2 Korenti 2 - UWONBƆR A GBƆNPƆŊ LIKƆƆNL

¹ Mambu le n nin bon n sufu ni ke, maa ji yin gɔnn ni, wee ni kan nan wi.

² Ni ye n bii ni sufu ke, ŋma ji yin penn n sufu kaa ye nim ban wee n bii ni sufu nnaa?

³ Ni bu le n nan sɔb kugbɔŋ nan ke, maa ban n dan ki nan kan npoobiin ban bi li che ni li mɔm n ban ni. N jɔɔ tidindann ni biɛn nan bu, ke ni biɛn na li ji n mɔm.

⁴ Maah nan sɔb kugbɔŋ nan ki tenn ni, n nan sɔb nin npoobiin le takpem nin tinyinyinn, naa ye ke n nan ban n bii ni sufu le, amaa n nan ban ni biɛ maah ban ni takpem man le.

Wan galin a jiɛn per a bɔr

⁵ Ni ye uba ta npoobiin ki foon ke, waa bii n yaa binba a sufu, amaa u bii ni biɛn a sufuu gbaa, maa ban n ŋa li kinimaŋ tan lagiri.

⁶ Ni takpem kaah dar u tul man ni, ni kpaan wa.

⁷ Amaa daandaan nan ni ŋan nin ni jiɛn per u, amaa wee ki sɔŋir u sufu, wee ki laa che npoobiim n kɔɔ ki tan lagiri.

⁸ N balin ni le, ni che ni bam nmann pɔŋ nin u.

⁹ Ni nan bu le n sɔb ki mag ni njee ni sin chee n mɔb biɛn waa?

¹⁰ Ni ye ni jiɛn wan a bir ki per u ke, n mu jiɛn per wa. Le nan wee n jiɛn perin, hali ni ye niba le n jiɛn per ke, nim bu le n jiɛn per u Masiya a nintogil,

¹¹ wee Sintani n laa kan npɔɔn ki lar ti. Nan bu-n ti nyi u san kaah ye man.

Pɔɔl a sufu kaah kaa nan dɔ Tirosi a tiŋin man

¹² Maah nan foo Tirosi a tiŋin ke n mɔɔn Masiya a bɔŋann ni, le n biɛ ke Uyudaan sin loor u toon a naanganl ki sei ma.

¹³ Amaa maah kaa nan kan n na a big Tatusi nin yaan ni bu che n sufu kaa nan dɔ, nibu le n chabir nin yaan yaab, le ki jon Masedoniya.

Yisa bu le ti kan nnyaŋim

¹⁴ Amaa Uwonbɔr le ye kunɔɔpoog, nan bu-n iyoo biɛn U lii ti sam ki pee nnyaŋim a naatuŋ Masiya a pɔɔm bu. U bɔr mɔ le ke tulaali a baam kaah mɔ man ni, le u che ti mɔɔn ti ilog biɛn.

¹⁵ Tim le ye Masiya a tulaali ki sei Uwonbɔr ban kan feegab nin ban kaa kan feegab a sisiigin.

¹⁶ Ban kaa kan feegabin ma ban, ti jɔɔ nbaam man che nkum forin le, amaa ban kan feegabin ma ban ti jɔɔ nbaam man che limiɛfol forin le. Ŋma kpaan nin itoon nmɔn naa?

¹⁷ Taa ye bininfob takpem ban ŋmag Uwonbɔr a bɔr nmɔn wee ti ye kpoŋkpoŋ ki sei bin ni, amaa Uwonbɔr kaah tun ti n bu le ti jɔɔ ibamɔn a pipagir ki be u nintogil ki pag Yisa a pɔɔm bu.