2 Piita 2 - UWONBƆR A GBƆNPƆŊ LIKƆƆNL

Ban wɔɔn tibɔkar

¹ Amaa tibɔkar a linlem mu nan be bininfob nmɔn ban, ke ban wɔɔnn tibɔkar kaah na li be ni mu ban man nin. Bi na li woon ki ta nan kaa ye ibamɔn ki wɔɔn ni, hali ki yii Uyudaan wan jɔɔ npɔɔn biɛn wee ki nan daa bin, ki ban nbiin man yin dan weem ki jaar biba bu.

² Bininfob takpem na li nɔɔ bi fai nmɔn a sam, le ki che ibamɔn a samin kaa jɔɔ jilima.

³ Tibɔkardam a jaŋuuŋ nbu, bi na li teen iteen baah li ŋa man ki ji ni dulim, nan na yin bii bin a sili pii beera, le nan yin bii bin kaa dɔ jiɛn ni.

⁴ Ni ma bu Uwonbɔr kaa nan jiɛn malakam ban nan tun tibirin nni, amaa le ki nan ta bi jaa nŋmi-n, nan yaan wee ntuton be-n wee bi nan kan tibɔr a jim.

⁵ Waa nan jiɛn yaaja yoo a ninfob a bir ki per bi wee ki nan che nnyum jin ban kaa jɔɔ ween nin, le ki nyan Nowa, wan nan mɔɔn tibuchinn a binbem, nin bininfob bilile.

⁶ Le U nan bii Sodom nin Gomoriya ki nan che bi gaa nŋmi ki nan kpann nfatam, ki ŋa bi limagil ke ban kaa jɔɔ nween nin kaah na li kan man.

⁷ Le U nan fee Lɔɔr wan nan ye ubuchin wee ban bii nsiimin nan mugir win gab,

⁸ (uninfo buchin nmɔn, kaah nan be nin bi idaa biɛn nin u nan ga ki gbir bininfob ban kaa ŋmag nsiimin a toonbir le ni nan bii u buchin naaŋ a sufu.)

⁹ Ni ye Uyudaan ŋa man biɛn ke, U nyi waah li ŋa man ki fee ban ye biwonjiɛmin ki jaa bi mugilin, amaa le ki guu ban kaa ye bibuchimin tibɔr a ji daal, nin waah na tugir ki dar bi tuli man.

¹⁰ Ni niɛ nan sin ye ibamɔn le ki jann tɔɔ ban nɔɔ kuŋmaruŋ kan ye bi gbanann a bamin ziɛn tininkper a pɔɔma. Bi ye ban jɔɔ ipoobil le nin ban jɔɔ kalanbaani, baa san bijawaam nin bin ŋa kutingbiig nin paab a wann naan wann tan fo;

¹¹ hali malakam, kaah le jɔɔ tigbanann a pɔɔn takpemin gbaa, baa jɔɔ kutingbiig a galin ki tenn ban be papaabin Uyudaan a nintogili.

¹² Amaa bilinlarib nan, bi wɔɔn biba le ki sugir tibɔr tan biɛn wee baa nyi ti taai. Bi nann kulɔŋ a wankor le, tiwann naan wann tan kaa nyi niba, tan be wee bi nan chor tan kɔr, bi na li kpo ke tiwankorin.

¹³ Bi na li yɔ bi ki jiin baah jin bininfob fala nbu. Bi ye ban a num gbee tigbanann a kɔlisa a toon yan wee bi tun nwonween nin le. Bi ji ye bifadam ban kaa san igalin le, hali bi le lagin ki ji nin ni tijiir ke, bi nyann bi mɔm bilig npaan nin le.

¹⁴ Bi num gbee iwanchɔgin toon le, baa jiɛn tibir a tumi; le ki lar ban kaa si bogiliba-n; ki ye ban nyi kujaŋuuŋ a toon, limɔpool be bi bu!

¹⁵ Bi ta nsan man telin le gab ki bor ki nɔɔ Balaam Bɔɔr a bija, wan ban npooton a yɔrin.

¹⁶ Amaa Uwonbɔr nan che kiboŋ kan kaa pag tibɔr ta usaal a kukɔl ki fuun ulinlenn nmɔn bu ki ŋɔɔr u waarug a toon yin.

¹⁷ Bininfob nmɔn nann kinyunbuŋ kan kaa jɔɔ nyum le nin liŋunl lan wee nfaam daar li chaa-n le. Libunbɔnjal le siin ki guu bi.

¹⁸ Bi mɔɔŋi kaa jɔɔ nyɔɔri, kalanbaani a mɔleen le bi jɔɔ, ki lar ban ban bin nya tigbanann a kɔlisa a toon yin ni, le bi jir kuŋmaruŋ a toon yin.

¹⁹ Bi bei bininfob le ke bi na li kan yemba amaa le bi baantɔɔl ye tibir a yomi, nan bu-n nan nyaŋir uninfo ŋaan u tiyomir le.

²⁰ Ni ye baah nyan dulinya nan a ŋmaruŋin, baah nyi ti Yudaau nin ti feeru Yisa Masiya-n, wee ni ye kuŋmaruŋ nmɔn ji choo bi ki nyaŋ bi ke, bi joorim na li bir ki jo bi piinim.

²¹ Ni ye baa bi nyi tibuchinn a samin ke, ni bi li ŋan ki sei bi ki jon nin baah nyi mi wee ki labir bi bɔɔn ki kpaa kasi a siim man wee bi nan ta sei bi nna.

²² Le bi ŋaar nmɔn wɔɔn ke ibɔŋal yan bi gaa-n ye ibamɔn le: Yan len ke, “Kibɔg wul ke ki jir tan ji ki wulin nin le,” le “Udool mu fun nnyum ke, u ji jir le ki tan fu nnyunbunyiɛm.”