2 Timoti 3 - UWONBƆR A GBƆNPƆŊ LIKƆƆNL

Idajoorikaa a bɔr

¹ Amaa ni li nyi man: Idaa yan na yin joorin na li bir takpem.

² Bininfob na yin jiɛ bi ba le, ki ye ban ban ilig, nin ligbingbanfaal, nin kalanbaani, ki sugir bininfob, kaa ji li gbir sei bi baam nin bi nami, ki li ye ban kaa jɔɔ linungbeeli nin ban kaa jɔɔ kasi a binbem,

³ kaa li jɔɔ njiɛm nin tabi, kaa li jiɛn tab a bir per bi, nin kutingbiig, kaa li fir ŋmag biba, ki ye ban jɔɔ npooton nin ban kaa jiɛ nan ŋan ni,

⁴ bi na li nya tab a bɔɔn, ki ye ban kaa tiɛri, ki donn biba, bi na yin ban dulinya nan a wann ŋann le ki jon Uwonbɔr,

⁵ bi na yin jɔɔ nwonjiɛn binben le tigbanann nin, amaa le ki sin yii liwonjiɛnl a pɔɔm. Ni laa che nim nin bi ma jɔɔ nɔɔ nin tabi.

⁶ Bi yaa ni bibam le woog kɔɔ bininfob a niin yin ki lar tipiijɔri ban a sufu gbee nin titoonbir wee ki nɔɔ bi sufu a bamin biɛn nin,

⁷ bipiib nmɔn le tinn le iyoo biɛn, amaa le kaa biɛr ibamɔn nni.

⁸ A li ke Janesi nin Jambiresi kaah kaa nan chee sei Moziz man ni, man le bininfob nan mu kaa chee sei ibamɔn nni, bi tiɛr nan bir le, kaa jɔɔ yada.

⁹ Amaa baa li fir lar bininfob ki chaari, nan bu-n bininfob nmɔn biɛn li biɛ ke bi ye tijɔri le, ke baah nan biɛ Janesi nin Jambiresi bu man ni.

Nwɔɔm man joor a bɔr

¹⁰ Amaa fin Timoti, a nyi n wɔɔnimin kaah ye man, nin n binbem, nin n lol, nin n yada, nin n mɔril, nin n bam nin maah pɔɔn nba man,

¹¹ nin baah mugirim man, nin n fala a jim, nin tiwann tan biɛn nan kam Antiɛg, nin Ikoniɛm nin Lisitira, nin maah nan pɔɔn nba ki kan limugil lan. Nin ni ma biɛn Uyudaan nan nyan ma.

¹² Ibamɔn, uninfo wan biɛn ban un be Uwonbɔr a bam Masiya a yinl bu li kan limugil,

¹³ le tininfobir nin bilinlarib a toonbir li mann kpiɛ, le bin lar bitab le bi tab mu nlar bi.

¹⁴ Amaa fin ma, le li ŋmag nan wee a tinn ki ŋa ni yada-n na, nan bu-n a nyi ban tinniŋ tibɔŋann nmɔn,

¹⁵ naah nyan a buwaan nin na, a pii nyi Uwonbɔr a kasi a bɔrin, nan che a jɔɔ nlam ki kan nŋmarim man nyan a yada kan wee a jɔɔ nin Masiya-n.

¹⁶ Tibɔr tan biɛn be Uwonbɔr a gbɔŋin ni ye Uwonbɔr a mɔleen le, tibɔr nmɔn jɔɔ tinyɔɔr ki jiin nwɔɔnim nin ikpaan, nin nbuchin binben paam,

¹⁷ wee nin che Uwonbɔr a ninfou a binbem li ŋan, wee un fir tun itoon ŋan biɛn.