Jemisi 4 - UWONBƆR A GBƆNPƆŊ LIKƆƆNL

Dulinya a jɔtiig

¹ Ba che ikɔn nin imɔkpel be ni sisiigin naa? Naa ye ni nyan ni gbanann a bam man be nin ni ki kɔn nin ni n lee?

² Ni ban niba amaa le kaa ga ni. Ni bu le ni jɔɔ linunchɔril ki ku bininfob, amaa naa li fir kan nan wee ni ban nmɔn ni. Ni jɔɔ imɔkpel ki kɔn nin tab. Naa jɔɔ naah ban nan nni, nan bu-n naa miɛ Uwonbɔr i.

³ Ni ye ni miɛ ke, naa ga, nan bu-n ni miɛ nin tipotiɛbir le, ni miɛ ke ni ta ŋa ni baantɔɔl a gbanann a bam le.

⁴ Nim ban kaa si bogiliba nan, naa nyi ke nim ban jɔɔr dulinya nan kujɔtiigin ŋa Uwonbɔr ni dataag lee? Wan jɔɔr dulinya nan kujɔtiig ke, udaan ŋa Uwonbɔr u dataaga.

⁵ Bee ni tiɛr ke Uwonbɔr a bɔr kaah len man ni kaa jɔɔ bu lee? Ke Kinaaŋ kan wee Uwonbɔr ta ŋa ti ban nin ki jɔɔ linunchɔril takpem maa?

⁶ Amaa le u san ti kunyunyunbaag takpem. Mambu le Uwonbɔr a bɔr len ke, “Uwonbɔr yiin kalanbaanidam le, amaa le ki sin san ban jɔɔ jiininba kunyunyunbaag.

⁷ Mambu ni taam niba ki sei Uwonbɔr a. Ni tom Sintani, wee un guun ki jiɛn ni.

⁸ Ni fɔɔr mal Uwonbɔr a, wee Uwonbɔr mu nfɔɔr ki mal ni. Nir ni nɔɔi ya, nim tibirdam nan, ki ŋa ni sufu kasiu, nim ipotiɛ ilelee dam nan.

⁹ Ni li jɔɔ npoobiin na, ki li mɔr ki kuun na. Kpenn ni laar ŋa timɔra ki che ni mɔm nlabir lisufubiila.

¹⁰ Jiin ni ba ki sei Uyudaan na, wee Un yuur ni paab.

Ikpaan ki jiin tab a bɔr a jim paam

¹¹ N nabum, ni laa jɔɔ kutingbiig nin tabi. Wan pag tibɔbir ki sei u nabig bee ki jin u tibɔr ke, u pag galin nsiimin le, ki jin nsiim nmɔn tibɔra. Ni ye a jin nsiim tibɔr ke, ŋaa ŋmag mi le nmɔn, a ye wan jin nsiim nmɔn le tibɔr.

¹² Uwonbɔr a binba le siig nsiim, ki ji li fir ji bininfob tibɔr, ki biɛ li fir fee bininfob gab, bee ki bii bininfob. Amaa fin, a ye ŋma ki li fir ji a kunkɔɔn tau tibɔraa?

Ikpaan ki jiin ligbingbanfaal paam

¹³ Ni pela man, nim ban ti ŋa ke ni len ke, “Dinan bee won ti wo li jo kitiŋ poolin ki tan ji libinl niin ki kpeŋ kpoŋkpoŋ ki kan ilig.”

¹⁴ Ba ŋaa? Naa nyi nan wo li ŋa won ni. A miɛfol ye baa? Ni nann le ke liŋunl kaa lu ke naa yuur wee ki fɔr man ni.

¹⁵ Amaa naah ye ni pag man ye nan le, “Ni ye Uyudaan a bam ke, ti li be ki tun ni niɛ bee ni niɛ.”

¹⁶ Ke naah ye man nin, ni far igbingban le ki jɔɔ kalanbaani, ni gbingbanfaal nmɔn ye yɔli le.

¹⁷ Mambu wan nyi itoon ŋan yan bi ye un tun, wee kaa tun ke, u ŋa tibira.