Efesusi 4 - UWONBƆR A GBƆNPƆŊ LIKƆƆNL

Masiya a gbanann a mɔkpaam

¹ Min wan ye uloondiikɔɔr Uyudaan a toon yin bu-n, n balin ni le ke ni che ni binbem nkpaan ni yim man wee ni nan ga-n.

² Ni jiin niba, ki li be soon, ki li jɔɔ limɔril nin njiɛm nin tab.

³ Ni pɔɔn niba ki li ŋmag Kinaaŋ a mɔkpaamin nin nposɔɔn.

⁴ Tigbanann tiba nin Kinaaŋ kiba le be, ke baah nan yin ni tama kiba bu a yim man nin,

⁵ Uyudaan uba, yada kiba, Uwonbɔr a nyunful nba;

⁶ Uwonbɔr uba, nin ti biɛn a Baa, wan jon niwann biɛn, nin niwann biɛn bu, nin niwann biɛn nin.

⁷ Amaa ti biɛn nan Uwonbɔr ta U nyunyunbasanlin le sei ti uba ba uba ba ke Masiya kaah nan por man ki sei ti-n.

⁸ Ni ma bu le ni sɔb Uwonbɔr a gbɔŋin ke: “Waah nan don papaab n-yonn man nin; u nan ŋmag biyom takpem ma, le ki sei bininfob ipiin.”

⁹ (“U nan don papaab” a taai ye nii wee naa wɔɔn ke u nan jiirin kutingbɔŋ nan yaan a tum tum lee?

¹⁰ Uma wan nan jiirin nin, le ye wan ji nan don papaab ki tan jon lagir kitilangbɔŋ bu naah li ŋa man wee un gbeen kutingbɔŋ nan biɛn.)

¹¹ Uma nan ta ipiin ki sei bininfosaalib, u gann biba le ki ŋa bi u tooi, le biba mu ye bilinlem, le biba mu ye bimɔleenmɔɔnib, le biba mu ye ban ŋmag biwonjiɛm a laguŋ nin ban wɔɔnn,

¹² U nan ŋa ni niɛ nan ke un mann Uwonbɔr a ninfob biɛn le wee bin fir tun Uwonbɔr a toon ki che Uma Masiya a gbanann n maa ki do.

¹³ Nin ti biɛn nan n nan fir kpaag bimɔb ti yada-n wee ki chegir ki biɛ Uwonbɔr a bija-n, wee ti binbemin gbee ki foo Masiya a binbemin a magir.

¹⁴ Taa ji yin ye nbuwaab tirimi, wee bilinlarib a wɔɔnimin li jɔɔ ti ki yeŋ ke kubulunkpoŋ kan wee kunyungbɔŋ daar ki yeŋ chaa kaah ban nan paami.

¹⁵ Amaa ibamɔn nin njiɛm a pagim bu, ti yin nɔb le ki kpiɛ Masiya wan ye liyulin nin niwann biɛn a poolin.

¹⁶ U ma bu le ti gbanann tug ki ŋmag tab, le tigbanann nmɔn tug tab ki maa tab kpiɛg nin njiɛm, le ligbanann bɔgil biɛn tun litoonl.

Limiɛfol pɔnl lan be Masiya ni

¹⁷ Ni niɛ nan le n bei ni, Uyudaan bu le n si maah pag n bɔr tan nan bu, ki ke ni laa ji be ke ban kaa ye Juu yaabin kaah be man nin ni, wee bi potiɛl kaa jɔɔ nyɔɔrin ni.

¹⁸ Bi biɛm ye libunbɔnl le, le baa kpiɛ Uwonbɔr kaah sei limiɛfol lan nin yaan ni, nan bu-n baa nyi niba le ki sin ji ye tukangbirdam.

¹⁹ Baa san niba a fai, le ki choon tun kɔlisa birug nin tijaginn a toon, ki la jɔɔ kɔlisa ke bin tun man ki kpiɛ.

²⁰ Nim bu ke, naa ye man le ni nan tinn ki biɛ Masiya.

²¹ N nyi naah gbir u bu, le bi tinn ni u bɔr ki wɔɔn ni ibamɔn yan be Yisa ni nmɔn.

²² Bi nan wɔɔn ni, ki jiin ni binben kpegimin paam ke, ni nya ni binben kpegimin yaan na, mi ye kɔlisa birug kan lar ni le;

²³ ki pɔŋ ni binbem nin ni potiɛl;

²⁴ wee ki ta tigbanann pɔnn tan wee Uwonbɔr nan naan nin ki yee ki li nann Uwonbɔr nin ibamɔn a buchinn nin kasi a binbem.

²⁵ Mambu ni laa ji por tibɔkar ki tenn tabi, uninfo biɛn li pag ibamɔn ki tenn u kunkɔɔn taba, ke ti biɛn ye tigbanann tiba a ninfob le.

²⁶ “Ni ye a ŋuul fii ke a laa tun tibiri”: Ki laa che nween n nan lu wee a ŋuul kaa la sɔŋi,

²⁷ ki laa sei Sintani nsan ni.

²⁸ Wan nan ti su ke, ni kpaa talar le un jiɛn nnaayigim, amaa wee ki li tun na, ki ta u tɔɔl a nɔɔi ki li ŋaan nan ŋan na, wee ki li fir kan niba ki por sei bilanjiim.

²⁹ Ni laa che tibɔbir nyann ni mɔn ni, amaa ni li pag nan li fir ter ni kpiɛtiib, wee nin ŋa tinyɔɔr ki sei ban peligin.

³⁰ Ni laa bii Uwonbɔr a Kasi a Naaŋ a sufu, wan wee Uwonbɔr taah daag ni nkpenim a manugin a daal.

³¹ Ni laa che ni pooi to tab bu, ni laa che ni ŋuui fii wee ni gaan tijar tab bu, ni laa kɔn ki sugir tabi, nima nmɔn nin kininaŋ biɛn ni.

³² Ni li ŋaan tab tiŋanna, ki li san tab kunyunyunbaaga, ki li jiɛn tab a bir ki per ke Uwonbɔr kaah jiɛn per ti Masiya bu man nin.