Hiibru Yaab 5 - UWONBƆR A GBƆNPƆŊ LIKƆƆNL

¹ Bi gann biminmanib a yudaau biɛn bininfob a sisiigin le, ki ta siin u kpiɛtiib a taai Uwonbɔr ban, ke u jɔɔ ipiin nin bi bir a manug ki tenn Uwonbɔr.

² U li fir ŋmag ban kaa nyi-n, nin ban borin soon, nan bu-n u tɔɔl ye wan jɔɔ idaburig le.

³ Ni ma bu le ni kpaa talar nin un mann u tɔɔl a bir a manug, nin bininfobin a bir a manug.

⁴ Uba kaa li fir ta biminmanib a jilima nmɔn ki sei ubaantɔɔli; amaa see ke Uwonbɔr yin udaan, a li ke waah nan yin Arɔnn man nin.

⁵ Masiya mu kaa nan taa kupag nmɔn ubaantɔɔl a bam bu ke un ŋa biminmanib a yudaau wi. Amaa Uwonbɔr le nan bei u ke, “A ye N Bija le; dinan le N kpann a Baa.”

⁶ Le ki ji len niba yaan ke, “A ye uminmann le wan a toon yin be ke Melikizɛdɛg a toon kaah nan ye man nin hali nin n-yonn man kaa jɔɔ diɛm.”

⁷ Yisa kaah nan be dulinya nan yaan n-yonn man nin, u nan miɛ Uwonbɔr le ki bei U waah ban nan, ki mɔr nkukɔpɔɔn nin tinyinyinn ki ŋaan U, Uwonbɔr wan li fir fee u nkumin nin, waah nan jɔɔ jiininba ki tenn Uwonbɔr nin limɔcheelin bu le U nan gbir u miɛm.

⁸ Hali nin waah le nan ye Uwonbɔr a Big nmɔn biɛn ni u nan tinn limɔcheel le u fala a jimin,

⁹ waah nan nan ŋa nan kpaan ki diɛ-n, le u nin ye feegabdaan ki sei ban biɛn chee u mɔbin,

¹⁰ le Uwonbɔr gann u ki ŋa u biminmanib a yudaau wan a toon be ke Melikizɛdɛg a toon kaah nan be man nin.

Ikpaan ki ta jiin Yada a ta gab Paam

¹¹ Ti jɔɔ tibɔr takpem ki bi li pag ki jiin tibɔr nan paam, amaa le ni pɔɔ nin ti mann wɔɔn ni taai nan bu-n naa tinn ki biɛr weemi.

¹² Ibamɔn buu n-yonn nan, ni kpaan ni li ye ban wɔɔnn le, amaa le ni ji ban uba n wɔɔn ni Uwonbɔr a bɔr a piinimin a bamɔn. Ni ban nbiim le, naa kpaan nin tijiir tan kpiɛgi!

¹³ Wan la mɔɔ nbiim ke, udaan la ye kiwatirig le, wan a lam kaa la gɔnn ni, nin tibuchinn a wɔɔmin paami.

¹⁴ Amaa ban chegir le kpaan nin tijiir tan kpiɛg, bi ma ye ban nan gbaa tinn ki biɛ nan ŋan nin nan bir a bɔgirim.