Hiibru Yaab 12 - UWONBƆR A GBƆNPƆŊ LIKƆƆNL

Ti Baa Uwonbɔr

¹ Mambu taah jɔɔ siɛradam takpem ban gɔɔn jin ti nan, ni che ti ta nan biɛn li legin ti samin ki gab nin tibir tan fir chor ti-n, ni che ti nyigin ki guun ti taguunl lan dɔ guu ti nan.

² Ni che ti ta ti num ki tɔɔn Yisa bu, wan ye ti yada a piinim nin njoorimin. U nan jin fala lidapunpunl bu nin limɔril kaa san ifa, nmɔn man nan dɔ guu nbu, ki kal Uwonbɔr a naangbɔŋ bu u nɔɔjiim paam.

³ Ni li tiɛr waah kan limugil tibirdam ban kaa nan chee win a nɔɔn nin bu, wee nin laa che ni gbanann ngbarig wee ni ta ni yada gabi.

⁴ Naah kɔn nin tibirin, naa la kɔn tan foo nan yaan ye ni nyan ni chami.

⁵ Ni tam imɔleen yan wee Uwonbɔr ta pɔɔg ni gbanann ki yin ni u buwaab ki ke: “N big, Uyudaan dar a tul ke, laa yin li yɔli, ni ye U fuun a bu ke, laa che a gbanann ngbɔɔ,

⁶ nan bu-n Uyudaan kpaan ban wee U jiɛ-n le, le ki dar wan biɛn wee U chee sei u ke u ye a bigin a tul.”

⁷ Chee sei limugil a tuntomin na ke ni ye ikpaan le; Uwonbɔr ŋmag ni le ke u buwaabin. Bibolinba wee ki baa kaa kpaan kaa?

⁸ Ni ye baa kpaan ni (wee ni biɛn kan ikpaan ke), man ke naa ye u baantɔɔl a bimarimi.

⁹ Nan kpiɛ, ti biɛn nan jɔɔ ti baam ban ma ti tininforin nin, ki kpaan ti le ti tenn bi jilima ni bu. Mambu ni ŋan ti chee sei wan ye ti naaŋ a Baa-n ke nin jo man wee ki fo!

¹⁰ Ti baam nan ti kpaan ti le wama baah tiɛr ke ni ŋan man; amaa Uwonbɔr ma kpaan ti le naah ŋan sei ti bu, naah li ŋa man wee ti por u kasi a binbemin.

¹¹ Ikpaan a yoo kaa jɔɔ nmɔni, amaa ni ye nton le. Ni bɔɔn bu ke, le nim ban mu tinn nmɔn nkan nbuchin binben nin nposɔɔn.

Nwɔɔm nin ikpaan

¹² Mambu, ni tann ni nɔɔi yan bagin nin ni dun yan kaa pɔɔ nna.

¹³ “Ni mann nsan man tel ki sei ni taai,” wee ni laa nyaŋ kuwɔbigi, amaa wee un kan kutebug.

¹⁴ Ni pɔɔn niba ki li jɔɔ nposɔɔn nin bininfob biɛn wee ki li be kasi; naa jɔɔ kasi a binbem ke uba kaa li fir kan Uyudaan ni.

¹⁵ Ni laa che uba n nan lann Uwonbɔr a nyunyunbasanli, wee nin laa che nton a sibonl npa ki yabig ni sufu-n ni wee nin ta kuŋmaruŋ ki dan ki bii bininfob takpemi.

¹⁶ Ni laa che ni ni uba n tun iwanchɔgin toon upiibanlin bee ujabanlin ni, bee kaa jɔɔ nwonjiɛn binben ke Esɔɔ, wan nan kɔɔr u ninkper a faal kisaayiig kiba bu nni.

¹⁷ Ni bɔɔn bu, a li ke naah nyi man nin, waah nan nan ban un gaa lifaal nmɔn a kaarin u baa nan yiiu, waa nan fir kpenn u baa a potiɛli, nin waah le nan ban tikaar nmɔn ki mɔr nin tinyinyinin biɛn yɔli.

¹⁸ Nim kaa foo lijɔɔl lan wee ni li fir ma li wee li gaan nŋmi nni; nan yaan wee nibɔɔngem ki ŋmin sulim wee ntafapɔɔrim daar;

¹⁹ kunaatuŋ kaah mɔr nan yaan bee likukɔlin kaah pag ileen yan, wee ban nan gbirin nan balin ke u laa ji pag ileen nmɔn sei bi,

²⁰ nan bu-n baa nan li fir ŋmag nsiimin kaah wɔɔn man nin ke: “Hali ni ye kuwankobug le maa lijɔɔl nmɔn ke, bin gabir ki itangbag ki kuu.”

²¹ Baah nan kan nan nin nan jɔɔ bijawaam le, le Moziz len ke “Bijawaam le jɔɔm le n gbanann jegil.”

²² Amaa nim foon Zayɔnn a Jɔɔlin ban na, papaab a Jerusalam n-yaan, Uwonbɔr wan fo-n a tiŋin, ni foon malakam turil mu a tuturil a mɔmin a laguŋ n-yaan na,

²³ ni foon biwonjiɛm ban ye nbininkpeemin ban na, ban a yin sɔb dɔ papaabin. Ni foon Uwonbɔr, wan ye bininfob biɛn a bɔjiru win ban na, bininfob buchim ban a naaŋ ŋa kasi,

²⁴ ni foon Yisa wan ye usandanfaar tipoopɔnn n bu ban na, nin ncham jɔg kaam man pag ibamɔn ki jon Ebiɛl a chamin ban na.

²⁵ Ni laa nyi yii Uwonbɔr wan pag nan ni. Ni ye baa nan ŋmar baah nan yii wan a kpaan yin dulinya nan yaan nin ban ke, ŋma nin nan chaa baan timaa, ni ye ti labir ti bɔɔn kpaa wan be papaab ki kpaan ti nan ke naa?

²⁶ Iyaayoo nmɔn, Uwonbɔr a kukɔl nan che dulinya dam le, amaa daandaan nan u siin limɔsiinl ki ke, “Maa ji yin che dulinya a binba n dami, amaa n li che paab mu n dam.”

²⁷ Imɔbon yan len ke, “N ji li chee-n,” wɔɔn ke tiwann tan dam ki ye tiwann naan kaarin na li choo nyan ki jiɛn tan kaa yin damin paar.

²⁸ Mambu taah gaan nnaam a yerin man kaa li fir dam nan, ni che ti pag Uwonbɔr, ki li jiɛn u nin jilima nin bijawaam,

²⁹ ni ma bu “Ti Wonbɔru nmɔn ye nŋmi man gaan le.”