Jɔnn 2 - UWONBƆR A GBƆNPƆŊ LIKƆƆNL

Lipiichanil lan be Kena a tiŋin nin

¹ Iweehn itaa daal le bi nan jɔɔ lipiichanil Kena, kitiŋ kan be Galilii a poolin nin. Yisa a na nan be niin,

² le bi nan bei Yisa nin u bɔɔnɔɔb mu le bi tɔɔl nan dan lipiichanil nmɔn yaan.

³ Ndaam kaah kaa ji nan be-n, le Yisa a na bei u ke, “Baa ji jɔɔ ndaami.”

⁴ Le Yisa jiin ke, “N na, ba ŋa a kɔɔn n nɔɔ niin naa? N yonn ni kaa laa foo.”

⁵ Le u na bei bitoontumin ke, “N bija nan bei ni man ke ni ŋa man na.”

⁶ Itangbag a nyunbunbol iloob nan si mal niin, i yaa bosu le Juu yaab nan ti jɔɔ ŋunn Uwonbɔr a kaal a ŋunnim kuchiig daal, kiba nan kɔɔ iboo iloob ki chaa ilile paam le.

⁷ Le Yisa bei bitoontumin ke, “Ni gbeen inyunbunbol nan nnyuma”; le bi gbeen ki tan kpaan imɔgbeli.

⁸ Le u bei bi ke, “Tɔ ni gbil ki tan sei ban tol itolin a ninkpelu wa.” Le bi ŋa man,

⁹ le uninkpelin nan len nnyum man kpann ndaamin. Waa nan biɛ ma nyan nan yaan ni, amaa bitoontum ban nan gbil nnyumin ma nan nyi. Le u nan yin lipiichanil daan nyan ngbaan

¹⁰ le ki ke, “Bininfob biɛn chinn tol ndaŋam le, le bicham nan gbee ke bi nin tol kidabirug, amaa fin ma woon man ŋan le, ki nin nan jɔɔ mi tol daandaan nan.”

¹¹ Ni ma nan ye u chinchinn a garil a siɛra, lan wee Yisa nan ŋa Kena a tiŋ kan be Galilii a poolin. U nin nan kpiir ki wɔɔn u pag a toon kaah ye man, le u bɔɔnɔɔbin nan ŋa u yada.

¹² Ni bɔɔn bu le u ma nin u na ki kpiɛ u nabum nin u bɔɔnɔɔb nan jir Kapeniɛm a tiŋin. Niin le bi nan tan be iweehn ilee.

Yisa kaah Jon Iwonjiɛn niin man

¹³ Juu yaab a yuglagir a chiig kaah nan malin, le Yisa nan jon don Jerusalam.

¹⁴ U nan kan bijab kaah kɔɔr inaa ki kpiɛ ipee nin ilanjel, le biba mu ka ijal bu ki kpenn ilig iwonjiɛn niin a loob.

¹⁵ Le u ban iŋmin a naalabil, le ki ŋɔɔr ipee nin inaa nin niwann biɛn iwonjiɛn niin nmɔn yaan; u nan yaal biligkpenibin a ligibim le ki labir bi jali ki chigin.

¹⁶ Le ki bei bilanjel kɔɔribin ke, “Ta i ki nya doo! Ni laa nyi ta n Baa a niin ki labir kinyaŋi!”

¹⁷ Le u bɔɔnɔɔbin ni nan tiɛr ke ni nan sɔb le ke: “A niin a jiɛm a nunmanl li kum.”

¹⁸ Le Juu yaab nan baan u ke, “Ba a garil a siɛra wee a li fir wɔɔn ti wee nin wɔɔn ke Uwonbɔr le seiŋ nsan ke a ŋa ni nan biɛn naa?”

¹⁹ Le Yisa jiin bi ke, “Ni worin iwonjiɛn niin nan ke, N ji li fiin i iweehn itaa daal.”

²⁰ Le Juu Yaab jiin ke, “Bi nan taa ibin pina nin iloob le ki maa iwonjiɛn niin nan, le a li ta iweehn itaa ki fiin yaa?”

²¹ Amaa iwonjiɛn niin yan wee Yisa nan pagin nan ye u gbanann le.

²² Waah nan fii nkumin a bɔɔn, le Yisa a bɔɔnɔɔb ni nan tiɛr waah nan len man nin. Le bi nan ŋa Uwonbɔr a gbɔŋ nin imɔleen yan wee u nan pagin yada.

Yisa Nyi Uninfosaal a Wonaaŋ kaah ye man

²³ Tɔ waah nin nan be Jerusalam yuglagir a chiigin ni, bininfob takpem nan kan ligaril a siɛram yan wee u nan ŋaan nin le ki ŋa u yinl yada.

²⁴ Amaa Yisa kaa nan ta u ba ki sei bi, nan bu-n u nan nyi uninfo biɛn a potiɛl.

²⁵ Waa nan ban bininfob nji uninfosaal tab a siɛra, nan bu-n u nan nyi nan be uninfosaal ni.