Jɔnn 13 - UWONBƆR A GBƆNPƆŊ LIKƆƆNL

Yisa kaah ŋunn u bɔɔnɔɔb a taafar ke uyom man

¹ Ni nan yin wonn kutaag Yuglagir a Chiigin le. Le Yisa nan nyi ke iyoo foo nin u nya dulinya nan yaan ki jo Baa-n ban. Waah pii nan jiɛ u yaab ban be dulinya nan yaan nin, le u nin nan ta u jiɛm man gbee-n kaah kpaa man ki wɔɔn bi.

² Baah nan nan be ji kunyiɛg a jiirin, ki miin ulinlaril pii nan kɔɔ Judasi Isikariya, wan ye Simɔnn a bija-n, ke un kɔɔr Yisa.

³ Yisa kaah nan nyi ke Baa-n ta niwann biɛn ki ŋa u nɔɔn nin, le ki ke u nan nyann Uwonbɔr ban le ki ji yin jir Uwonbɔr ban;

⁴ le u nan fii sir paab tijiir a ji bol nmɔn yaan, le ki nan pir u daali kan wee u yee paan ni, le ki ta kunaapoog ki gbin u chaŋ.

⁵ Ni bɔɔn, le u minn nnyum ki ŋa kusɔŋin le ki ŋunn ŋunn u bɔɔnɔɔb a taafar, le ki ta kunaapoog kan gbin u chaŋin ki ŋmir i koor.

⁶ U nan dan Simɔnn Piita ban, le u bei u ke, “Uyudaan, a yin ŋunn n taafar lee?”

⁷ Le Yisa jiin ke, “Ŋaa la biɛ maah ŋaan nan nin ni, amaa a na li biɛ ni bɔɔn bu.”

⁸ Le Piita ke, “Aai, ŋaa jɔɔ a ŋunn n taafari.” Le Yisa jiin ke, “Ni ye maa ŋunniŋ ke, ŋaa kpiɛ n ban ni.”

⁹ Le Simɔnn Piita jiin ke, “Tɔ man ke, laa ŋunn n taafar a binba, amaa ŋunn n nɔɔi nin n yul ki kpiɛu!”

¹⁰ Le Yisa jiin ke, “Uninfo wan fun nin kpaan u ŋunn u taai le; u gbanann biɛn kaa jɔɔ tijaginn ni. Le nim kaa jɔɔ tijaginn ni, amaa naa ye nim biɛn ni.”

¹¹ Nan bu-n u nan nyi wan na yin kɔɔr u, mambu le u nan ke naa ye bininfob biɛn le kaa jɔɔ tijaginn ni.

¹² Waah nan ŋunn bi taafar ki diɛ-n, le u nan yee u wann yeewaŋ le ki jir u binbe bol. Le ki baan bi ke, “Ni biɛ maah ŋa nan ki sei ni nan waa?

¹³ Ni yim ‘Wan wɔɔn’ le nin ‘Uyudaan’, le ni ye ibamɔn, nan bu-n maah ye wan le yen.

¹⁴ Daandaan nan maah ye ni yudaau nin wan wɔɔnn wee ki ŋunn ni taafar nan, ni baantɔɔl li ŋunn tab a taafara.

¹⁵ N wɔɔn ni limagil le wee ni li ŋaan ke maah ŋa nan sei ni-n.

¹⁶ N bei ni ibamɔn le, utoontunn kaa be ki jon u daan wi, le ntoon mu kaa jon wan tun wi.

¹⁷ Daandaan nan naah biɛ ni niɛ nan, ni ye ke ni ŋa man ke ni li kan tikaar.

¹⁸ “Maa pag nan ki tenn ni biɛn ni; n nyi ban wee n nan gann. Amaa ni nan le yin che nan sɔb dɔ Uwonbɔr a gbɔŋin nin ŋa ibamɔn: ‘Min nin wan por n jiirin le nan lig ziɛnim.’

