Hiibru Yaab 11 - UWONBƆR A GBƆNPƆŊ LIKƆƆNL

Yada

¹ Yada a ŋaam ye taah kaa jɔɔ nbiɛnim nin nan wee ti jɔɔ tama ni bu-n, wee ti num kaa ga nin.

² Ni niɛ nan bu le yaaja yonn a ninfob nan jɔɔ kupag.

³ Yada bu le ti biɛ ke Imɔleen le Uwonbɔr nan ta naan dulinya, ni bu naa ye nan wee ti ga nan le Uwonbɔr nan ta naan dulinya.

⁴ Yada bu le Ebiɛl nan mann kumanug ŋaŋ ki sei Uwonbɔr ki jon Kenn a manug. Yada bu le Uwonbɔr nan pag u ke u ye ubuchin le, Uwonbɔr kaah nan pag nan ŋan ki jiin u manugin paamin. Yada bu le u le la pag, hali nin waah le kpo nan.

⁵ Yada bu le Uwonbɔr nan taah Enog dulinya nan yaan; le waa kan nkumi; le uba kaa ji nan kan wi, nan bu-n Uwonbɔr le nan ta u don paab. Nin Uwonbɔr kaah nan nan ta u don paabin, U nan pag u ke uma ye wan gbee Uma Uwonbɔr a num.

⁶ Naa ye yada ke uba kaa li fir tun wee nin gbee Uwonbɔr a numi, nan bu-n wan biɛn dan Uwonbɔr ban ke ni ŋan udaan li jɔɔ yada ke Uwonbɔr be, ki ye wan tenn ban ban u nin inunman tinyɔɔr.

⁷ Yada bu le Nowa, Uwonbɔr kaah nan kpaan u ikpaan ki ta jiin tiwann tan paam wee u num kaa la nan kan nin, le kasi a jawaam nan che u kpee kuŋaluŋ kan fee uma nin u niin yaab gabin. U yada bu le Uwonbɔr nan bii dulinya le Nowa kpann ufaajir u buchin tan nyan u yada nin.

⁸ Yada bu, Abiraham nan chee Uwonbɔr a yim ki jon kitiŋ kan wee Uwonbɔr nan siin limɔsiinl ke U li ta kitiŋ kan ki sei win, u nan chee Uwonbɔr a mɔb le ki jon, hali nin waah kaa le nan nyi kitiŋ nmɔn yaan ni, ni biɛn yɔli u nan jon na.

⁹ Yada bu le u nan ŋa u kukɔɔbol limɔsiinl a tiŋin n-yaan ki be ke uchaan kaah ŋaan man kitinchaŋin nin, u nan be Tinanbonn nin le uma nin Azig nin Jekɔb ban mu nan ye limɔsiinl nmɔn a faajibin.

¹⁰ Nan bu-n u nan lig nintogil le ki guu kitiŋ kan a fiɛl wee Uwonbɔr nan loon wee ki maa ki-n.

¹¹ Yada bu le Abiraham nin u poo Sɛra wan nan ye upiiŋɔɔb ki ji porin nan kan npɔɔn ki ma ki big, nan bu-n bi nan ŋa Uwonbɔr wan nan siin limɔsiinlin le yada.

¹² Hali nin Abiraham kaah kaa ji nan fɔg nin nkumin gbaa, uma uja uba nmɔn a yaabili le nan yabig ke iŋmabil yan be titalangbann nin ni, ki ji yab ke limɔgil a gbaam a tanbiidil yan kaa jɔɔ kanlin.

¹³ Bininfob nan biɛn la nan be nin bi yada le ki kpo. Baa nan gaa tiwann tan wee Uwonbɔr nan siin limɔsiinlin ni; amaa bi nan kan tiwann nmɔn dindanl le ki jɔɔ npopeen. Bi nan chee ke bi ye kitiŋ kiba a ninfob le ki ye bicham dulinya nan yaan.

¹⁴ Bininfob ban pag man nin nmɔn wɔɔn ke bi ban kitiŋ kan ye bi tɔɔl yaag le.

¹⁵ Ni ye bi nan bi tiɛr kitiŋ kan yaan wee bi nan fiin nbu ke, na bi nan bi kan nsan ki jira.

¹⁶ Amaa bi nan ban kitiŋ kan ŋan le, ki be papaab. Mambu naa jɔɔ Uwonbɔr ifa nin bin yin U ke bi Wonbɔr wi, ni ma bu U mann kitiŋ le ki guu bi.

¹⁷ Yada bu Abiraham, Uwonbɔr kaah nan mag u ligin, u nan ta u bija Azig ke un mann kumanug ki sei Uwonbɔr. Uma wan nan gaa limɔsiinlin ji nan yin ta u bijagaŋ nmɔn le ki mann kumanug,

¹⁸ hali nin Uwonbɔr kaah le nan bei u ke, “Azig bu le bi na li tiɛr a yaabili bu-n.”

