Jɔnn 19 - UWONBƆR A GBƆNPƆŊ LIKƆƆNL

¹ Le Palati nan ta Yisa sei ki che bi fiɛb u.

² Le bitɔtogib nan ta ikunkon ki loo kiyuchigirig ki ta chigin u yul. Le ki ta daala maŋ geuŋ ki yeen u,

³ le ki le gbaa chaa u ban ki tan bei u ke, “Ti poor Juu yaab a bɔru!” Le ki peb u kitapag.

⁴ Le Palati ji nyan ki tan bei Juu yaabin ke, “Lig, n yin ta u nyann le ki nan sei ni wee ni biɛ ke maa kan nan wee n li ta galin wi.”

⁵ Yisa kaah nan nyann ki chig ikunkon a yuchigirig nin daala maŋin, le Palati bei bi ke, “Uja nmɔn sɔ.”

⁶ Libol nmɔn biminmanib a yudam nin ban guu iwonjiɛn niin nin kaah kan win, le bi tiɛn ki ke, “Ni kpaa mu! Ni kpaa mu!” Amaa le Palati jiin ki bei bi ke, “Ni nan ta u ki tan kpaa mu. Min bu ke, maa kan nan wee n li ta galin wi.”

⁷ Le Juu yaab le yii ki ke, “Ti jɔɔ nsiim, le nsiim nmɔn wɔɔn ke ni ye un kpo le, nan bu-n u ke u ye Uwonbɔr a Bija le.”

⁸ Palati kaah gbir man nin, bijawaam nan mann choo u le,

⁹ le u jir kɔɔ u niin. Le ki baan Yisa ke, “A nyan la ban naa?” Amaa Yisa kaa nan jiin u tibɔri.

¹⁰ Le Palati ke, “A yii le kaa yin pag gar n paam maa? Ŋaa tiɛr ke n jɔɔ npɔɔn man li fir feeŋ jaa bee ki kpa ŋaa?”

¹¹ Le Yisa jiin ki bei u ke, “Ŋaa bi li fir jɔɔ npɔɔn ki jon mi wee naa ye mi nyann paab le. Mambu wan taam ki ŋa a nɔɔn nin jɔɔ tibir takpem.”

¹² Iyaayoo nmɔn, le Palati nin gbaar ban waah li ŋa man ki fee Yisa jaa, le Juu yaab mu le mann tann ki ke, “A jaa uja nan jon ke, ŋaa ji ye Siiza a jɔ. Wan bei ke u ye ubɔr ke udaan yii Siiza le nmɔn.”

¹³ Palati kaah gbir man nin, le u ta Yisa nyann ki nan kal ubɔjir a binbinl bu nan yaan wee bi yi ke kutangbapiig a loobin (Juu yaab a leen yin Aramayig bi yi li Gabata le).

¹⁴ Ni nan ye sili a daal le, ni wonn wee bin ji Yuglagir a chiig a nyantoom le, tikur piig nin tilee a yonn. Le Palati nan bei Juu yaabin ke, “Ni bɔru sɔ.”

¹⁵ Amaa le bi tiɛn ki ke, “Ta u fɔra! Ta u fɔra! Kpaa mu!” Le Palati baan bi ke, “N kpaa ni bɔru waa?” Le biminmanib a yudam bei ke, “Taa jɔɔ ubɔri see Siiza a binba.”

¹⁶ Ni joorimin le Palati nan ta u sei bi ke bin tan kpa mu. Le bitɔtogibin nan gaa Yisa.

Baah kpa Yisa man

¹⁷ Le ki che Yisa tu u tɔɔl a dapunpunl, ki nyan jon nan yaan wee bi yi ke kuyukpabugin (wee Juu yaab a leen yin Aramayig bi yi ke Goligota-n).

¹⁸ Niin le bi nan kpa u, le ki kpaa bijab bilee mu ki kpiɛ u bu, uba be nan bu a logil le utɔ mu be nan bu a logil le Yisa be sisiigin.

¹⁹ Le Palati nan che bi sɔb nsɔbim ki tabin lidapunpunlin bu. Nsɔbim nmɔn nan karin nan le, “YISA WAN NYAN NAZARIF, KI YE JUU YAAB A BƆRU WIN.”

²⁰ Juu yaab takpem le nan karin nsɔbim nmɔn. Nan yaan wee bi nan kpaa Yisa nmɔn nan mal kitiŋ poolin le, nsɔbimin nan sɔb Aramayig nin Latinn nin Girig a leen yin le.

²¹ Le biminmanib a yudam kaa chee Palati bu ki ke, “Laa sɔb ke ‘Juu yaab a bɔru’ wi, amaa sɔb ke uja nan le ke u ye Juu yaab a bɔru win.”

²² Le Palati nan jiin ki bei bi ke, “Maah sɔb man nin, n pii sɔba.”