¹⁹ “N bei ni le daandaan nan wee ni nin ŋa, ni nan ŋa ke ni ŋa yada ke min le yen.

²⁰ N bei ni ibamɔn le, wan chee maah tunn wan biɛn a bɔr ke u chee n bɔr le; le wan chee n bɔr ke u chee wan nan tunimin a bɔr le.”

Yisa kaah nan chinn wɔɔn baah li kɔɔr u man

²¹ Waah nan len nan a bɔɔn, le Yisa a pool nan bii ki naaŋin le u len npaan ni ke, “N bei ni ibamɔn le, ni ni u ba le yin kɔɔrim.”

²² Le u bɔɔnɔɔbin nan gbiɛ lig tab, ki nin biɛnn waah len wan.

²³ Ubɔɔnɔɔr wan wee Yisa nan jiɛ-n, li nan ka Yisa a logil.

²⁴ Le Simɔnn Piita nan gabin ubɔɔnɔɔr nmɔn ki ke, “Baan u waah len wan na.”

²⁵ Le u nan gbeen jir Yisa paam, le ki baan u ke, “Uyudaan, u ye ulaa?”

²⁶ Le Yisa jiin ke, “U ma ye maah yin ŋu lisaabɔl nan kisaŋin ki sei wan nin.” Le ki ŋu lisaabɔlin kisaŋin, le ki taa sei Judasi Isikariya, wan ye Simɔnn a bija-n.

²⁷ Libol lan wee Judasi nan gaa lisaabɔlin, le Sintani nan kɔɔ u poolin. Le Yisa bei u ke, “Ŋaah yin ŋa nan nin, ŋa ni weema.”

²⁸ Amaa ban nan be tijiirin yaan nin uba kaa nan biɛ nan bu wee Yisa nan len man ki sei wi.

²⁹ Judasi kaah nan guu iligin, bibam nan tiɛr ke Yisa bei u waah li da nan le kuchiigin bu, bee ki ta niba ki sei bilanjiim.

³⁰ Libol lan wee Judasi nan gaa lisaabɔlin, le u nan nyan. Le kunyiɛg nan nan ŋmiɛ.

Nsiim pɔm

³¹ Waah nan jon nin, le Yisa ke, “Daandaan nan le Usaal a Bija-n yin kan kupag le Uwonbɔr yin kan kupag u ni.

³² Ni ye ke Uwonbɔr kan kupag u ni ke, Uwonbɔr li sei u Bija wan be u ni-n kupag, le ki li sei u kupag nba bu.

³³ “N buwaab, maa yin be ni ban nin yuuri. Ni na li bam, n yin bei ni le daandaan nan, ke maah nan bei Juu yaab man nin: Nan yaan wee n chaa-n, naa li fir dan niin ni.

³⁴ N sei ni nsiim pɔm le: Ni li jiɛ taba. Ni kpaa le ni li jiɛ tab ke maah jiɛ ni man nin.

³⁵ Ni ye ke ni jiɛ tab ke, ni ma le li che uninfo biɛn biɛ ke ni ye n bɔɔnɔɔb le.”

Yisa kaah nan pag Piita kaah na li niɛ ke waa nyi u man

³⁶ Le Simɔnn Piita nan baan u ke, “Uyudaan, a chaa laa?” Le Yisa jiin ke, “Nan yaan wee N chaa-n, ŋaa li fir nɔɔ daandaan nan ni, amaa ni ŋa wama ke a li nɔɔ.”

³⁷ Le Piita baan ke, “Uyudaan, ba ŋa wee maa li fir nɔɔŋ daandaan nan naa? Ni ye nkum ke n li kpo a bu.”

³⁸ Tɔ le Yisa jiin ke, “A sin li kpo n buu? N beiŋ ibamɔn le, a li niɛ ke ŋaa nyimi itaa itaa, le ukooja nni mɔɔ!