1 Timoti 5 - UWONBƆR A GBƆNPƆŊ LIKƆƆNL

Yadadam a toon kaah ye man

¹ Laa fuun wan joŋ bu, amaa pag u nin nniɛn diin ke a baa-n. Li ŋmag nnachipɔnbum ke a na bumin,

² ki li ŋmag bipiininkpeeb ke a namin, ki ji li ŋmag nbisiɛm ke a ninsiɛbin nin kasi a binbem.

³ Li lig ipukɔɔ yan sin ban literilin nbamɔm nin jilima.

⁴ Amaa lipukɔɔl lan jɔɔ nbuwaab bee iyaabil ke, nbuwaab nin iyaabili nmɔn le ye bin chinn tinn biwonjiɛnl a sam ki li jɔɔ tun ki lig bi niin yaab, bi ŋa man ke bi li yɔ ki jiin bi baam nin bi yaajam kaah nan tun nan ki sei bin, Uwonbɔr a num kaah gbeeg nan le yen.

⁵ Lipukɔɔl lan sin ban nterimin wee kaa jɔɔ wan li ter win, u tama be Uwonbɔr ban le, le u miɛ Uwonbɔr ki ban nterim nween nin kunyiɛg.

⁶ Amaa lipukɔɔl lan ta liba ki sei tigbanann a bam ma pii kpou, hali nin waah le la fo-n nan biɛn yɔli.

⁷ Ta nwɔɔm nan ki wɔɔn bininfob nmɔn na, wee bi laa jɔɔ igalin ni.

⁸ Ni ye wan kaa ter u maali, nin naah jann tɔɔ ban bu u tɔɔl a niin yaab ke, u yaa daan kaa ji ŋa yada le nmɔn, ni bu u bir ki jon wan kaa ye uwonjiɛn na

⁹ Lipukɔɔl lan kaa la foo ibin piloob kaa kpiɛ ipukɔɔ a kanlin ni, see wan jon ibin piloob, ki ye wan wee u chal ŋa u yada,

¹⁰ wee bininfob nyi u nbamɔm u toon ŋan bu, ki ta jiin waah wubiri u buwaab man, nin waah tun jiininba a toon ki tenn biwonjiɛm man, nin waah gaan bicham u niin man, nin waah li tenn ban be limugilin literil lan, nin waah ta u ba ki sei itoon ŋan nin biɛn man.

¹¹ Amaa bipiisapɔm ban ye ipukɔɔ n ma, laa ta bi yin ki kpiɛ nin yaan ni. Nan bu-n ni ye bi kɔlisa nan jir tigbanann a bam paam ke, bi yiin Yisa le ki ban bin kun tichar.

¹² Ni ye man ke bi ban tibɔr a jim ki sei biba le nmɔn, nan bu-n bi bii bi chinchinn a mɔsiinlin na.

¹³ Nan kpiɛ, ni che bi bii bi saŋi le, ki jin kɔɔ bininfob a niin yin ki chaa, naa ye bi bii bi saŋ a binba le, amaa bi su libɔɔnsul le ki jɔɔ linunmanl lan kaa jɔɔ nyɔɔri, ki kɔɔ tibɔr tan kaa nyan bi-n

¹⁴ Ni bu n kpaan bipiisapɔm ban ye ipukɔɔ nbiɛn le ke bin kum bijab, ki maa nbuwaab, ki li lig bi niin nbamɔm wee ki laa che kidataagin n kan npaan ki ŋa kutingbiigin.

¹⁵ Biba pii fɔra ki labir bi bɔɔn kpaa ki nin nɔɔ Sintani le.

¹⁶ Ni ye upii wan ye uwonjiɛn wee ki jɔɔ ipukɔɔ u niin ke, ni ŋan nin un lig bi, ki laa che ipukɔɔ nmɔn a bɔmugkaar li tu biwonjiɛm bu, wee biwonjiɛmin nmɔn nfir lig ban le sin jɔɔ tibɔmugkaarin.

¹⁷ Bininkpeeb ban wɔɔnn biwonjiɛm a toon nbamɔmin kpaan nin bin kan jilima nkerim milee, naah jann tɔɔ ban bu le ye ban a toonl ye bi li mɔɔn ti ki wɔɔn nin.

¹⁸ Nan bu-n Uwonbɔr a gbɔŋ len ke, “Laa lol kinaajag a mɔb n-yonn man wee u be kuur idi,” le “Ni ŋan nin u toontunn biɛn n gaa u toon a yɔr.”

¹⁹ Laa chee ki ke uninkpel galin ni, see ke bininfob bilee bee bita le lagin tab ki jin siɛra.

²⁰ Ban tun tibir ke, a fuun bi bu kubabugin na, wee ban gurin n kan ikpaan.

²¹ Uwonbɔr a nintogil, nin Masiya a nintogil nin Malaka gannkaabin a nintogil le n kpaaniŋ ke, a chee nwɔɔm nan wee ki laa jɔɔ nbɔgirim bee ki gann ki ban uba ki jiɛn utɔ ŋaah tun nan biɛn nin ni.

²² Laa jegil ki ta a nɔɔi ki paag bininfob bu, ki laa kpiɛ ban tun tibir bu wee ni tun ni. Li ŋmag a ba kasi.

²³ Laa nyu nnyum a binba, amaa ki li nyu ndaam wama wamau a powiɛn nin ŋaah buŋir iyoo biɛn nbu.

²⁴ Bininfob bibam a bir pii dɔ npaan ni le, ki pii chinn dɔ ki ye bin ji bi tibɔr le; le bi ba mu a bir na li nya npaan ni ni bɔɔn bu.

²⁵ Man mu le ji ye ni, itoon ŋan mu be npaan ni le, hali itoon ŋan yan kaa be npaan ni nin kaa li fir woon ni.