²³ Bitɔtogibin kaah nan kpaa Yisa n-yonn man nin, le bi por u wann yɔɔr nfimina bu, ki sei tab uba ba, ki nin gur u daala big kan nan be poolin nin. Daala big nmɔn kaa nan jɔɔ nŋalimi, bi nan ta litanmunl liba le ki loo ki nyan paab ki tan kpaa tum.

²⁴ Le bitɔtogibin bei tab ke, “Ni laa che ti choo chiɛ. Ni che ti tɔ inaa ki lig wan li ji daala nmɔn.” Ni niɛ nan nan ŋa ke nin gbeen nan nan sɔb Uwonbɔr a gbɔŋin ke, “Bi por n daalam ki sei tab le ki tɔn inaa n wann yeewann bu.” Man le bitɔtogibin nan ŋa.

²⁵ Le Yisa a na, nin u nawa, nin Meri Kolopasi a poo, nin Meri wan nyan Magidalin nan si mal Yisa a dapunpunlin.

²⁶ Yisa kaah nan lig kan u na niin nin, nin ubɔɔnɔɔr wan wee u jiɛ-n kaah si ki malin, le u bei u na ke, “Upii nan, a bija sɔ,”

²⁷ le ki bei ubɔɔnɔɔrin ke, “A na sɔ.” Iyaayoo le ubɔɔnɔɔr nmɔn nan taa Meri ki kun u niin.

Yisa a kum

²⁸ Ni bɔɔn bu, Yisa kaah nan nan biɛ ke niwann biɛn diɛ, ki li gbeen naah sɔb man Uwonbɔr a gbɔŋin nin, le u len ke, “Nnyunyum le jɔɔm.”

²⁹ Lidamunmɔŋil nan si kiyiigin niin, le bi ta itakpiinduuŋ a faar ki lon niin, le ki ta sagin kudaag ki yuur ki paab ki ta tan ŋa Yisa a mɔnn.

³⁰ Yisa kaah nan gaa nyun nin, le ki bei ke, “Ni diɛu.” Le ki tibin u yul tum le ki kpo.

Baah nan ŋu Yisa a logil man

³¹ Ni nan ye sili a ŋa daal le, kutaag kan nan yin wonn paan nin nan ye likpakɔɔl gannkaal le. Juu yaab kaah kaa nan ban tigbanann nin li be lidapunpunl bu-n, le bi nan bei Palati ke un che bin genn bi taai wee ki lagir bi jiin nin.

³² Mambu le bitɔtogibin nan jon ki tan gen uja uba wan wee bi nan chinn kpa u lidapunpunl bu nin Yisa-n a taai le ki ji gen wan gurin a taai.

³³ Amaa baah nan nan foon Yisa ban ki miin u pii kpe-n baa ji nan gen u taai yi.

³⁴ Le bitɔtogibin a ni uba ta likpanl ki ŋu Yisa a logil, libol nmɔn le ncham nin nnyum nyann.

³⁵ Uja wan nan kan man nmɔn nan jin siɛra le, u siɛra nmɔn nan ye ibamɔn le. U nyi ke u pag ibamɔn le, u jin siɛra ke ni mu n ŋa yada le.

³⁶ Ni niɛ nan ŋa ke nin gbeen naah sɔb man Uwonbɔr a gbɔŋin ke: “U kpabil liba kaa yin gen ni,”

³⁷ ke Uwonbɔr a gbɔŋin ni ba yaan kaah len ke, “Bi li lig wan wee bi nan ŋuu-n.”

Yisa a piim

³⁸ Ni bɔɔn bu, le Josef wan nan nyan Arimatiya n baan Palati Yisa a gbanann bu, Josef nan ye Yisa a bɔɔnɔɔru le, u nan woog le waah nan san Juu yaabin bu. Le Palati sei u nsan le u tan nyan Yisa a gbanann ki ta jon.

³⁹ Nikodimosi le nan chiɛn u, uja wan pii nan jon Yisa ban kunyiɛgin. Nikodimosi nan ta kisiig a nyinyinn nin nnyɔgkusim nle ki ŋmarin tab, mi kpikpiɛl nan foo botu munla.

⁴⁰ Le bininfob bilee nmɔn nan ta tiwann nunumir nmɔn ki nug Yisa a gbanann ki ta ti pɔbin litanl penlin. Bi nan ŋa Juu yaab a kaalin baah ŋaan man ki pii bi kumin le.

⁴¹ Nan yaan wee bi nan kpa Yisa-n nan ye bukpaab le, bukpaab nmɔn yaan kukaapɔŋ kan wee baa la nyi pii uninfo nan be niin.

⁴² Nan bu-n baah nan be ŋaan sili nin wonn likpakɔɔlin wee libol mu kaa ji nan fɔgin bu le bi nan pii Yisa nin yaan.