Jɔnn 18 - UWONBƆR A GBƆNPƆŊ LIKƆƆNL

Baah nan choo Yisa man

¹ Yisa kaah nan nan miɛ Uwonbɔr ki diɛ-n, le uma nin u bɔɔnɔɔb nan lɔŋ Kidironn a fataŋ. Lidool limiɛnin olif a siigi nan be niin, le uma nin u bɔɔnɔɔb nan tan kɔɔ niin.

² Le Judasi, wan nan kɔɔr Yisa nmu nan nyi bukpaab nmɔn yaan, nan bu-n Yisa nan ti gbaa lagin nin u bɔɔnɔɔb niin le.

³ Le Judasi nan dan isiig nmɔn yaan, ki taan bitɔtogib biba nin iwonjiɛn niin a guguub bibam, ban nan nyan biminmanib a yudam nin Farasiim ban nin. Bi nan ŋmag imumɔl le nin filaam nin tijawann.

⁴ Yisa, kaah nan nyi niwann nan biɛn li ŋa win, le u nan nyan sir ki too bi le ki baan ke, “Ŋma wee ni ban naa?”

⁵ Le bi jiin ke, “Yisa wan nyan Nazarif.” Le Yisa ke, “Min le yen.” (Le Judasi wan nan kɔɔr Yisa nan si bi ban niin.)

⁶ Yisa kaah nan ke, “Min le yen” nin, le bi nan sul jir bɔɔn ki lu lu tum.

⁷ Le Yisa ji nan baan bi ke, “Ŋma wee ni ban naa?” Le bi ke, “Yisa wan nyan Nazarif.”

⁸ Le Yisa jiin ke, “N bei ni ke min le yen. Ni ye ni ban min le ke, ni che bijab nan li chaau.”

⁹ Ni niɛ nan ŋa ke nin che imɔbon yan wee u nan pagin gbeen le: “Ban wee a nan ta seimin bi ni uba kaa bori.”

¹⁰ Le Simɔnn Piita, wan nan ŋmag takoobi-n, dar fɔɔ le ki gaa biminmanib a yudaau a toontunnu a nɔɔjiim a tul ki par. (Utoontunn nmɔn a yinl le nan ye Malichusi.)

¹¹ Le Yisa nan bei Piita ke, “Ta a takoobi-n jiin kutɔɔgin na! N laa nyu kiyiig kan wee n Baa ta seimin yaan naa?”

Baah nan ta Yisa jon Anasi ban man

¹² Le bitɔtogib ban wee Judasi nan taan nin, nin bi sanliiru nin Juu yaab a ninkpeeb choo Yisa. Ki lol u,

¹³ le ki nan chinn ta u dan Anasi ban, wan a chɔɔl nan ye Kayafasi nan, wee u nan ye biminmanib a yudaau libinl nmɔn nin.

¹⁴ Kayafasi nmɔn le pii nan kpaan Juu yaab ke, ni bi li ŋan ni ye uninfo uba bi kpo ki sei bininfob biɛn ke.

Piita kaah niɛ ke waa nyi Yisa man

¹⁵ Simɔnn Piita nin ubɔɔnɔɔr uba nan nɔɔ Yisa. Nan bu-n biminmanib a yudaau win nan nyi ubɔɔnɔɔrin, le u nan nɔɔ Yisa ki kɔɔ biminmanib a yudaau win a niin a loob,

¹⁶ amaa Piita ma nan paar si nkaafiin le ki guu. Le ubɔɔnɔɔr wan wee biminmanib a yudaau nan nyi-n, nan jirin ki nan pag sei kibisiɛg kan nan be itoon nin lidaal nmɔn nin, ki che Piita kɔɔn.

¹⁷ Le kibisiɛg kan nan be ntimansanmɔnn nin baan Piita ke, “Ŋaa ye u bɔɔnɔɔru lee?” Le Piita jiin ke, “Maa ye.”

¹⁸ Tiwar li nan be, le bitoontumin nin bininkpeebin nan si ki gɔɔn nŋmi man wee bi nan mann ki worin. Piita tɔɔl nan si ki kpiɛ bi bu le ki wor.

Biminmanib a ninkpelu kaah nan baan Yisa ibinbaan man

¹⁹ Iyaayoo nmɔn, le biminmanib a yudaau win nan baan Yisa ki jiin u bɔɔnɔɔbin nin u wɔɔnimin paam.

²⁰ Le Yisa nan jiin ke, “N pag npaan ni le ki sei dulinya, n gbaa wɔɔn tiwonjiɛn dirin bee iwonjiɛn niin le, nan yaan wee Juu yaab biɛn lagin tab. Maa la nyi pag niba ki woon ni.

