Efesusi 2 - UWONBƆR A GBƆNPƆŊ LIKƆƆNL

Nkum a nyam nin limiɛfolin a kɔɔm

¹ Nim bu ke, ni nan ye bitakpiib le nin ban bii nsiim ni toonbir bu.

² Naah nan be nsiim a biim nin ni toonbirin ki nɔɔ dulinya nan a sam nin kutingbɔŋ nan a yudaau a naamin, nin kinaaŋ kan tun nin bininfob ban kaa jɔɔ limɔcheelin.

³ Ti biɛn nan be nsiim a biim nin tibirin nmɔn yaan le, ki tun ti tɔɔl a gbanann a kɔlisa a toon, ki tun nan mɔ ki sei ti gbanann a bam nin ti sufu. A li ke bi ma-n, ti nan ye ban li ji Uwonbɔr a ŋuufiiŋin a fala le.

⁴ Amaa Uwonbɔr a jiɛm kaah yab ki sei ti-n bu, wan a nyunyunbasanl yab,

⁵ le U che ti jɔɔ limiɛfol nin Yisa, hali nin taah le nan kpo nin taah bii nsiimin. U nyunyunbasanl bu le ni kan feegab.

⁶ Le Uwonbɔr lagin fiin tim nin Masiya, ki kaan tim nin uma paab a naamin, taah be nin Masiya nan bu,

⁷ U nan tun ni niɛ ke n-yonn man chaan nan u li wɔɔn uninfo biɛn u nyunyunbasanl lan kaa jɔɔ magimin, ki wɔɔn ti u binbenŋam Masiya bu.

⁸ Uwonbɔr a nyunyunbasanl bu le ni kan nŋmarim, naah ŋa Yisa yada-n bu, naa ye ni tɔɔl a toon ŋan bu, ni ye Uwonbɔr a piini le,

⁹ uba kaa li fir fa ligbingbanli, nan bu-n naa ye u tɔɔl a toonl li.

¹⁰ Uwonbɔr le naan tim, Yisa Masiya bu le u sei ti itoon ŋan a binbem, ke ti li tun man wee u pii nan lol ke ti li tun nin na.

Ni ye nba le Yisa ni

¹¹ Mambu ni li tiɛr ke n-yonn man nan jon wee nim ban kaa nan ye Juu yaab wee Juu yaab nan yi ni “tipunjorin”, wee ki sin yi biba “ban jii-n”, (nan ye tigbanann wee bininfob ta bi nɔɔi ki ŋa-n),

¹² Ni li tiɛr ke iyaayoo nmɔn ni nan bɔgir nin Yisa u, baa nan kaan ni kpiɛg Uwonbɔr a ninfogannkaabin ni, ni nan ye bicham le, kaa ji kpiɛ limɔsiinl a poorin yaan ni, kaa jɔɔ tama, kaa jɔɔ Uwonbɔr dulinya nan yaan ni.

¹³ Amaa daandaan nan, ni nin be nin Yisa le, nim ban a bol nan fɔg nin Yisa nan, ni nin fɔɔr ki mal wa, Yisa Masiya a chamin bu.

¹⁴ Nan bu-n uma baan tɔɔl le ye ti posɔɔm, u nan che tim Juu yaab nin ban kaa ye Juu yaabin lagin ki ŋa uninfo uba ki tir ligonl lan nan ye nbɔgirim a gonl ki be ti sisiigin nin ki jaa,

¹⁵ u tɔɔl a gbanann le u nan ta junn Juu yaab a siim nin bi kɔɔi biɛn. Ke un che nposɔɔn ndan ibol ilee nmɔn a sisiigin, wee bin lagin ki li ye libol liba,

¹⁶ Masiya a kum lidapunpunlin bu, ku kidataag kan be bi sisiigin nin, ki taa bi ki lagin tigbanann tiba kpeŋileŋ, ki taa bi jir mɔŋ nin Uwonbɔr.

¹⁷ U nan dan ki mɔɔn nposɔɔn a bɔŋann sei nim ban a bol nan fɔg ki mɔɔn nposɔɔn a bɔŋann nmɔn ki sei ban nan mal.

¹⁸ Masiya bu le kinaaŋ kiba nmɔn ta ibol ilee nmɔn biɛn foon ti Baa Uwonbɔr ban.

¹⁹ Mambu, nim ban kaa ye Juu yaabin kaa ji ye ibol iba yaab bee bichami, amaa nim nin Uwonbɔr a ninfogannkaabin nin ye kitiŋ kiba a buwaab le, ki ye Uwonbɔr a niin yaab,

²⁰ lifiɛl lan wee Yisa a tooi nin bilinlemin nan tɔɔn li bu-n, li ma bu le n mu tɔɔn le Yisa Masiya ye litangbagil lan ye lifiɛl nmɔn a pɔɔm.

²¹ Uma bu le kudiig a maan biɛn tɔɔ tab bu, ki che ni choo tab ki kpann kasi a wonjiɛn niin Uyudaan ni.

²² Uma bu le ni mu lagin ki maa kudiig kan yaan wee Uwonbɔr be nin Kinaaŋin.