Hiibru Yaab 8 - UWONBƆR A GBƆNPƆŊ LIKƆƆNL

Yisa le ye ti minmanu a yudaau

¹ Nan bu wee ti len ni niɛ nan ye nan le: Ti jɔɔ biminmanib a yudaau, wan kal paab a naamin a naangbɔŋ nbu Jilimadaan a nɔɔjiim paamin,

² wan tun wonjiɛn bol, ibamɔn a wonjiɛn nanboŋ kan wee Uyudaan baantɔɔl tii ki-n, wee naa ye usaal le tii-n.

³ Biminmanib a yudaau wan biɛn wee bi gann biɛn ye u li tenn ipiin le ki sin ji li mann kumanug, ni bu che ni kpaa le ke uminmann yudaan nmɔn li jɔɔ nan wee u li ta mann.

⁴ Ni ye u nan bi be dulinya nan yaan ke, waa nan bi li ye biminmanib a yudaau wi, nan bu-n bininfob pii nan be ki mann nsiim nmɔn kaah wɔɔn man nin le.

⁵ Wonjiɛn bol kan yaan wee bi tun ibamɔn a toon yin ki nann le ke paab a naamin a jinjiimin. Ni niɛ bu le bi nan kpaan Moziz n-yonn man wee u na yin tii kuwonjiɛn nanboŋin ke: “Che niwann biɛn n ŋa ke maah nan wɔɔniŋ kuwonjiɛn nanboŋ kan lijɔɔl a paabin.”

⁶ Amaa itoon yan wee Yisa gaa-n yab jon bi yaa toon ke, tipoopɔnn tan wee Yisa si bininfob nin Uwonbɔr a sisiigin nin kaah jon tipookpegirin man nin, nan bu-n Uwonbɔr a mɔsiinl ŋanl nmɔn tɔɔ lifiɛŋanlin bu le.

⁷ Ni ma bu ni ye chinchinn a poor nmɔn kaa nan bi jɔɔ kuŋmaruŋ ke, baah ji nan bi li ban tipoor tiba jigin ni.

⁸ Amaa Uwonbɔr nan kan bininfob a galin le ki len ke: “Uyudaan le len ke, n-yonn chaan, le N na li poo tipoopɔnn ki sei Iziral Yaab nin Juda yaab.

⁹ Uyudaan len ke tipoor nmɔn kaa na yin nann, tan wee N nan poo sei bi yaajam n-yonn man wee N nan da bi nyan Ijibir a tingbɔŋin nni, nan bu-n baa nan ŋmag tipoor nmɔn nbamɔmi, le N nan labir ki jiɛn bi, Uyudaan le len.

¹⁰ N-yonn nmɔn nan jon ke, maah li poo tipoor tan sei Iziral yaab sɔ, Uyudaan le len. N li ta n siim ki ŋa bi potiɛrin le ki sɔb nsiim nmɔn ŋa bi sufu ni. Le n na li ye bi Wonbɔru, le bi mu na li ye n ninfob.

¹¹ Uba kaa ji na li wɔɔn u kunkɔɔn tau bee u nabig ki ke, ‘Li nyi Uyudaan ni,’ nan bu-n bi biɛn na yin nyim le, naah nyan nbuwaabin ki tan kpaa bininkpeebin.

¹² Nan bu-n N na li jiɛn bi pootomin ki per bi le kaa ji li tiɛr bi bir bu jigin ni.”

¹³ Uwonbɔr kaah nan yin tipoor nan ke, “Tipoopɔnn nin” le U ŋa tipoor tan chinn nin tipookpegir tan kaa ji tun ni; le niwann nan mu ŋa niwann kpegin ki por li bor kaa li yuuri.