²¹ Ba ŋa wee a baanim ibinbaan naa? Baan bininfob ban gbir maah pag man nin. Ibamɔn buu bi nyi maah len man.”

²² Yisa kaah len man nin, le bininkpeebin a ni uba wan mal win peb u kitapag ki ke, “Ŋaah yin pag man ki sei biminmanib a yudaau le yen naa?”

²³ Le Yisa jiin u ke, “Ni ye n pag nan bir ke, a bin jim ni siɛra. Amaa ni ye n pag ibamɔn ke, ba ŋa wee a peb maa?”

²⁴ Le Anasi ta Yisa ki chiɛn biminmanib a yudaau Kayafasi ban ke iŋmin la lol u.

Piita kaah ji nan niɛ ke waa nyi Yisa man

²⁵ Simɔnn Piita kaah nan si wor nŋmi-n, le bi baan u ke, “Ŋaa ye uja nan a bɔɔnɔɔbin a ni u ba lee?” Le u niɛ, ki ke, “Maa ye.”

²⁶ Le biminmanib a yudaau a toontunnu wan a maalim ye Piita kaah gaa wan a tul ki parin, kpeen u ki ke, “Maa bi kan fin nin uma olif a kpaabin yaan naa?”

²⁷ Le Piita ji niɛ, libol nmɔn le ukooja piin ki mɔr.

Baah nan ta Yisa jon Palati ban man

²⁸ Le Juu yaab nyan Yisa Kayafasi ban ki ta u jon Rom yaab a bɔryudaau a naakoon. Ni nan ye njakpiin le, Juu yaab kaah nan yin ji yuglagir a chiigin nin; baa nan chee kɔɔ ubɔr a naakoon wee ki ŋa bi ba tijaginn ke bi kaal kaah wɔɔn man nni.

²⁹ Ni bu le Palati nan nyann bi ban ki nan baan bi ke, “Uja nan a galin ye ba wee ni jɔɔ galin waa?”

³⁰ Le bi jiin u ke, “Ni ye waa bi ye wan galin ke, taa bi yin ta u ki nan seiŋi.”

³¹ Le Palati ke, “Ni ta u ni tɔɔl ki tan ji u tibɔr ni siim kaah wɔɔn man na.” Le Juu yaabin jiin ke, “Nsan kaa jaa sei ti nin ti ku uninfo.”

³² Ni niɛ nan tun ke nin gbeen Yisa kaah nan pag ke waah na yin kpo nkum man a bosu nle.

³³ Le Palati nan jir kɔɔ nnaakoon, ki tan yin Yisa ki baan u ke, “Fin le ye Juu yaab a bɔru win naa?”

³⁴ Le Yisa jiin ki baan u ke, “Ni ye a tɔɔl a potiɛl le bee biba le beiŋ n bɔraa?”

³⁵ Le Palati mu ji baan u ke, “N ye Juu a ninfou lee, a tɔɔl a ninfob nin biminmanib le taaŋ seim. A tun baa?”

³⁶ Le Yisa bei u ke, “N naam kaa ye dulinya nan a naami, ni bi ye man ke, n toontum nan bi li kɔn n bu ke Juu yaab kaa li fir choomi. Amaa daandaan nan n naamin yin nyann niba paam le.”

³⁷ Le Palati ke, “Tɔ a ye ubɔr le!” Le Yisa jiin u ke, “A jɔɔ ibamɔn nin ŋaah pag ke n ye ubɔr nmɔn. Ibamɔn buu, ni ma bu le bi mam, ni ma bu le n dan dulinya nan yaan, n nan ji ibamɔn a siɛra. Le ban be ibamɔn paamin pelig n bɔr.”

³⁸ Le Palati baan u ke, “Ba ye ibamɔn naa?” Imɔbon nan a bɔɔn bu le Palati ji jir nyan Juu yaabin ban ki tan bei bi ke, “Maa kan nan bu wee n li galin wi.

Baah siin bin ku Yisa man

³⁹ Amaa ni ye ni kaal le ke n nyan uloondiikɔɔr uba ki sei ni Yuglagir a chiig a yonn. Ni ban n nyan ‘Juu yaab a bɔru’ nle ki sei naa?”

⁴⁰ Le bi tiɛn ki jiin ke, “Aai, naa ye uma! Nyan Barabasi ki sei ti!” Barabasi nan ye ban bii tininkper a pɔɔmin a ni uba le.