Jɔnn 20 - UWONBƆR A GBƆNPƆŊ LIKƆƆNL

Kukaafoŋ a bɔr

¹ Nyantoom a chinchinn a daal a jakpanyiɛn, wee ni la nan bɔɔn nin, le Meri wan nyan Magidalin nan jon kukaagin yaan ki tan foo ki miin litangbagil lan nan loo kukaagin a mɔbin choo loora.

² Le u nan guun dan Simɔnn Piita nin ubɔɔnɔɔr wan wee Yisa nan jiɛ-n ban, ki bei bi ke, “Bi nyan Uyudaan kukaagin a poolin na, taa nyi baah ta u ŋa nan yaan ni!”

³ Ni ma bu le Piita nin ubɔɔnɔɔr umiɛnin piin lisanchonl ki chaa kukaagin yaan.

⁴ Bi bilee nmɔn biɛn nan gu le, amaa ubɔɔnɔɔr umiɛnin nan guun ki jon jiɛn Piita le ki nan chinn foo kukaagin yaan.

⁵ Le ki bɔɔn ki lig poolin ki kan litanl penlin kaah dɔ niin amaa le kaa kɔɔ poolin ni.

⁶ Le Simɔnn Piita, wan nan paa u bɔɔn nin, foon ki nan jon kɔɔ kukaagin a poolin. U nan kan litanl penlin kaah dɔ man na,

⁷ ki kpiɛ nkum a kinkenl lan nan lol Yisa a yulin. Likinkenl nmɔn nan kpab li tɔɔl le, ki dɔ li binba ki jiɛn litanl penlin.

⁸ Ni joorim ubɔɔnɔɔr umiɛnin, wan nan chinn foo kukaagin yaan nin, mu kɔɔ poolin. Le ki kan ki ŋa yada.

⁹ (Baa le la nan biɛ naah sɔb Uwonbɔr a gbɔŋin ke Yisa ye Un fii nkumin le nni.)

¹⁰ Le bibɔɔnɔɔbin nan jir kun bi niin yin.

Yisa kaah degir Meri wan nyan Magidalin bu man

¹¹ Amaa Meri nan si kukaagin a paab le ki mɔr. Waah nan si ki mɔrin, le ki nan bɔɔn ki lig kukaagin a poolin,

¹² le ki kan malakam bilee kaah yee tiwann penn, ki ka nan yaan wee Yisa a gbanann nan dɔ-n, le uba ka u yul paam, le uba mu ka u taai paam.

¹³ Le malakam nmɔn baan u ke, “Upii ba ŋa wee a mɔraa?” Le u ke, “Bi yuur n yudaau a gbanann le, maa nyi baah ta u ŋa nan yaan ni.”

¹⁴ Nin yaan nmɔn, le u gbiɛ lig ki kan Yisa kaah si niin, amaa waa nan biɛ ke Yisa le yen ni.

¹⁵ Le Yisa baan u ke, “Upii ba ŋa wee a mɔraa? Ŋma wee a ban naa?” Meri wan nyan Magidalin ma nan tiɛr ke ukpaadaan ni le yen, le ki ke, “Uninkpel, ni ye a ta u tan ŋa nan yaan ke, a wɔɔnim ŋaah ta U ŋa nan yaan nmɔn ni, wee n jo ki tan yuur u.”

¹⁶ Le Yisa yin u ke, “Meri.” Le Meri gbiɛ lig U paam ki kuun nkukɔpɔɔn Juu yaab a leen yin Aramayig ke, “Rabboni” (ni taai le ye wan wɔɔnn).

¹⁷ Le Yisa bei u ke, “Laa bibim ki ŋmag mi, nan bu-n maa la jir Baa-n ban ni. Amaa li chaa n nabumin ban ki tan bei bi ke, ‘N chaa jir N Baa nin ni Baa, N Wonbɔru nin ni Wonbɔru win ban le.’ ”

¹⁸ Le Meri wan nyan Magidalin nan ta tibɔr nmɔn ki jon bibɔɔnɔɔbin ban ki tan bei bi ke, “N kan Uyudaan na!” Le ki bei bi waah bi ke un bei bi man nin.

Yisa kaah nan degir u bɔɔnɔɔb bu man

¹⁹ Nnyantoon a chinchinn a weem a daal a jɔɔg, le bi bɔɔnɔɔbin nan lagin be kudiig kiba a poolin, bi nan kpal inaangan le baah nan san Juu yaab bijawaamin bu, le Yisa dan ki nan sir bi sisiigin ki ke, “Nposɔɔn li be nin ni!”

²⁰ Waah nan len man nmɔn a bɔɔn, le u nan ta U nɔɔi nin U logi ki wɔɔn bi. Ni nan mɔŋ bibɔɔnɔɔbin le takpem baah nan kan Uyudaan nin.

²¹ Le Yisa ji nan bei bi ke, “Nposɔɔn li be nin ni! N Baa kaah nan tum man nin, man le n mu tun ni.”

²² Le ki nan foor ki jaa bi bu ki ke, “Ni gaam Kasi a Naaŋ.

²³ Ni ye ni jiɛn ban biɛn a bir ki per bi ke, bi kan jiɛn pera; ni ye naa jiɛn per bi ke, baa kan jiɛn peri.”

Yisa nin Tomasi

²⁴ Tomasi (wan wee bi yi u ke kijaaŋin), ki ye bibɔɔnɔɔbin a ni u baa-n kaa nan be bi ban Yisa kaah nan dan nin ni.

²⁵ Le bibɔɔnɔɔb bimiɛn nin nan bei u ke, “Ti kan Uyudaan na!” Amaa le u nan bei bi ke, “See ke n kan ikpaagin a bon U nɔɔi ni wee ki ta n nɔɔbil ki bɔ nan yaan wee ikpaagin nan kpaa-n, ki ta n nɔɔ ki bɔ U logi yin, naa ye man ke maa yin ŋa yada.”

²⁶ Iween ilile a bɔɔn U bɔɔnɔɔb ji nan be iniin le, le Tomasi nan be bi ban. Hali inaangan nan kpal le, amaa le Yisa kɔɔn ki nan sir bi sisiigin ki bei bi ke, “Nposɔɔn li be nin ni!”

²⁷ Le ki bei Tomasi ke, “Ta a nɔɔbil ki nan bɔ doou; lig n nɔɔi. Tann a nɔɔ ki bɔ n logi a boi nan yaan na ki jiɛn nbiɛnim wee ki ŋa yada.”

²⁸ Le Tomasi bei u ke, “N yudaau nin n Wonbɔru!”

²⁹ Le Yisa bei u ke, “Nan bu-n ŋaah kamin bu, le a ŋa yada; tikaar be ban kaa kan wee ki sin ŋa yada-n bu.”

Nan bu wee bi nan sɔb kugbɔŋ nan

³⁰ Yisa nan tun ligaril a siɛra ibam takpem u bɔɔnɔɔb a numin, le naa sɔb dɔ kugbɔŋ nan a poolin ni.

³¹ Amaa nsɔbim nan ye ni ŋa mi yada le ke Yisa le ye Masiya, Uwonbɔr a Bija, le ni ŋa u yada ke ni li kan limiɛfol u yinlin.