Jɔnn 1 - UWONBƆR A GBƆNPƆŊ LIKƆƆNL

Limiɛfol a Mɔbonl

¹ Dulinya a piinim ni ki miin wan wee bi yi u ke Limɔbonlin pii nan be le, le Limɔbonlin nan be nin Uwonbɔr, Limɔbonl nmɔn nan ye Uwonbɔr le.

² U nan be nin Uwonbɔr le dulinya a piinimin.

³ U bu le niwann biɛn nan naan; niba kaa be ki nan naan wee waa be niin ni.

⁴ U ni le limiɛfol nan be, limiɛfol nmɔn nan ye usaal a wonweem le.

⁵ Nwonween nin nan wonn libunbɔnlin, amaa le libunbɔnlin kaa nan biɛ mi.

⁶ Le Uwonbɔr nan tun uja uba, le u dan; u yinl le nan ye Jɔnn.

⁷ U nan dan ki ye siɛra jir le ki wɔɔn nwonween nmɔn bu, wee u ma bu uninfosaal n ŋa yada.

⁸ U ma baantɔɔl kaa nan ye nwonween nin ni; u le nan dan nwonween nin a siɛra a jim bu le.

⁹ Ibamɔn a wonweem man tenn uninfosaal biɛn nwonween nin nan chaan dulinya nan yaan le.

¹⁰ U nan be dulinya nan yaan le, nin dulinya nan kaah le nan naan u bu nan yɔli dulinya kaa nan biɛ wi.

¹¹ U nan dan u yaabin le, amaa le u yaab nmɔn kaa nan gaa wi.

¹² Nin ni ma biɛn ni, ban biɛn nan gaa win, nin ban nan ŋa yada u yinl bu-n, le u nan sei bi nsan ke bin nin ŋa Uwonbɔr a buwaab.

¹³ Bi yin ye nbuwaab ban kaa nan ye ncham a maaŋ, bee tigbanann a bam, bee uja a bami, amaa Uwonbɔr a bam.

¹⁴ Limɔbonlin nan kpann tigbanann nin ncham le ki nan ŋa u kukɔɔbol ti ban. Ti nan kan u paga, kupag kiba kpeŋ kpeŋ, kan nan nyan ti Baa ban nin, ki gbee nin linyunyunbasanl nin ibamɔn nin.

¹⁵ Jɔnn nan jin siɛra u bu ki sei bininfob. U nan tiɛn paab npɔɔn bu ke, “U ma le n nan len ke, ‘Wan yin dan n bɔɔn nin yab jon ma, nan bu-n u ma nan chinim.’ ”

¹⁶ Waah gbee nin linyunyunbasanlin bu le ti biɛn gaan tikaar ki kpiɛg.

¹⁷ Uwonbɔr le nan che Moziz sei ti nsiim; le Yisa Masiya mu bu le ti kan linyunyunbasanl nin ibamɔn.

¹⁸ Uba kaa nyi kan Uwonbɔr i, amaa U ma Uwonbɔr a binba, wan be Baa-n a logilin che bi biɛ wa.

Jɔnn Wan nan Fu Bininfob Uwonbɔr a Nyunfulin a Bɔr

¹⁹ N-yonn man wee Juu yaab ban be Jerusalam nan tun biminmanib nin Liifai yaab ke bin tan baan Jɔnn waah ye wan nin a siɛra sɔ.

²⁰ Waa nan walin un jiin guri, amaa le ki pag npaan ni u wiib ke, “Maa ye Masiya nni.”

²¹ Le bi baan u ke, “Ke a ni ye ŋmiɛ? A ye Elaja lee?” Le u ke, “Maa ye wi.” “A ye ulinlenn nin lee?” Le u jiin ke, “Aai.”

²² Njoorimin le bi baan u ke, “A ye ŋmiɛ? Sei ti njiim ni wee ti ta jir ban tun ti-n ban. A ke a ye ŋmiɛ?”

²³ Le Jɔnn jiin ki len ulinlenn Azaya a mɔboi ni ke, “N ye wan a kukɔl tann kukunkɔɔg bu-n le, ‘Ŋa nsan mu li tel ki sei Uyudaan na.’ ”

²⁴ Le Farasiim ban wee bi nan tun nin,

²⁵ ni nan baan u ke, “Ni ye ke ŋaa ye Masiya-n, kaa ye Elaja, bee Ulinlenn nin ke, ba ŋa wee a fu bininfob Uwonbɔr a nyunfulaa?”

²⁶ Le Jɔnn jiin ke, “N jɔɔ nnyum le ki fu bininfob Uwonbɔr a nyunful, amaa uba si ki ŋmar ni ban le naa nyi wi.

²⁷ U ma ye wan nan yin ŋɔɔrin n bɔɔn, wan a naatagunn wee maa kpaan n lori.”

²⁸ Ni nan biɛn nan ŋa Betani, Jɔdann a kpengonl lan yaan wee Jɔnn nan fu bininfob Uwonbɔr a nyunfulin le.

