Jɔnn 12 - UWONBƆR A GBƆNPƆŊ LIKƆƆNL

Baah kpaar nkpam wur Yisa bu Betani man

¹ Yuglagir a chiig kaah nan nan gur iween iloobin, le Yisa nan foon Batani, nan yaan wee Lazarusi, wan wee Yisa nan fiin nkuminin be-n.

² Do le kitiŋ nmɔn yaab nan sei Yisa jilima ki ŋa kunyiɛg a jiir ki sei u ma nin u bɔɔnɔɔb. Maata li nan por ti, le Lazarusi nan jin Yisa nin u bɔɔnɔɔb ban.

³ Le Meri nan ta tulaali pɔŋ, kan jɔɔ nbaam wee ki daag pɔɔ-n a lulog muŋ; le ki kpaar jaa Yisa a taai bu le ki ta u yukper ki ŋmir ŋmir u taai nmɔn. Le tulaali-n yaa baam fii gaa iniin nmɔn.

⁴ Amaa le u bɔɔnɔɔbin uba, Judasi Isikariya, wan nan nan yin kɔɔr Yisa-n, nan yii ki ke,

⁵ “Ba ŋaa wee tulaali nan kaa nan bi li kɔɔr ki ta iligin ki sei bilanjiimaa? Mi daag yab foo libinl munl a yɔra.”

⁶ Naa ye u baga le nan be bilanjiim bu le u nan len man ni, amaa u nan ye unaayig le; nan bu-n waah nan gu ilig a pɔgilin, u nan ti nyann nan be niin nin le ki jɔɔ ter u ba.

⁷ Le Yisa jiin ke, “Ni jiɛn wa, ni ye Uwonbɔr a lol le ke un woon mi le ki gu baah na li piim lidaal lan.

⁸ Ni yin gbaa jɔɔ bilanjiim le ni ban, amaa min kaa yin gbaa be ni ban ni.”

Baah nan lol Lazarusi bu man

⁹ Juu yaab a ninfogbaluŋ kaah nan biɛ ke Yisa be niin nin, le bi nan dan, naa nan ye u binba a kam bu amaa ke bin nan kan Lazarusi, wan wee u nan fiin nkumin nin.

¹⁰ Mambu biminmanib a yudam nan lol Lazarusi tɔɔl a kum le,

¹¹ nan bu-n u kum a fiim bu le Juu yaab pam nan labir chaa Yisa ban le ki ŋaan u yada.

Yisa kaah kɔɔ Jerusalam nin kupag man

¹² Lidaal lan nan paa-n le kuninfogbaluŋ kan nan dan kuchiig a jimin nan gbir ke Yisa be nsan bu ki chaa Jerusalam.

¹³ Le bi nan gen gen tikpikpagbann ki nan too u nsan bu, le ki tann ke, “Jilima daan!” “Tikaar be wan dan Uyudaan a yinl bu-n!” “Tikaar be Iziral yaab a bɔru win bu!”

¹⁴ Le Yisa ban kibonpɔliŋ ki kal ki bu, ke naah pii nan sɔb man nin,

¹⁵ “Zayɔnn yaabaa, ni laa san niba a jawaami; Ni lig, ni bɔru le chaan nin, ki ka kibonpɔliŋ bu.”

¹⁶ Chinchinn u bɔɔnɔɔb kaa nan biɛ ni niɛ biɛn nan ni. See Yisa a pag a bɔɔn le bi nin nan biɛ ke nan sɔb nan, nan sɔb u bu le, le bi nan tun ni niɛ nan biɛn ki sei u.

¹⁷ Tɔ le waah nan fiin Lazarusi nkumin ki yin u nyan kukaagin ni, le kuninfogbaluŋ ban nan be niin ni nan mɔɔn tibɔr nmɔn.

¹⁸ Bininfob pam kaah nan gbir waah ŋa ligaril a siɛra man nin, le bi nan nyan ki too u nsan bu.

¹⁹ Ni ma bu le Farasiimin nan pag bei tab ke, “Lig, naa kpiɛ ti niba. Lig dulinya nan yaab biɛn kaah nɔɔ u man!”

Girig yaab biba kaah nan ban bin kan Yisa man

²⁰ Girig yaab biba nan ŋmar ban nan jon yuglagir a chiigin yaan bin tan jiɛn Uwonbɔr.

²¹ Bi nan dan Filib, wan nan nyan Befisada kan be Galilii-n ban le ki baan u ke, “Uninkpel, ti bi ban ti kan Yisa le.”

²² Le Filib nan jon tan bei Anduru; le Anduru nin Filib nan labir jon ki tan bei Yisa.

²³ Le Yisa jiin ke, “N-yonn foo nin uninfosaal a Bija-n kan kupaga.

²⁴ N bei ni ibamɔn le, ndibim kaa nan lu tum ki bur ke, mu lee la ye mu ba le. Amaa mu bur ke, mu li naan kidibin gbaluŋ.