¹⁹ Abiraham nan tiɛr ke Uwonbɔr li fir fiin utakpiir nkumin, pag wonn a poolin, u sin nan gaa Azig ki nyan nkumin.

²⁰ Yada bu le Azig nan kaab tikaar jaa Jekɔb nin Isɔɔ bu ki jiin iyoo yan la chaan nin paam.

²¹ Yada bu Jekɔb, kaah nan yin kpe-n, u nan kaab tikaar ki jaa Josef a naachim bu ubaba, le ki nyii u jaangbiɛg bu ki jiɛn Uwonbɔr.

²² Yada bu Josef a kum kaah nan malin, u nan pag Iziral yaab a nyam Ijibir a tiŋin, ki ji wɔɔn bi waah kpo ke bin ŋa u kpabi man.

²³ Yada bu le Moziz a baa nin u na nan ta u ki woon iŋmal itaa, baah nan maa u a bɔɔn. Bi nan kan ke Moziz ye kibiŋiŋaŋ kan kaa jɔɔ kpiɛg le, mambu baa nan san ubɔr a siimin ni.

²⁴ Yada bu Moziz kaah nan yabig, u nan yii le kaa ban bin ke u ye ubɔr Faro a bisa a bigi.

²⁵ U nan chee nin un ji fala nin Uwonbɔr a ninfobin, ki jon nin un ji tibir a mɔm man kaa yuurin na.

²⁶ U nan tiɛr ke u jin ifa Masiya bu ke ni jɔɔ tinyɔɔr jon Ijibir a jɔɔma, nan bu-n u num nan tɔɔ u nyɔɔr tan be nintogilin bu le.

²⁷ Yada bu Moziz nan nyan Ijibir, kaa san bijawaam ubɔr a ŋuul bu; u nan jɔɔ limɔril le, nan bu-n u nan kan Uwonbɔr wan wee baa ga-n le.

²⁸ Yada bu le u nan ŋmag Yuglagir a chiigin, ki nan che bi ta ncham ki jɔg jɔg inaangan bu ke nkum a malaka wan ku nbininkpeemin nan foon ke, un laa ku Iziral yaab a bininkpeemin ni.

²⁹ Yada bu le Iziral yaab nan don limɔgmanlin ke kitinkooŋin; amaa Ijibir yaab ma kaah nan bigin ke bin do-n, nnyum nan jin ba.

³⁰ Yada bu Iziral yaab kaah nan choon jin Jeriko a goi a lapoob iweehn ilile-n, ni bɔɔn bu i nan lur le.

³¹ Yada bu baah nan ku ban ye limɔyiildamin, baa nan ku Rahab wan nan ye lipiijagɔɔrilin ki kpiɛ bi bu, nan bu-n waah gaa Iziral a ninfob ban jon bin pigir kitiŋin ki ligin ki woon u niin nin bu.

³² Ke n ji yin len ke baa? Maa jɔɔ isaŋ nin n pag ni Gidion, nin Barag, nin Samisin, nin Jafita, nin Defid, nin Samɔɔl nin bilinlemin biɛn a bɔri,

³³ ban a yada bu wee bi nan kɔn ki nyaŋ ntim a bɔrtiib, ki tun ibamɔn a itoon, ki kan nan nan ye Uwonbɔr a mɔsiinlin; ki ye ban nan loon igbegin a mɔɔŋi,

³⁴ le ki junn nŋmipeen a tuntom, le ki guun ŋmar takoobi a kumin; ban a daburigi nan kpann npɔɔn, le ki nan to bitɔb nin npɔɔn ki nyaŋ itindoo a tɔtob.

³⁵ Bipiib biba a takpiib le Uwonbɔr nan fiin bi nkumin, le bi ji be nin bi miɛfol. Biba nan kan limugil, amaa le baa chee bin guun nin, naah li ŋa man wee bin kan nkum a fiim man ŋan.

³⁶ Bi nan daar bibam nyɔɔrug le ki boo bi, le ki lol bibam tikulor ki kɔɔn bibam mu tiloondirin.

³⁷ Bi nan gabir bi itangbag, ki jiil bibam por milee lee, ki ta takoobi ki ku bibam. Bibam nan yee tipeegbann le nin tiŋɔɔgbann, ki ye faladam, le bininfob mugir bi ki ŋaan bi nan kaa ŋan.

³⁸ Dulinya kaa nan kpaan bi. Bi nan choon yelin le kukunkɔɔg nin ijɔɔ a paab, ki dɔɔ titangbafiɛrin nin ifalin.

³⁹ Bi niɛ nan biɛn bi yada bu le Uwonbɔr nan pag bi, amaa le bi ni uba kaa gaa nan wee Uwonbɔr nan siin limɔsiinl ke U li sei bin ni.

⁴⁰ Uwonbɔr nan bon ibonn yan ŋan le ki sei ti ke tim nin bi ma nan lagin ki be ke u li ŋa bi kasi.