Efesusi 1 - UWONBƆR A GBƆNPƆŊ LIKƆƆNL

¹ Min Pɔɔl wan ye Masiya a toom Uwonbɔr a bamin nin, N sɔb kugbɔŋ nan ki tenn Uwonbɔr a ninfogann kaab ban be Efesusi, ki si bi yada-n Masiya ban nin:

² Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be nin ni.

Kinaaŋ a kaar tan be Masiya ni

³ Pagim Uwonbɔr wan ye ti Yudaau Yisa Masiya a Baa, wan ŋa tikaar jaa ti bu, tikaar tan biɛn nyan papaab ki ye Kinaaŋ a kaar tan be nin Masiya nan.

⁴ Uwonbɔr kaah kaa la nan naan dulinya n-yonn man nin, le U nan gann tim ke ti li be kasi ki laa jɔɔ igalin U ban ni. U jiɛm bu,

⁵ U pii nan lol ke U li ta ti ki kpann U buwaab Yisa Masiya bu, U nan lol man le U nungbeelin nin U bam,

⁶ che ti pag Uwonbɔr U jilima nin U nyunyunbasanl lan wee U sei ti yɔli U bijiɛkaagin ni.

⁷ Yisa a chamin bu le ti kan nkpenim a manug, ni ma ye tibir a jiɛn per, Uwonbɔr a nyunyunbasanl takpenlin bu

⁸ man wee u kpaar tinyɔɔr takpem jaa ti bu nin nlam nin nbiɛm biɛn.

⁹ Le U kpiir wɔɔn ti nan wee U nan woon lol U bamin ke un tun nin Masiya, U nungbeel a ŋamin nin,

¹⁰ n-yonn nmɔn nan foo ke, U ni li tun ki gbeen U lol nmɔn, ki lagin waah nan naan nan papaab nin tum biɛn, wee Masiya li ye uyudaan.

¹¹ Masiya ni le Uwonbɔr nan gann ti mu, ki ta ti kpann U tɔɔl a ninfob nin waah ban niwann biɛn ntun man U bamin,

¹² wee tim ban chinn jɔɔ tama Masiya ni-n, nsei U kupag nin jilima.

¹³ Ni tɔɔl nan kpiɛ ki be nin Masiya le, naah nan gbir imɔleen yan ye ibamɔn nin, ki ye ni feeja a bɔŋann nin. Naah ŋa yada-n bu, le Uwonbɔr ta U yaa daagim ki daag ni, lan ye limɔsiinl Kasi a Naaŋin,

¹⁴ Kasi a naaŋ nmɔn li ye lifaal nmɔn a siɛra hali nin n-yonn man wee ti na li kan nkpenim a manug tim ban ye U ninfobin, tim li pagir U ki tenn U kupag.

Pɔɔl a wonmiɛl

¹⁵ Mambu n-yonn man wee n nan gbir naah ŋa ti Yudaau Yisa yada nin naah jiɛ Uwonbɔr a ninfogannkaab a bɔr man nin,

¹⁶ n tenn Uwonbɔr kunɔɔpoog ni bu kaa ta jiɛn ni, ki tiɛr ni bu n wonmiɛlin.

¹⁷ N le miɛ ti Baa wan ye ti Yudaau Yisa Masiya a Wonbɔru, ki ye ti Baa wan ye jilimadaan nin ke, Un sei ni Kinaaŋ a lam nin kpiir wɔɔn, wee ni mann biɛ U nbamɔm.

¹⁸ N ji miɛ Uwonbɔr le ke Un ligir ni sufu wee ni biɛ tama kan bu wee U yin ni-n, ki ji biɛ U jilima takpenl a faal lan wee U nan siin limɔsiinl ki sei U ninfogannkaabin,

¹⁹ nin U pɔɔn takpem man yab kaa jɔɔ magim wee U ta sei tim ban ŋa U yada-n. Npɔɔn nmɔn tun ki nann lipɔɔn gbingbemil le,

²⁰ U pɔɔm nmɔn le U nan ta ki fiin Masiya nkumin ki ta U kaan U nɔɔjiim paam papaab,

²¹ niin le Masiya be ki jɔɔ npɔɔn man jon nnaam a pɔɔm, ki jon tininkper a pɔɔm, ki jon ipɔɔn biɛn, nin nnaam a yerin, ki jon iyin yan be daandaan nan nin yan la yin dan n-yonn man chaan nin na.

²² Le Uwonbɔr ta niwann biɛn ŋa u nɔɔn, le ki gann u ke u li ye biwonjiɛn a laguŋ a yudaau.

²³ Biwonjiɛm a laguŋ nmɔn le ye U gbanann, le U gbanann nmɔn gbee nin U ma Masiya a pɔɔm, le U mu gbee nin niwann biɛn.