²⁵ Uja wan ban u miɛfol li lann li, le wan mu nan u miɛfol dulinya nan yaan li jɔɔ li nin n-yonn man kaa jɔɔ ndiɛmin.

²⁶ Wan ban un tun terim ke ni ye u li nɔɔm le, le n be nan yaan ke, n toontunnu mu li be niin. N Baa li sei wan tun tenn min jilima.

Yisa kaah pag u kum a bɔr man

²⁷ “Daandaan nan n binbem ye limugil le, ke n yin len ke niin? ‘N Baa, feem gab n-yonn man wee n be nan naa’? Aai, ni nan bu le n nan dan.

²⁸ Baa, che a yinl li jɔɔ kupaga!” Le likukɔl nyann paab ki jiirin ki ke, “N nan sei li kupaga, le n ji li sei li kupag.”

²⁹ Kubabug kan nan be niin wee ki gbir likukɔlin nan len ke utaal le tiɛn; le biba mu len ke malaka le pag ki sei u.

³⁰ Le Yisa len ke, “Likukɔl nan ye nim a nyɔɔr le, naa ye min ni.

³¹ Daandaan nan ni foo Uwonbɔr nji dulinya nan a ninfob a bɔra; daandaan nan bi li ŋɔɔr dulinya nan a bɔrbig nnyan.

³² Amaa min, bi nan yuurim kutingbɔŋ nan yaan paab ke, n li dar bininfob biɛn dan n ban.”

³³ U nan len nan ki wɔɔn li kumbol lan wee u yin kpo le.

³⁴ Le kuninfogbaluŋin pag paab ke, “Ti gbir Nsiimin ke Masiya-n na yin gbaa be le, ni ŋa niin wee a len ke, ‘Ni ye bin yuur usaal a Bija le paabaa’? Ŋma ye, ‘Usaal a bija’ nmɔn naa?”

³⁵ Le Yisa bei bi ke, “Naa li yuuri nwonweenin li be ni ban. Nwonween kaah la be ni ban nin, ni li chonn na wee libunbɔnlin laa pii ni. Usaal wan chonn libunbɔnlin kaa nyi waah chaa nan yaan ni.

³⁶ Ni ta ni yada ki ŋa wan ye nwonween wee ki la be ni ban ni na, wee ni nan kpann nwonween a bum.” Yisa kaah nan pag man ki diɛ-n, le u fɔɔr bi ban ki tan woon.

Bininfob a kaa jɔɔ yada a bɔr

³⁷ Hali nin Yisa kaah nan ŋa ligaril a siɛram bi nintogil a bɔɔn, baa le la nan ŋa u yada.

³⁸ Ni nan biɛn nan ŋa le ke ulinlenn Azaya kaah nan len man nin ŋa ibamɔn, waah nan ke: “Uyudaan, ŋma nan ŋa taah len man nin yada ŋmam bu wee Uyudaan a nɔɔ kpiiraa?”

³⁹ Mambu baa nan fir ŋa yada, nan bu-n, ke Azaya kaah nan len man niba paam ke:

⁴⁰ “U jɔɔn bi nuŋi ya le ki ku bi sufuu, wee bi laa ga nin bi nuŋi yi, ki laa biɛr nin bi sufu ki laa labir n ban, wee n sei bi kutebugi.”

⁴¹ Nan bu wee Azaya nan len man nin, u nan kan Yisa a paga le ki pag u bu ki wɔɔn.

⁴² Ni ma biɛn yɔli n-yonn nmɔn bisanliibin pam nan ŋa yadau. Amaa Farasiimin bu bi nan san bijawaam le ke bi li nyan bi kuwonjiɛndiigin ni, mambu baa nan nyan bi yada ki wɔɔn ni,

⁴³ nan bu-n bi nan jiɛ bininfob a dom le ki jon Uwonbɔr a dom.

Yisa a mɔboi kaah ji bininfob tibɔr man

⁴⁴ Le Yisa tiɛn paab ke, “Uninfo ŋa min yada ke, waa ŋa n binba le yada, amaa u ŋa wan nan tunimin le yada.

⁴⁵ U lig n paam ke, u ga wan nan tunimin le.

⁴⁶ N dan dulinya nan yaan le ke nwonween nin, wee uba laa ŋa min yada wee ki sin ji be libunbɔnlin ni.

⁴⁷ Ni ye wan gbir n bɔr wee kaa ŋa maah len man nin ke, maa ji u tibɔri. Nan bu-n maa dan n nan ji dulinya nan a ninfob tibɔr le, amaa n dan ke bin kan feegab le.

⁴⁸ Wan yii min kaa ŋaan maah len man nin ke u daan a bɔjiru be; nan li ku u idajoorikaa ye n mɔleen yan n pagin le.

⁴⁹ Nan bu-n maa pag n tɔɔl a pɔɔmin, amaa Baa wan tumin le beim maah li len man nin maah li pag man.

⁵⁰ N nyi ke waah beim man nin li jɔɔ limiɛfol lan kaa jɔɔ ndiɛm chaan. Mambu n pag Baa-n kaah ke n pag man le.”