Filemonn 1 - UWONBƆR A GBƆNPƆŊ LIKƆƆNL

¹ Min Pɔɔl, wan ye uloondiikɔɔr Masiya bu-n, nin ti na a big Timoti le sɔb kugbɔŋ nan, Ki tenn ti jɔ kpaarimɔɔn, Filemɔɔn wan ye ti toontunn kpiɛgin,

² nin ti ninsa Apifiɛ, nin Achipusi wan ye ti tɔtogkpiɛg nin biwonjiɛm a laguŋ ban lagin a niin nin:

³ Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be ni bu.

Filemɔɔn a jiɛm nin u yada a bɔr

⁴ Iyoo biɛn n le poor n Wonbɔru le ki tiɛr a bu n wonmiɛlin,

⁵ nan bu-n n gbir ŋaah ŋa Uyudaan Yisa yada wee ki jiɛ Uwonbɔr a ninfogannkaab biɛn man na.

⁶ N miɛ Uwonbɔr le ke a li tun nin linunmanl ki li por yada kan wee a jɔɔ-n, wee nin che a biɛ nbamɔm niwann ŋan nan biɛn wee ti jɔɔ Masiya ni-n.

⁷ A jiɛm nmɔn seim nmɔn le takpem nin ngbananpɔɔn, nan bu-n fin n nabig, a pɔŋ Uwonbɔr a ninfogannkaab a sufuu.

Pɔɔl kaah miɛ Onesemosi man

⁸ Mambu, hali maah bi ye n li jɔɔ lipoobil Masiya bu ki li fir wɔɔniŋ ŋaah bi ye a tun nan nin,

⁹ amaa n baliŋ le njiɛm bu. Min Pɔɔl, wan ye uninkpel wee daandaan nan ki ye uloondiikɔɔr Yisa Masiya bu-n,

¹⁰ n baliŋ le, n bija Onesemosi bu, wan kpann n bija, n-yonn man wee bi nan lolim tikulorin.

¹¹ N-yonn nba waa nan jɔɔ tinyɔɔr a ban ni, amaa daandaan nan u jɔɔ tinyɔɔr ki sei min nin fin biɛn.

¹² Uma wan ye n poobil a ninfou win le n jɔɔ u jiin a ban.

¹³ Baah lolim tikulorin tibɔŋann nin a mɔɔnim bu, n bi li ban u li be n ban do ki si a taalin ki terim.

¹⁴ Amaa maa ban n ŋa niba wee ŋaa nyi man bu, wee a yin ter nan ke ni laa ye limugili, amaa wee ni li ye a tɔɔl a bam.

¹⁵ Niba ke waah nan fɔr a ban wama-n, nan ye le ke u nan jirin ke u li be a ban isaŋ biɛn,

¹⁶ kaa ji ye uyomi, amaa wan jon uyom, ki ye kinabig jiɛkaag. N jiɛ u kaga amaa fin le jann jiɛ u ki jom, waah ye uninfosaal ki ye kinabig Uyudaan ni-n bu.

¹⁷ Ni ma bu ni ye a nyi ke n ye a toontunn kpiɛg ke, gaa mu ke ŋaah bi li gaam man nin.

¹⁸ Ni ye u nan galiŋ bee u jin a pɔnl le ke, che ni li nɔɔ min na.

¹⁹ Min Pɔɔl, tɔɔl a nɔɔ le n ta sɔb nan. N li yɔ, kaa yin tiɛr ke min le ye fin tɔɔl gbaa.

²⁰ N na big, n bi ban ke n kan tinyɔɔr tiba le a ban ti yudaau bu; pɔŋ n sufuu Masiya ni.

²¹ N jɔɔ tidindann a mɔcheel lan wee a jɔɔ-n bu, ni bu le n sɔb kugbɔŋ nan ki tenniŋ, ki nyi ke a pii li tun ke nin jo nan wee n ke a ŋaa-n.

²² Nan kpiɛ: Mann kuchandiig ki guun ma, nan bu-n n jɔɔ tama ke Uwonbɔr li taam ki jiin nin ni ban, ke naah miɛ Uwonbɔr man nin.

Ipoor yan joor

²³ Epafarasi, wan ye n loondiig kɔɔ kpiɛg Masiya bu-n pooriŋ.

²⁴ Le Mag, nin Arisitakusi, nin Demasi, nin Lug, ban ye n toontunn kpiɛtiibin mu poorin.

²⁵ Ti yudaau Yisa Masiya a nyunyunbasanl li be nin ni naam.