2 Korenti 8 - UWONBƆR A GBƆNPƆŊ LIKƆƆNL

Biwonjiɛm a piini a bɔr

¹ Daandaan nan ti nabum, ti ban ni biɛ Uwonbɔr kaah san Masedoniya a wonjiɛm a laginn kunyunyunbaag man le.

² Nin bi fala nin bi bigim takpem a poolin, ni biɛn yɔli, ni nan mɔŋ bi le takpem le bi nan pu Uwonbɔr ipiin nin npopeen.

³ Nan bu-n n ji bi siɛra ke bi sei baah jɔɔ nan le, ke nin jon bi pɔɔm a tarig. Bi tɔɔl a bam bu,

⁴ bi nan balin ti ke ti sei bi nsan wee bin ta bi nɔɔi ki kɔɔn biwonjiɛm a teril nmɔn yaan weem.

⁵ Bi nan ŋa ki jon taah bi tiɛr ke bi li fir ŋa man na, amaa bi nan chinn ta biba le ki sei uyudaan; le ki nin ta biba ki sei ti le ti ŋmag Uwonbɔr a bam.

⁶ Mambu le ti nan kpaan Tatusi ke taa pii nan piin ki tun man ni, u li tun man na ki diɛ linyunyunbasanl a toonl nan ni tɔɔl ban na.

⁷ Amaa naah jɔɔ nan yaba: Ni yada, nin ni pipagir, nin ni nyinyim, nin linunmanl nin njiɛm wee ni jɔɔ nin ti, ni mu che ni nyunyunbasanl a piini li yaba.

⁸ Maa siin nsiim le ki sei ni, amaa n wɔɔn ni kpiɛtiib kaah tun nin linunmanl man le. Ke n mag ni jiɛm kaah ye man.

⁹ Ni nyi ti Yudaau Yisa Masiya a nyunyunbasanl kaah ye man. U nan ye uwandaan le, amaa nim bu le u kpann faladaan, naah li ŋa man wee u fala nmɔn n che ni kpann biwandam.

¹⁰ N kpaani sɔ, nan li ŋan ki sei ni tibɔr nan yaan: Jirib n-yaan nim le nan chinn ki sei ni piini kaah ye nan, naa ye naah li pu n-yaa binba amaa ni wɔɔn naah jɔɔ kɔlisa nin ni tun man le.

¹¹ Daandaan nan ni gbaar itoon nmɔn na, wee naah jɔɔ kɔlisa ki jiɛ itoon yan nin nfir nɔɔ tab, naah li fir ki ŋa man.

¹² Ni ye a sei Uwonbɔr nin nbam ke, Uwonbɔr li gaa ipiin nmɔn ŋaah jɔɔ nan, kaa ye ŋaah kaa jɔɔ nan ni.

¹³ Ti boni kaa ye ti tun ni itugi wee ni kpiɛtiib ma li foori, amaa ni biɛn a tugi li kpaa dede.

¹⁴ Naah jɔɔ wee ni yab daandaan nan ni, ni ŋan nin ni ter ban kaa jɔɔ nna, wee ni ye ke ni mu kaa nan jɔɔ ke, bi mu li ter ni, ni niɛ le li che ni biɛn li kpaa nin tab,

¹⁵ a li ke naah sɔb Uwonbɔr a gbɔŋin ke, “Wan nan chiɛ takpemin, waa nan jɔɔ ki tan lagiri, le wan nan chiɛ wama-n, naa nan waari.”

Tatusi nin u ninɔɔtab a bɔr

¹⁶ Uwonbɔr n gaa kunɔɔpoog nin waah che Tatusi a baga be ni ban, ke n baga kaah be ni ban man ni.

¹⁷ Nan bu-n taah balin u ke un jo ni ban ni, u cheeu, le u baantɔɔl a num man nin un dan ni ban, nin u bam.

¹⁸ Ti li che ti na big kiba nnɔɔ u ki dan ni ban. Ti na a big nmɔn kaah mɔɔn Uwonbɔr a bɔŋann nin man ni bu che biwonjiɛm a laginn biɛn pagir u le.

¹⁹ Nan kpiɛ, biwonjiɛm a laginn nin le ji gann u ke u li nɔɔ ta wee ti tu ipiin yan wee bi nan ŋaan wee yin don uyudaan baantɔɔl a yinl, ki ji wɔɔn taah jɔɔ linunmanl nin ti ter man.

²⁰ Ti ban taah li ŋa man le wee bininfob nlaa bii ti yinl ki ke ti ban niba ipiin nmɔn yaan ni.

²¹ Ti boni kaa ye ti tun nan ŋan Uwonbɔr a numbimin a binba le, amaa ti ban ti tun nan ŋan le bininfobin tɔɔl a numin.

²² Nan kpiɛ, ti yin che ti na a big kiba le nnɔɔ bi ki dan, wan wɔɔn ti waah jɔɔ kɔlisa man nin niwann biɛn ni nin iyoo biɛn, waah jɔɔ tidindann takpem ni bu nbu.

²³ Tatusi ma bu ke, u ye n toontunkpiɛg le ni sisiigin; amaa ti na bum n ma si biwonjiɛm a laginn a taai-n le, ki ye jilima sei Masiya.

²⁴ Mambu ni wɔɔn bijab nan na ban bi man, nin nan bu wee ti jɔɔ kalanbaani ni bu, wee biwonjiɛm a laginn nin kan.