Jɔnn 14 - UWONBƆR A GBƆNPƆŊ LIKƆƆNL

Yisa le ye nsan man chaa Baa-n ban

¹ “Ni laa che ni mug ni sufu. Ni gaa Uwonbɔr jiu; ki gaa n mu jiu.

² Tidir takpem le be n Baa a niin; naa bi ye man ke, n bi li bei ni. N chaa niin le n tan mann npaan ki guur ni.

³ Ni ye ke n jon tan mann npaan ke, n li jirin ki nan ta ni wee nitɔɔl tan li be n ban nan yaan wee n be-n.

⁴ Ni nyi nsan man chaa maah yin jo nan yaan nin.”

⁵ Le Tomasi bei u ke, “Uyudaan, taa nyi ŋaa chaa nan yaan ni, mambu ti yin ŋa niin ki biɛ nsan naa?”

⁶ Le Yisa jiin ke, “Min le ye nsan nin ibamɔn nin limiɛfol. Uba kaa chaan Baa-n ban ni wee naa ye min bu.

⁷ Ni ye ke a sin nan biɛm ke, a li biɛ n Baa-n baantɔɔl. Daandaan nan ki jɔɔ chaa, a num kan wa le ki biɛ wa.”

⁸ Le Filib len ke, “Uyudaan, wɔɔn ti Baa-n ni wee nin kpaan ti.”

⁹ Le Yisa jiin ke, “Naa nyi maa, Filib, nin maah le nan be ni ban ni yuur man nan a bɔɔn naa? Wan biɛn kam ke u kan Baa-n na. Ni yin ŋa niin ki len ke, ‘Wɔɔn ti Baa-n’ naa?

¹⁰ Naa ŋa yada ke n be Baa-n ni le, le Baa-n be n nii? Imɔbon yan n pag sei ni kaa ye n tɔɔl a bɔri. Amaa, ti ye Baa, wan be n ni-n, le tun u toon.

¹¹ Ŋaam yadau maah len ke n be nin Baa-n wee Baa-n be nin min nin, bee ŋa ligaril a siɛramin yadau.

¹² N bei ni ibamɔn le, wan biɛn ŋaam yada ke u li tun maah tun man nin. U li tun tiwann tan jon man, nan bu-n n chaa Baa-n ban le.

¹³ Le n li ŋa naah li miɛ nan biɛn n yinl bu, wee Baa-n kan kupag Bija-n bu.

¹⁴ Ni ye ni miɛ nan n yinl bu ke, n li sei ni.

Waah nan siin bi Kasi a Naaŋ a mɔsiinl man

¹⁵ Ni ye ni jiɛm ke, ni li chee maah bei ni man.

¹⁶ Le n li baan Baa-n, wee un ji sei ni utiter uba wan na li gbaa be nin ni n-yonn biɛn.

¹⁷ Ni ma ye ibamɔn a Naaŋin. Dulinya nan a ninfob kaa li fir gaa wi, nan bu-n baa nyi kan wi, laa baan bin biɛ wi. Amaa ni nyi u, nan bu-n u be nin ni le ki li be ni ni.

¹⁸ Maa li jiɛn ni wee ni be ni binba ke nkpeebimi; n li dan ni ban.

¹⁹ Naa li yuuri, dulinya nan yaab kaa ji li kami, amaa nim li kam. Nan bu-n maah yin gbaa be nin n miɛfolin, ni mu yin be le nin limiɛfol.

²⁰ Lidaal nmɔn ni na li biɛ ke n be nin n Baa le, le ni be nin min, le n be nin ni.

²¹ Wan biɛn chee ki ŋmag n siimin kaah ban man ke, u ma ye wan jiɛm. Wan jiɛm ke u li kan njiɛm n Baa ban, le n mu li jiɛ u ki ta nba ki wɔɔn u.”

²² Le Judasi (wan ye Tadiɛsi) len ke, “Amaa, Uyudaan, ba ŋa wee a yin ta a ba ki wɔɔn ti wee kaa yin wɔɔn dulinya yaabaa?”

²³ Le Yisa jiin ke, “Ni ye wan jiɛm ke, u li ŋa maah wɔɔn man. N Baa li jiɛ u, le n Baa nin min li dan u ban ki nan be u ban.

²⁴ Wan kaa jiɛm kaa li ŋa maah wɔɔn man nin ni. Imɔbon yan ni gbir nan kaa ye n yaa mɔboi yi; i ye Baa wan nan tumin a mɔboi le.

²⁵ N pag ni nan biɛn maah la be ni ban nin le.

²⁶ Amaa Utiter, Kasi a Naaŋ, wan wee Baa-n yin tun u n yinl bu-n, li wɔɔn ni niwann biɛn ki tiɛr ni niwann nan biɛn wee n nan bei ni.

²⁷ Nposɔɔn li be ni ni; nposɔɔn man be n nin le n ta sei ni. Maa sei ni ke dulinya kaah tenn man nin ni. Ni laa che ni mug ni sufu ki laa san bijawaami.

²⁸ “Ni gbir maah ke, ‘N yin fɔɔr le ki ji jirin ni ban.’ Ni ye ke a jiɛm ke, a li jɔɔ nmɔn na, maah chaa Baa-n ban nin, nan bu-n Baa-n li yab ki jom.

²⁹ Daandaan nan n bei ni le wee nin ni ŋa, wee ni nan ŋa ke ni li ŋa yada.

³⁰ Maa ji li pag nin ni ki yuuri, nan bu-n dulinya nan a bɔrbig le chaan nin. Waa jɔɔ n pɔɔmi,

³¹ amaa ni kpaa le nin dulinya nan n tinn ki biɛ ke n jiɛ Baa-n le ki tun waah wɔɔnim man nin dede. “Ni che ti fɔɔr do; daandaan nan.