Jemisi 1 - UWONBƆR A GBƆNPƆŊ LIKƆƆNL

¹ Min Jemisi wan ye Uwonbɔr nin Uyudaan Yisa Masiya a yomu-n: N poor Uwonbɔr a ninfob ibol piig nin ilee yan yal be dulinya nan a logi ina nan biɛn nin.

Yada nin nlam

² N nabum, ni ye nbigim man biɛn dan ni bu ke, ni che ni li ye nmɔn takpen ki sei na,

³ nan bu-n ni nyi ke ni yada a magim mann kpiɛg ni limɔril le.

⁴ Ni kpaa le nin limɔril n diɛ mi toonl wee nin che ni gbee bininfob nbamɔm, wee niba n laa par ni.

⁵ Ni ye ni ni uba par nlam ke, u yaadaan n miɛm Uwonbɔr wan tenn bininfob nin tibuchinn wee kaa galin uba-n li ta sei u.

⁶ Amaa u miɛ ke, ni kpaa le nin un ŋa Uwonbɔr yada ki laa biɛn ni, nan bu-n wan jɔɔ nbiɛnim nann limɔgil a nyungbɔŋ le, man wee nfaam daar mi ki yeŋin.

⁷ U yaadaan n laa tiɛr ke u li kan niba Uyudaan ban ni;

⁸ u ye ipotiɛ ilee daan le, kaa si bogiliba nan biɛn wee u tun ni.

Fala nin njɔɔm

⁹ Kinabig kan jɔɔ jiininba iyoo biɛn n nan kan ndom ke, ki na li fa ligbingbanl.

¹⁰ Amaa wan ye uwandaan dulinya nan yaan wee Uwonbɔr nan jiin u tum ke, u daan li far ligbingbanla, nan bu-n u na yin kpo le ke nsipuumin.

¹¹ Babu nween pɔɔ wee ntuton nin fa kisiigin ke, npuumin koor le ki lu le mi ŋamin bii. Man mu le ni ye ki sei uwandaan, n-yonn man wee u tiɛr ke u toon li jo nintogilin, iyaayoo le u kpeg.

Nmagim nin nbiginim

¹² Tikaar be wan jɔɔ limɔril limagil a poolin nin bu, nan bu-n ni ye u nyaŋ limagil ki diɛ ke u li kan u naan yuchigirig kan ye limiɛfol wee Uwonbɔr nan siin limɔsiinl ke u li ta sei ban ban win.

¹³ Ni ye nbigim kan wan ke, un laa len ke “Uwonbɔr li bigin mi.” Nan bu-n libiginl liba kaa be ki li fir bigin Uwonbɔr i, le U mu kaa bigin uba;

¹⁴ amaa uninfo biɛn ga nbiginim, n-yonn man wee u potiɛ bir a bam dar u ki chor u nle.

¹⁵ Tɔ, ni bɔɔn bu a bam nmɔn choo lipool ke, mi yin ma tibir le, le tibir nmɔn nan yabig ke, mi mu nmaa nkum.

¹⁶ N nabubankaam, ni laa che bin lar ni.

¹⁷ Nan ŋan nin nan be kasi biɛn ye ipiin yan nyan paab le, ki nyan ti Baa wan jɔɔ papaab a weemin, wan kaa kpenn ke nbɔɔm kaah kpenn man nin.

¹⁸ U yaa wiib bu le U ma ti, ibamɔn a mɔleen yin bu, ke nin che ti kpann u bininkpeem waah naan nan biɛn ni.

Ngbirim nin ntum

¹⁹ N nabum ni li nyi ni niɛ nan bu: Ni ŋan nin uninfo li gbir weenweem, ki li pag soonsoon, wee u ŋuul mu n laa fii weenweemi.

²⁰ Uninfosaal a ŋuufiiŋ kaa che Uwonbɔr a buchinn forin ni.

²¹ Mambu, ni nyam niwann nan biɛn ye tijaginn nin nbinben biin nin, wee ki jiin niba tum ki gaa imɔleen yan wee bi ta sei nin, imɔleen nmɔn le li fee ni ki jaa.

²² Ni laa pelig imɔleen nin a binba, wee ki lar niba. Ni tum yaah len man nin.

²³ Wan pel imɔleen nan amaa wee kaa ŋa yaah len man nin ke, u nann uninfo kaah lig u nundaag niɛnu ni le,

²⁴ le u lig uba ki diɛ ke, ni bɔɔn bu u fɔr ke libol nmɔn yaan le un tam u nunaŋ kaah ye man.

²⁵ Amaa uninfo lig Uwonbɔr a siim man be kasi wee ki tenn wiibin, wee ki le gbaa ŋaan man kaa tamir nan wee u gbirin, amaa wee ki ŋaan imɔleen nin kaah len man nin ke, tikaar li be ubu waah yin tun nan biɛn nin.

²⁶ Ni ye uba tiɛr ke u ye uwonjiɛn wee kaa chor u lanbil ke, u lar uba le, u wonjiɛnl nmɔn ye yɔli le.

²⁷ Liwonjiɛnl lan wee ti Baa a num gbeeg ke li ye kasi kaa jɔɔ tibir ye nan le: Nkpeebim nin ipukɔɔ a terim bi bɔmugkaarin nin choonba ki jiin dulinya nan a ŋmaruŋ paam.