Filipi 1 - UWONBƆR A GBƆNPƆŊ LIKƆƆNL

¹ Min Pɔɔl nin Timoti, tim ban ye Masiya a yomi, Le sɔb kugbɔŋ nan ki tenn Uwonbɔr a ninfob gannkaab ban be Masiya nin ki be Filipi a tiŋin, ki kpiɛ ban ye biwonjiɛn sanliib nin bititeribin:

² Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be nin ni.

Pɔɔl kaah nan miɛ Uwonbɔr sei Filipi yaab man

³ N tenn Uwonbɔr kunɔɔpoog n-yonn man biɛn wee n tiɛr ni bu.

⁴ Iyoo biɛn ni ye n miɛ Uwonbɔr ki tenn ni biɛn nan ke, n miɛ nin nmɔn le,

⁵ nan bu-n naah terim man tibɔŋann nmɔn a toon yin npiinim ki nan kpaa daandaan nan,

⁶ n jɔɔ tidindann, ki nyi ke Uwonbɔr wan piin itoon ŋan nan nin ni-n, u yin ŋmag ni man le hali nin n-yonn man wee u na yin diɛ itoon ŋan nmɔn, Masiya a jirin daal.

⁷ Ni ŋan nin maah tiɛr ni biɛn nan bu, naah be n sufu-n nin bu; maah be libaalin bee maah pag ki wɔɔn ki mann tibɔŋannin, ni biɛn nan por Uwonbɔr a nyunyunbasanlin nin ma.

⁸ Uwonbɔr le ye n siɛradaau, ki nyi maah ban n kan ni bu man nin Masiya a jiɛmin.

⁹ N miɛ Uwonbɔr le ke: Ni jiɛm nmɔn n mann ki kpiɛ ki ji kpiɛ ni nlamin nin nbiɛmin,

¹⁰ wee nin che ni fir ki gann niwann nan ŋan ki be kasi kaa jɔɔ igalin ki nan kpaa Masiya a dan daal,

¹¹ ki gbee nin nbuchin binben man nyan Yisa Masiya ni, ki li ye kupag ki tenn Uwonbɔr.

Masiya bu le ti be

¹² N nabum, n ban ni biɛ ke niwann nan ŋaam nan bu le che tibɔŋann nmɔn fir mɔɔn.

¹³ Ni ma nan che bitɔtogib ban guu ibɔr niin nin, nin ibɔrniin a ninfob biɛn nan biɛ ke Masiya bu le n be libaalin.

¹⁴ N baal nan bu, ni che n nabum takpem ban nɔɔ Uyudaan a samin, pɔɔg bi gbanann ki pag Uwonbɔr a bɔrin nin lipoobil kaa san bijawaami.

¹⁵ Ni ye ibamɔn le ke, biba mɔɔn Masiya a bɔr nmɔn ki jɔɔ linunchɔril le nin lipiiponl, amaa le biba mu mɔɔn ti nin ti ŋam bu.

¹⁶ Ban tun nin njiɛmin bi ma nyi ke Uwonbɔr le taam ŋa do ke n ji tibɔŋann nan a siɛra.

¹⁷ Ban tun nin linunchɔril nin lipiiponl mɔɔn ti nin kujaŋuuŋ le, naa nan ye lipotiɛŋanli, ki tiɛr ke bin ban tibɔr ki jaa min bu n-yonn man wee bi nan baanim tikulorin.

¹⁸ Ke ni niɛ nan yin ŋa baa? Nan kpaa talar le ye baah mɔɔn Masiya a bɔrin nsan man biɛn bu-n, naah ye tipotiɛbir bee ibamɔn a sam buu, Masiya a bɔrin pii mɔɔn na. Mambu ni mɔm le. Nn ni le yin gbaa mɔm le,

¹⁹ ni ma bu le n nyi ke ni wonmiɛl nin Masiya a Naaŋin yaa terim bu, nan dan n bu nan biɛn li labir ki seim nŋmarim.

²⁰ N nunman nin n tama ye le ke, n laa ji ifa, amaa wee ki li jɔɔ lipoobil daandaan nan nin iyoo biɛn, hali ni ye n kpo le bee n fo ke ni, n che Masiya a yinl nkan ndom n gbanann nin.

²¹ Min bu ke, ni ye n fo be ke, Masiya bu le n be, n mu ti ji kpo ke, ni ye tinyɔɔr le.

²² Ni ye n be ki fo nin n gbanann ke, n toon yin li lo iloon. Nin ni ma biɛn ni n yin gann ni labaa? Maa nyi!

²³ N be niwann nilee nmɔn a sisiigin le: N sufu ban ke n nya dulinya nan yaan ki tan li be Masiya ban, ni ma ŋan takpem;

²⁴ Amaa nim bu le ni kpaa talar ke n li be nin tigbanann.

²⁵ Ni niɛ bu ni che n biɛ ke n la li be, ki li gbaa be nin ni wee ni jo nintogil nin nmɔn nin yada,

²⁶ wee n ji nan be ni ban ke, ni mɔm man wee ni jɔɔ nin Masiya nan n mann gbeen ni min bu.

²⁷ Nan biɛn ŋa ke, ni che ni binbem li be ke Masiya a bɔŋann nin kaah wɔɔn ni man ni. Wee ni ye n dan ni ban ki nan gɔnn ni bee maa dan ni wee ki sin gbir ni bu ke, n li nyi ke ni si nbamɔm nin kinaaŋ kiba, ki lagin jɔɔ lipotiɛl liba ki kɔn ni yada wan wee ni jɔɔ tibɔŋann nin bu,

²⁸ naah kaa san bininfob ban fann ni nan. Ni ma ye siɛra ki wɔɔn bi ke baa li kan nnyaŋim mi, amaa nim li kan n nŋmarim man nyan Uwonbɔr ban.

²⁹ Uwonbɔr pii sei ni nsan ke ni li tun tenn Masiya wee ni laa pa ye naah ŋa u yada n yaa binba, amaa ke ni ji fala mu u bu.

³⁰ Ke ni tɔɔl kaah be ligbaal lan yaan wee ni kam wee n be-n, daandaan nan n le la be li ma yaan le nan.