Hiibru Yaab 4 - UWONBƆR A GBƆNPƆŊ LIKƆƆNL

¹ Mambu, Uwonbɔr kaah siin limɔsiinl ke U li sei ti lifooril lan nin kaah la si nbu, ni che ti choo tiba wee uba laa nan lann lifooril nmɔn ni.

² Ti mu gbir tibɔŋann nmɔn ke baah nan gbir ti man nin le; amaa baah nan gbir tibɔŋann nmɔn taa nan jɔɔ tinyɔɔr ki sei bi, nan bu-n baa nan ta tibɔŋann nmɔn ki kpiɛ bi yada ni.

³ Daandaan nan, tim ban ŋa yada nan kan lifooril nmɔn na, a li ke Uwonbɔr kaah len ke, “Mambu le N poo bimɔb N ŋuul kaah fii-n bu ki ke, ‘Baa li kan lifoorili.’ ” Nin ni ma biɛn na U pii nan diɛ U toon yin dulinya nan a piinimin le.

⁴ Ni ma bu, niba yaan U pag ki jiin iweehn ilile nmɔn paam ke, “Iweehn ilile daal le Uwonbɔr nan nan diɛ U toon biɛn le ki foor.”

⁵ Le Uwonbɔr ji nan len nkarim nmɔn yaan ke, “Baa li kan lifooril N ban ni.”

⁶ Ni le la biɛn nin ye man le ke biba na li kɔɔ lifooril nmɔn yaan, amaa ban nan chinn ki gbir tibɔŋann nmɔn nin kaa nan kɔɔ lifooril nmɔn yaan ni, nan bu-n bi mɔyiil nbu.

⁷ Ni ma bu, le Uwonbɔr ji siin lidaal liba, ki yi lidaal nmɔn ke dinan, ni bɔɔn bu ni nan yuura le u ni nan che Defid pag lidaal nmɔn a bɔr, a li ke naah pii nan len man Uwonbɔr a gbɔŋin ke: “Dinan, ni ye ni gbir U kukɔl ke, ni laa ŋa tukangbirdami.”

⁸ Nan bu-n ni ye Josuwa nan bi sei bi lifooril ke, Uwonbɔr kaa ji nan bi li pag lifooril daal a bɔr ni bɔɔn bu.

⁹ Mambu lifooril daal le la si le ki sei Uwonbɔr a ninfob;

¹⁰ Wan kɔɔ Uwonbɔr a foorilin ke, udaan tɔɔl kan u tɔɔl a lifooril la, a li ke Uwonbɔr kaah nan foor man ni.

¹¹ Ni ma bu, ni che ti pɔɔn tiba wee ki kɔɔ lifooril nmɔn yaan, wee ti ni uba laa nɔɔ limɔyiil a sam ki nan lu.

¹² Uwonbɔr a mɔbonl fo le ki tun itoon. Ki ka ki jon ijumɔɔŋ ilee, ki fin jiil uninfosaal ki piir u naaŋ nin u miɛfol, ki kɔɔ for u tugiri nin u kpabi a nsugirim, tibɔr nmɔn le ji feen ki biɛr usaal a sufu a binbem, nin u potiɛl kaah be man.

¹³ Uwonbɔr kaah naan nan biɛn niba kaa be wee ki woo wee waa ga ni. Niba kaa degi, niwann biɛn dɔ npaan ni le Uwonbɔr a numin, wan wee ti biɛn na yin kpiir ta tun nan ki wɔɔni.

Yisa le ye biminmanib a yudaau

¹⁴ Mambu taah jɔɔ biminmanib a yudaau wan ye Uwonbɔr a Bija Yisa wan nan don paabin, ni che ti li ŋmag ti yada kan ti ŋa nan kenken na.

¹⁵ Taa jɔɔ biminmanib a yudaau wan kaa li fir jogir ti, ti daburigin ni, amaa ti jɔɔ wan nan kan nbiginim niwann biɛn nin, a li ke taah be man nin, amaa waa nan jɔɔ tibiri.

¹⁶ Ni bu ni che ti fɔɔr mal Uwonbɔr wan ye unyunyunbasann nin a naangbɔŋin ban nin tidindann, wee ti kan linyunyunbasanl n-yonn man wee ti ban.