Uwonbɔr a Peebig

²⁹ Ni nan wonn le Jɔnn nan kan Yisa kaah chaan u ban le ki ke, “Lig, Uwonbɔr a Peebig, wan nyann dulinya nan a birin!

³⁰ U ma le n nan len, maah nan ke, ‘Uja wan yin ŋɔɔrin n bɔɔn nin yab jon ma, nan bu-n u ma nan chinim.’

³¹ N baantɔɔl kaa nyi wi, amaa nan bu wee n nan dan ki nan fu bininfob Uwonbɔr a nyunfulin nan ye le ke un bin kpiir u ba ki sei Iziral yaab.”

³² Tɔ le Jɔnn nan sei siɛra nan: “N nan kan Kinaaŋ kaah nyan papaab ki jiirin ke ulanjelin le ki nan tɔɔn u bu.

³³ Maah bi li nyi wi, wee naa ye wan nan tunim ke n nan fu bininfob Uwonbɔr a nyunfulin le nan beim, ‘Uja wan wee ni kan Kinaaŋ jiirin ki nan tɔɔn u bu-n le ye wan li ta Kasi a Naaŋ ki fu bininfob Uwonbɔr a nyunful.’

³⁴ N nan kan na, le ki jin siɛra ke Uwonbɔr a Bija-n sɔ.”

Yisa a Chinchinn a Bɔɔnɔɔb

³⁵ Ni nan wonn kutaag le Jɔnn ji nan be niin nin u bɔɔnɔɔb bilee.

³⁶ Waah nan nan kan Yisa jo chaa-n le u ke, “Lig, Uwonbɔr a peebigin!”

³⁷ U bɔɔnɔɔb bilee-n kaah nan gbir u len man nin, le bi nan nɔɔ Yisa.

³⁸ Yisa kaah nan gbiɛ lig ki kan bi nɔɔ win le u baan bi ke, “Ni ban baa?” Le bi ke, “Rabbi” (ni taai li ye wan wɔɔnn), “Laban wee a kɔɔ?”

³⁹ Le u jiin ke, “Ni dan, ni na li kan.” Le bi nan jon ki tan kan waah kɔɔ nan yaan, le ki be u ban lidaal nmɔn. Ni nan ye kijɔɔg a kur tina paam le.

⁴⁰ Anduru, wan ye Simɔnn Piita a waalin nan ye bininfob bilee ban nan gbir Jɔnn kaah nan pag man nin wee ki nan nɔɔ Yisa-n a ni uba le.

⁴¹ Anduru kaah nan ŋa man nan ye un chinn ban kan u kpel Simɔnn le ki bei u ke, “Tim ban kan Masiya nna” (uma ye ufeer).

⁴² Le ki taa u dan Yisa ban. Yisa nan lig u le ki ke, “A ye Jɔnn a bija Simɔnn le. Bi ni li yiŋ ke Sifasi” (le li labirim le ye Piita).

Yisa kaah Yin Filib nin Nataniɛl man

⁴³ Ni nan wonn kutaag le Yisa nan bon ke un nya jo Galilii. Waah ban kan Filib nan, le u bei u ke, “Li nɔɔm ni.”

⁴⁴ Filib nan nyan Befisada a tiŋin le, u ma nin Anduru nin Piita

⁴⁵ Le Filib nan ban kan Nataniɛl le ki bei u ke, “Tim ban kan Moziz kaah nan sɔb wan a bɔr nsiimin nin na, nin wan a bɔr wee bilinlem tɔɔl nan sɔbin, u ma ye Yisa wan nyan Nazarif, ki ye Josef a bija-n.”

⁴⁶ Le Nataniɛl baan ke, “Nazarif aa! Niwann ŋan li fir nyann niin naa?” Le Filib len ke, “Dan ki nan lig.”

⁴⁷ Yisa kaah nan kan Nataniɛl be forin nin, le u bei u ke, “Iziral a big bamɔŋ kan kaa jɔɔ igalin nin sɔ.”

⁴⁸ Le Nataniɛl baan ke, “A ŋaa nii ki nyi maa?” Le Yisa jiin ke, “N bi kaŋ ŋaah la bi ka bikinkamin a tum wee Filib nin bi yiŋin.”

⁴⁹ Le Nataniɛl nin len npaan ni ke, “Wan wɔɔn, a ye Uwonbɔr a bija-n le; a ye Iziral a bɔr takpenl le.”

⁵⁰ Le Yisa ke, “Nan bu wee a ŋa yada-n ye maah beiŋ ke n bi kan ŋaah ka bikinkam a tumin le. A li kan niwann nan jon man.”

⁵¹ Le u ji len ke, “N beiŋ ibamɔn le, a li kan papaab kaah loor, le Uwonbɔr a malakam do paab ki jiirin Uninfosaal a Bija-n bu.”