Hiibru Yaab 2 - UWONBƆR A GBƆNPƆŊ LIKƆƆNL

Nŋmarim man polig

¹ Mambu ni kpaa talar le nin ti li ŋmag ibamɔn yan wee ti nan gbirin, wee niba laa ta ti ki nya ibamɔn nmɔn yaan ni.

² Nan bu-n Malakam kaah nan pag tibɔr tan sei ti yaajamin nan wɔɔn ke ni ye ibamɔn le, le ban nan yii tibɔr nmɔn nan kan litudaril lan kpaan bi ke,

³ ti yin ŋa nii wee ki ŋmara, ni ye ti yii nŋmarim man polig nan ke naa? Nŋmarim man wee Uyudaan nan chinn pag mi bɔrin, le ban nan gbir U bɔr nmɔn jin ti siɛra ti ban.

⁴ Uwonbɔr tɔɔl nan jin mi siɛra nin ligaril a siɛra nin lijinjeel a toon nin ligaril a toon balbal, nin waah nan ta U kasi a Naaŋ a piini ki tol bi waah ban man.

Wan lii ti sam ki chaa nŋmarimin

⁵ Uwonbɔr kaa len ke malakam le ye dulinya kan wee ti pag nan a yudaau wi.

⁶ Amaa uba mu nan jin siɛra Uwonbɔr a gbɔŋin ke: “Uninfo ye baa wee a potiɛl be u ni, Uninfosaal a bija wan wee a baga be u ni-n naa?

⁷ A nan ŋa u le ki che u jilima waar kaa foo malakam yaali; le a sei u jilima nin kupag a yuchigirig

⁸ ki ta niwann biɛn ki ŋa u nɔɔn.” Uwonbɔr kaah ta niwann biɛn ki ŋa Yisa a nɔɔn nin, Uwonbɔr kaa nan che niba gur kaa ye u yaan ni. Amaa daandaan nan taa kan waah ye niwann biɛn man ni.

⁹ Amaa ti kan Yisa, wan wee Uwonbɔr nan jiin u tum wama malakam ban nin, daandaan nan, u chig kupag nin jilima a yuchigirig le waah jin nkum a fala-n bu, wee Uwonbɔr a nyunyunbasanl bu u nan che u kpo uninfo biɛn bu-n.

¹⁰ Waah yin ta nbuwaab takpem ki kɔɔn kupagin nin, ni nan kpaan ke Uwonbɔr wan nan naan niwann biɛn, nin wan bu wee niwann biɛn be-n, Un ŋa bi feegab a daau kasi u fala a jim bu.

¹¹ Yisa le che bininfob be kasi, le kasi dam nmɔn nin Yisa ye iniin yaab. Ni bu ifa kaa jɔɔ Yisa nin un yin bi ke u nabumi.

¹² U len ke, “N li mɔɔn a yinl ki sei n nabum; biwonjiɛm a nintogil n li gaah ilan ki don a yinl.”

¹³ Le ki ji len ke, “N li gaa Uwonbɔr ki ji.” Le ki ji nan len ke, “Min sɔ do, nin n buwaab ban wee Uwonbɔr ta seimin.”

¹⁴ Baah ye nbuwaab ki jɔɔ tigbanann nin nchamin, ni bu le Yisa mu nan kpann uninfo ke uma nin bininfob li jɔɔ tigbanann tiba, wee u kumin ke u nan bii Sintani wan ŋmag nkum a pɔɔmin,

¹⁵ wee ki fee ban a binbem biɛn ŋa bi tiyomir nkum bu dulinya nan yaan nin ki gab.

¹⁶ Ni ye ibamɔn le, naa ye malakam le U teri, amaa Abiraham a yaabili le U ter.

¹⁷ Ni nan bu ni nan kpaa talar le u li be ke u nabum kaah be man nin niwann biɛn nin, wee ki fir kpann biminmanib a yudaau wan yab ki si nba bu nin wan ye unyunyunbasann u toon yin ki sei Uwonbɔr, ki ta uba ki mann tibir a manug ki sei bininfob.

¹⁸ Yisa tɔɔl kaah nan kan nbiginim ki jin fala nbu, u li fir ter ban wee nbiginim kan bin.