Hiibru Yaab 7 - UWONBƆR A GBƆNPƆŊ LIKƆƆNL

Uminmann Melikizɛdɛg a bɔr

¹ Melikizɛdɛg nmɔn nan ye Salem a bɔru le nin Uwonbɔr wan be paab a minmanu. Abiraham kaah nan jon ki tan ton ki nyaŋ bibɔrtiib wee ki chaa kun nin, le Melikizɛdɛg nan to u nsan bu le ki kaab Uwonbɔr a kaar ki jaa u bu,

² le Abiraham nan nyan waah jɔɔ nan biɛn piig a poolin libaba ki sei u. Chinchinn, Melikizɛdɛg a yinl a taai le ye “Tibuchinn a bɔru”; le ki ji ye “Salem a bɔru” le li mu a taai ye “Nposɔɔn a bɔru.”

³ Waa nan jɔɔ baa bee na, kaa jɔɔ yaajasan, kaa jɔɔ maa daali bee kum daali, u nann Uwonbɔr a Bija le, ki ye u minmanu hali nin iyoo yan kaa jɔɔ diɛm.

⁴ Ni tiɛr ki lig uja nmɔn kaah nan ye lininfo takpenl man: Hali ke ti yaaja Abiraham nan nan nyan waah to bitɔb ki fee nan biɛn a piig a poolin libaba le ki ta sei u!

⁵ Uwonbɔr nan siin nsiim ke ban ye Liifai a yaabili wee ki ye biminmanibin li gaan bi tɔɔl a ninfob Juu yaab kaah jɔɔ nan biɛn piig a poolin libabau, hali nin bi nabum nmɔn kaah le ye Abiraham a yaabili yin na.

⁶ Uja nmɔn kaa nan kpinn Liifai yaabi, amaa le u nan gaa niwann biɛn piig a poolin libaba Abiraham ban, ki kaab tikaar jaa uma wan nan gaa Uwonbɔr a mɔsiinlin bu.

⁷ Naa jɔɔ nbiɛnimi, wan kaab tikaar jon wan wee u kaab jaar u bu nan na.

⁸ Biminmanib ban gaan niwann biɛn piig a poolin libaba bininfob ban nin nan kpeg le; amaa Melikizɛdɛg ma kaa kpo, u be u miɛfolin ke Uwonbɔr a gbɔŋ kaah len man nin.

⁹ Uba li fir len ke Liifai, ban nan gaan piig a poolin liba-n, Abiraham le bi nan ti for le u jɔɔ tenn bi,

¹⁰ nan bu-n Melikizɛdɛg kaah nan to Abiraham nsan bu n-yonn man nin, ki miin baa laa nan ma Liifai.

¹¹ Ni ye Liifai a bol ban ye biminmanibin a toon yin nan bi ŋan ke (ni ma bu le Uwonbɔr nan sei bi nsiimin), ba ŋa wee ni ji nan kpaa talar ke uminmann uba n ji dan ki ye wan be ke Melikizɛdɛg, kaa ye Arɔnn a maalimin naa?

¹² Ni bu ni ye bi kpenn biminmanibin ke, see ke nsiim mu kpenn.

¹³ Tibɔr nan kaah pag ki jiin ti yudaau wan paamin, waa ye wan nyan Liifai a bolin ni, le u bol a ninfo uba kaa la nan nyi ki tun kumanug a toon Uwonbɔr a manug a binbinl bu.

¹⁴ Ti nyi ke ti yudaau nmɔn nan nyan Juda a maalimin le, amaa Moziz kaa pag niba ki jiin bi bol nmɔn paam ke bi ye biminmanibi.

Uminmann uba wan nann Melikizɛdɛg

¹⁵ Ni ye biminmanib a yudaau wan nann Melikizɛdɛg degirin ke, nan wee ti pag nmɔn li mann wonn binum,

¹⁶ ki ye wan kpann uminmann kaa ye wan nɔɔ u yaajam a siim kaah wɔɔn man nin amaa ki ye limiɛfol lan kaa jɔɔ ndiɛmin a pɔɔm.

¹⁷ Ni ma bu ni sɔb Uwonbɔr a gbɔŋin ke, “A ye uminmann le, wan a toon yin be ke Melikizɛdɛg a toon kaah nan ye man nin hali nin n-yonn man kaa jɔɔ diɛmi.”

¹⁸ Uwonbɔr tir nsiim kpegimin le ki tabin ngbaan mi daburigi nin mi kaa jɔɔ nyɔɔr n bu,

¹⁹ (nsiim nmɔn kaa nan fir ŋa niba kasi), mambu le Uwonbɔr wɔɔn ti tama kan ŋan, nan che ti fɔɔr mal Uwonbɔr.

²⁰ Le Uwonbɔr nan poo tipoor! Amaa le biba nan ŋa biminmanib a yudam le waa nan poo tipoori,

²¹ amaa Yisa nan ŋa biminmanib a yudaau nin tipoorin le, n-yonn man wee Uwonbɔr nan bei u ke, “Uyudaan poo tipoora le kaa yin kpenn U potiɛli ‘A ye uminmann wan a toon kaa jɔɔ diɛm le.’”

²² Tipoor nan bu, le Yisa ta uba ki siin ke tipooŋann n tun.

²³ Biminmanib nmɔn yaba, nan bu-n nkum gen bi toon le baa fir tun chaari;

²⁴ amaa Yisa kaah be nin n-yonn man kaa jɔɔ diɛmin, u minmanug a toon nmɔn yin gbaa be le.

²⁵ Mambu u li fir fee ban dan Uwonbɔr ban u ma bu-n iyoo biɛn ki gab, nan bu-n iyoo biɛn u be le ki miɛ ter bi.

²⁶ Biminmanib a yudaau nmɔn le tenn ti taah ban nan, ki ye wan be kasi, kaa jɔɔ igalin ni, kaa jɔɔ tijaginn ni, le Uwonbɔr che u be u binba kaa ŋmar nin tibirdamin ni, ki don u yinl ki jon ban biɛn be paab a naamin yaan.

²⁷ Waa be ke ban nan ye biminmanib a yudamin ni, waa nan chinn mann kumanug lidaal biɛn u tɔɔl a bir bu, wee ki nin mann bitab a bir bu. U nan mann kumanug nba bu le ki sei bi biɛn bi bir bu waah nan ta uba ki mann kumanugin.

²⁸ Ni ma bu nsiimin nan gann ndaburim le ki ŋaan bi biminmanib a yudam; amaa tipoor, tan nan ŋɔɔrin nsiimin a bɔɔn nin, nan gann Uma Uwonbɔr a Bija, wan bi ŋa u kasi hali nin isaŋ yan kaa jɔɔ diɛmin le.