni a uba-n baan ke,

⁵¹ “Ti siim laa nyi ku wan wee taa chinn gbir u bɔr wee ki biɛ waah tun nan naa?”

⁵² Le bi jiin ke, “A mu nyan Galilii lee? Lig ni poolin na, wee ki biɛ ke ulinlenn kaa nyann Galilii.”

⁵³ Le bi biɛn nan jir kun bi baantɔɔl a niin yin.